سپورت • 22 قازان، 2021

سپورت جاڭالىقتارىنا شولۋ

29 رەت كورسەتىلدى

جولداستىق كەزدەسۋ وتكىزەدى

فۋتبولدان قازاقستان ۇلتتىق قۇرا­ماسى قاراشادا تاجىكستان قۇراما­سىمەن جولداستىق ماتچ وتكىزەدى. بۇل تۋرالى قازاقستان فۋتبول فەدەرا­تسياسىنىڭ ءباسپاسوز قىزمەتى مالىمدەدى.

 

فيفا-نىڭ رەسمي جولداستىق ماتچتار كۇنتىزبەسى اياسىندا ەكى ەل فەدەراتسياسىنىڭ وكىل­دەرى كەلىسسوز جۇرگىزىپ، ماتچ وتكىزۋ تۋرالى ورتاق كە­لىسىمگە كەلگەن. ويىن 16 قاراشادا ەلور­داداعى «استانا ارەنا» ستاديونىندا وتەدى. ماتچ نۇر-سۇلتان ۋاقىتىمەن 19:00-دە باس­تالادى.

الەم چەمپيوناتىنىڭ ىرىكتەۋ كەزەڭىن ازيا قۇرلىعىندا وتكىزگەن تاجىكستان F توبىندا جاپونيا، ميانما، موڭعوليا جانە قىر­عىزستان قۇرامالارىمەن وينادى. 8 ويىن­نىڭ تورتەۋىندە جەڭىسكە جەتىپ، ءبىر ماتچتا تەڭ ويناپ، ءۇش ويىندا قارسىلاستارىنا جول بەرگەن تاجىكستان 13 ۇپايمەن ءوز توبىندا ەكىنشى ورىنعا تابان تىرەدى. بىراق كەلەسى ىرىكتەۋ ساتىسىنا وتە المادى.

بۇگىنگە دەيىن قازاقستان مەن تاجىكستان قۇ­رامالارى جاسىل الاڭدا ءتورت مارتە كەز­دەسىپ، ۇشەۋىندە جەرلەستەرىمىز جەڭىسكە جەتكەن. ءبىر ويىندا قارسىلاستاردىڭ كۇشتەرى تەڭ ءتۇستى. فيفا-نىڭ كۇنى كەشە جاڭارعان رەي­تينگى بويىنشا تاجىكستان قۇراماسى ءتورت ساتى جوعارىلاپ، 114-ورىنعا تۇراقتادى. ال قازاقستان قۇراماسى 5 ساتى تومەندەپ، 125-ورىنعا سىرعىدى. ياعني ءبىز رەيتينگتە تاجىك­ستاننان تومەن تۇرمىز.

ەستەرىڭىزگە سالا كەتەيىك، تالعات بايسۋ­فينوۆ شاكىرتتەرى 13 قاراشادا الەم چەمپيو­ناتىنىڭ ىرىكتەۋ كەزەڭى اياسىنداعى سوڭعى ويى­نىن سىرت الاڭدا فرانتسيامەن وتكىزەدى. بۇل – قازاقستان قۇراماسىنىڭ وسى جىلداعى سوڭعى رەسمي ماتچى.

 

 

ءتورت جاتتىعۋ بويىنشا فينالدا

جاپونيانىڭ كيتاكيۋسيۋ قالاسىندا ءوتىپ جاتقان سپورتتىق گيمناستيكادان الەم چەمپيوناتىندا قازاقستان كومانداسىنىڭ مۇشەلەرى ءتورت جاتتىعۋ بويىنشا فينالعا شىقتى.

 

ۇلتتىق وليمپيادا كوميتەتىنىڭ مالىمەتى بويىنشا، قازاقستان كومانداسىنىڭ ۇزدىگى ميلاد كاريمي كوپسايىس، گيمناستيكالىق كەرمە جانە ەركىن جاتتىعۋدان الەم چەمپيو­ناتىنىڭ فينالىنا ءوتتى. ول كوپسايىستا 80،706 ۇپاي جيناپ، ىرىكتەۋدە 16-ورىن يەلەندى. وسىلايشا، فينالعا شىققان 24 سپورت­شىنىڭ قاتارىنان كورىندى. سونداي-اق ميلاد گيمناستيكالىق كەرمەدەگى جاتتىعۋ بويىنشا 14،433 ۇپاي جيناپ، ىرىكتەۋدە ءۇشىنشى ناتيجە كور­سەتتى. بۇل جاتتىعۋدا 14،633 ۇپاي جيناعان جا­پوندىق داوكي حاشيميتو ءبىرىنشى، 14، 533 ۇپاي العان قىتايلىق حۋ حۋۆەي ەكىنشى ورىندا تۇر.

سونىمەن قاتار كاريمي ەركىن جاتتىعۋداعى ىرىكتەۋ سىنىندا 4-ورىن يەلەنىپ، فينالعا ءوتتى. ول 14،941 ۇپاي جيناپ، فيليپپين، يتاليا جانە جا­پونيا سپورتشىلارىنا عانا ەسە جىبەرگەن. في­نالعا شىققان سپورتشىلاردىڭ قاتارىندا نا­ريمان قۇربانوۆ تا بار. گيمناستيكالىق ات سناريادىندا 15،000 ۇپاي جيعان ناريمان التىنشى ناتيجەمەن فينالعا جولداما الدى. فينالدىق كەزەڭدەر 22، 23 جانە 24 قازانعا جوسپارلانعان.

 

 

وليمپيادا الاۋى – بەيجىڭدە

وليمپيا ويىندارىنىڭ الاۋى افي­نادان اق قار، كوك مۇز ۇستىندەگى ءتورت جىل­دىقتىڭ باستى دوداسىن قابىل­داي­تىن قىتاي استاناسى – بەيجىڭگە جەت­كىزىلدى.

 

وليمپيادا الاۋى الدىمەن بەيجىڭدەگى وليمپيادا مۇناراسىنا قويىلىپ، كەيىننەن قىتايدى ارالاپ شىعۋ ءۇشىن تۋرنەگە اتتانادى. الايدا فاكەلدىك ەستافەتا اۋقىمى كوروناۆيرۋسقا بايلانىستى قىسقارعان. 2022 جىلدىڭ 2-4 اقپانى ارالىعىندا قىتايدىڭ ءۇش قالاسى – بەيجىڭدە، يانتسيندە جانە چجان­تسزياكوۋدە 1200 الاۋگەردىڭ قاتىسۋىمەن ەستا­فەتانىڭ سوڭعى كەزەڭى ۇيىمداستىرىلادى. ال XXIV قىسقى وليمپيا ويىندارى 2022 جىل­دىڭ 4-20 اقپانى ارالىعىندا بەيجىڭدە وتەدى.

سوڭعى جاڭالىقتار

ۇقساس جاڭالىقتار