ءباسپاسوز جيىنىندا ءسوز العان ءبىلىم جانە عىلىم ءمينيسترىنىڭ ءبىرىنشى ورىنباسارى شولپان كارينوۆا:
«قازىرگى تاڭدا شتاتتىق رەجىمدە وقۋشىلاردىڭ 86,4%, ارالاس فورماتتا 11,6%, اتا-انالاردىڭ ءوتىنىشى نەگىزىندە 0,6% بالا قاشىقتان ءبىلىم الۋدا. ءبىز بۇعان دەيىن دە ەلىمىزدە وقۋشى ورنى تاپشى ءۇش اۋىسىمداعى مەكتەپتەر بار ەكەنىن ايتقان ەدىك. وسى ماسەلەنى شەشۋ بويىنشا ۇلكەن جۇمىستار اتقارىلۋدا. مەملەكەت باسشىسىنىڭ تاپسىرماسى بويىنشا 2025 جىلعا دەيىن مىڭ مەكتەپ سالىنادى. بيىلدىڭ وزىندە جوسپارعا سايكەس 200 جاڭا مەكتەپ پايدالانۋعا بەرىلۋى ءتيىس. اۋىسىمداردى جەڭىلدەتۋ ءۇشىن ءار مەكتەپكە جەكە پاندەردى نەمەسە پاندەر بويىنشا جەكە ساعاتتاردى قاشىقتان وتكىزۋ ارقىلى ارالاس وقىتۋدى ۇيىمداستىرۋعا قۇقىق بەرىلدى. بۇگىندە مەكتەپتەر وسى مۇمكىندىكتى پايدالانىپ وتىر. بۇل نەگىزىنەن نۇر-سۇلتان, الماتى, شىمكەنت قالالارى, الماتى جانە تۇركىستان وبلىستارىنىڭ مەكتەپتەرىندە جۇزەگە اسىرىلىپ جاتىر», دەدى.
مينيسترلىك وكىلىنىڭ ايتۋىنشا, جاڭا وقۋ جىلىنان باستاپ كوللەدجدەرگە اكادەميالىق دەربەستىك بەرىلگەن. بۇل جۇمىس بەرۋشىلەردىڭ قاتىسۋىمەن جانە ەڭبەك نارىعىنىڭ تالاپتارىمەن ءبىلىم بەرۋ باعدارلامالارىن ازىرلەۋگە مۇمكىندىك بەرەدى. بۇعان قوسا «جاس مامان» جوباسى بويىنشا 180 كوللەدجدى زاماناۋي جابدىقتارمەن جابدىقتاۋ, ءتيىستى باعدارلامالار جاساۋ, جاڭا باعدارلامالارمەن وقىتۋ بويىنشا جۇمىستار باستالدى. جاڭا وقۋ جىلىندا ەلىمىزدىڭ كوللەدج ستۋدەنتتەرى ءۇشىن تەوريالىق, لابوراتوريالىق, پراكتيكالىق ساباقتار جانە كاسىپتىك پراكتيكا شتاتتىق رەجىمدە وتكىزىلەدى. دەسەك تە وقۋ پاندەرىنىڭ 20%-ىن قاشىقتان وتكىزۋگە رۇقسات بەرىلگەن.
جوعارى وقۋ ورىندارىندا دا ستۋدەنتتەر ارالاس فورماتتا وقىپ جاتىر. نەگىزگى ساباقتارىن ۋنيۆەرسيتەتتە وقيتىن ءبىلىم الۋشىلاردان پتر ناتيجەسى سۇرالمايدى. ۋنيۆەرسيتەتتەردەگى وسى جانە وزگە دە وقۋ بارىسى جايلى ءبىلىم جانە عىلىم ۆيتسە-ءمينيسترى قۋانىش ەرعاليەۆ:
«بۇگىندە ەلىمىزدە 122 جوعارى وقۋ ورنى بار, وندا 600 مىڭعا جۋىق ستۋدەنت ءبىلىم الىپ جاتىر. اكادەميالىق كۇنتىزبەگە سايكەس بارلىق دايىندىق باعىت بويىنشا ستۋدەنتتەر ارالاس فورماتتا وقۋدى باستادى. اتاپ ايتقاندا, دارىستەر ونلاين, سەمينار, زەرتحانالىق جانە پراكتيكالىق ساباقتار وفلاين رەجىمىندە وتكىزىلەدى. جوو-دا ماسكا تاعۋ رەجىمى ساقتالادى, بارلىق كورپۋستا سانيتايزەر, دەزينفەكتسيالىق اركا, تەپلوۆيزور ورناتىلعان. جوو, وقۋ كورپۋستارى, كىتاپحانا جانە جاتاقحانالار اۋماعىندا Ashyq قوسىمشاسى قولدانىلادى. باس سانيتارلىق دارىگەردىڭ قاۋلىسىنا سايكەس وقىتۋشىلار مەن قىزمەتكەرلەر ءۇشىن مەديتسينالىق قارسى كورسەتىلىمدەرى بارلاردى قوسپاعاندا, «جاسىل» مارتەبەنىڭ بولۋى مىندەتتەلەدى. ستۋدەنتتەردە پتر-تەستىلەۋدىڭ بولۋىن تالاپ ەتۋگە جول بەرىلمەيدى», دەپ مالىمدەدى.
