فۋتبول • 25 قازان، 2021

«قايرات» «استانانى» التىنسىز قالدىرۋى مۇمكىن

55 رەت كورسەتىلدى

فۋتبولدان قازاقستان پرەمەر-ليگاسىنىڭ اياقتالۋىنا ءبىر عانا تۋر قالدى. كۇنى بۇرىن قولا جۇلدەنى يەلەنىپ قويعان الماتىنىڭ «قايراتى» پرەمەر-ليگانىڭ 25 تۋرىندا ەلوردالىق «استانانى» قابىلدادى، دەپ حابارلايدى Egemen.kz.

تۋرنير كەستەسىندە توپ باستاعان «استانا» ءۇشىن بۇل كەزدەسۋدىڭ ماڭىزى زور بولاتىن. ويتكەنى ماڭىزدى ءۇش ۇپاي چەمپيوندىققا تىكەلەي باستاپ باراتىن. «قايراتتان» ايلاسىن اسىرسا، سوڭعى تۋردا «استانا» «ارىستى» ويناقتاپ ءجۇرىپ ۇتاتىنى بەلگىلى ەدى. بىراق، مەرزىمىنەن بۇرىن قولا مەدال يەگەرى اتانعان «قايرات» فۋتبولشىلارى بۇل كۇنى بوساڭسىعان جوق. وزدەرى ءۇشىن تۋرنير كەستەسىندە ايتارلىقتاي اسەرى جوق كەزدەسۋدە قارسىلاس كوماندادان باسىم ءتۇستى. نەبويشا كوسوۆيچ سالعان گول «استانانى» التىن مەدالدان ايىردى دەۋگە دە بولاتىنداي.

ءوز كەزەگىندە قوستانايدىڭ «توبىلى» ەل چەمپيونى اتانۋعا جاقىن تۇر. 25 تۋردا قاراعاندىنىڭ «شاحتەر» فۋتبول كلۋبىنا قارسى جاسىل الاڭعا شىققان قوستانايلىقتار قارسىلاستارىن 4:1 ەسەبىمەن تاس-تالقان ەتىپ جەڭدى. بۇل كەزدەسۋدە «شاحتەر» فۋتبولشىلارىنىڭ بويىنان جەڭىسكە دەگەن جىگەردىڭ ۇشقىنى دا بايقالعان جوق.

سوڭعى تۋر الدىندا كوش تىزگىنىن قولعا العان «توبىل» «استانادان» 2 ۇپاي الدا تۇر. ەلوردالىقتار سوڭعى ويىندا «ارىستى» جەڭگەن كۇننىڭ وزىندە «توبىل» فۋتبولشىلارى ورالدىڭ «اقجايىق» كومانداسىنىڭ الدىندا قورعانسىزدىڭ كۇيىن كەشەدى دەگەنگە سەنۋ قيىن. ارينە، ءبارى دە مۇمكىن. بىراق، «توبىل» ءوز مۇمكىندىگىن ءمۇلت جىبەرە قويماس.

سوڭعى جاڭالىقتار

ۇقساس جاڭالىقتار