ءمينيستردىڭ ايتۋىنشا, جوبا قوعامنىڭ مادەني دەڭگەيىن, تالعامى جانە رۋحىن كوتەرىپ قانا قويماي, سونىمەن قاتار جاستارعا جاڭا مۇمكىندىكتەر اشىپ, ولاردىڭ ءتۇرلى باستاماسىنا جان-جاقتى قولداۋ كورسەتەدى. جوبانىڭ باسىم باعىتتارىنا جەكە توقتالعان ا.بالاەۆا بايانداماسىندا: «مازمۇنى جاعىنان بۇل ءمانى تەرەڭ, اۋقىمى وتە كەڭ جوبا. بۇل – عاسىرلار بويى قالىپتاسقان حالقىمىزدىڭ مادەني بولمىسى, تاريحى مەن تامىرى. قازىرگى جاھاندانۋ كەزەڭىندە ۇلتتىق قۇندىلىقتاردى ساقتاپ قالۋ, ونى ۇرپاق بويىنا ءسىڭىرۋدىڭ ماڭىزى وتە زور. ويتكەنى بۇگىنگى ۇرپاق بويىنا «ۇلتتىق كود» ۇعىمىن قانشالىقتى تەرەڭ سىڭىرسەك – بۇل ءبىزدىڭ ەرتەڭگى ۇلت بولىپ قالۋىمىزدىڭ كەپىلى بولىپ قالماق. وسى ماسەلەلەردى شەشۋ ءۇشىن جوبانى ءۇش نەگىزگى باعىتتا ىسكە اسىرۋ كوزدەلىپ وتىر», دەپ اتاپ ءوتتى.
ەلباسىنىڭ باعدارلامالىق ماقالاسىندا كورىنىس تاپقان «ۇلتتىق رۋحاني جاڭعىرۋ» جوباسىنىڭ ءبىرىنشى باعىتى – «رۋحاني جاڭعىرۋ» قۇندىلىقتارىن ودان ءارى ىلگەرىلەتۋ. بۇل جەردە مەملەكەتتىك ءتىلدى دامىتۋ مىندەتى بولەك بەلگىلەنگەن. جالپى, اتالعان بلوك بويىنشا 38 جوبا جوسپارلانسا, ولاردىڭ تۇپكى ماقساتى – ۇلتتىڭ شىعارماشىلىق جانە زياتكەرلىك الەۋەتىن قولداۋ جانە دامىتۋ. 2025 جىلعا
دەيىن حالىقتىڭ 88,5%-ىن «رۋحاني جاڭعىرۋ» باعدارلاماسىنىڭ جوبالارىمەن, مەكتەپ جاسىنداعى بالالاردى 100% مادەني تاربيەمەن قامتۋ, «وقيتىن ۇلت» جوباسى شەڭبەرىندە حالىقتىڭ وقىرمان بەلسەندىلىگىن 40%-عا دەيىن ارتتىرۋ, سونداي-اق مەتسەناتتار قاراجاتى ەسەبىنەن 3000 نىسان سالۋ جانە جوندەۋ جوسپارلانعان.
ەكىنشى باعىت «ەل رۋحى» دەپ اتالادى. مۇندا مادەنيەت سالاسىنداعى قىزمەتتەردىڭ قولجەتىمدىلىگىن ارتتىرۋ, سونداي-اق وتاندىق مادەني ونىمدەردى, ونىڭ ىشىندە شەتەلدەردە ىلگەرىلەتۋ جونىندەگى ءىس-شارالار كەشەنى بىرىكتىرىلگەن. بۇل ءۇشىن 2025 جىلعا قاراي 13 ءىرى ءىس-شارا وتكىزۋ, 5 ناقتى ناتيجەگە قول جەتكىزۋ كوزدەلگەن. اتاپ ايتقاندا, ينفراقۇرىلىمدى دامىتۋ, ونىڭ ىشىندە جاڭا مادەني وبەكتىلەر سالۋ ارقىلى اۋىل جانە شالعايداعى ەلدى مەكەندەر تۇرعىندارىنىڭ 92,5%-ى مادەنيەت سالاسى قىزمەتتەرىمەن قامتۋ قامتاماسىز ەتىلەتىن بولادى. ءمينيستردىڭ مالىمدەۋىنشە, جوبا اياسىندا حالىقتىڭ مادەنيەت نىساندارىنا بارۋ كورسەتكىشىن ەكى ەسەگە كوبەيتۋ جوسپارلانعان. سونداي-اق مادەنيەت سالاسىنداعى قىزمەتتەر ساپاسىن ارتتىرۋعا دا ەرەكشە ءمان بەرىلىپ وتىر. «وسى ماقساتتار ءۇشىن 250 جاڭا مادەنيەت نىسانى سالىنادى جانە جۇمىس ىستەپ تۇرعان 1200 مادەنيەت نىسانى كۇردەلى جوندەۋدەن وتەدى. ەلىمىزدىڭ شىعارماشىلىق الەۋەتىن تىكەلەي قولداۋ ارقىلى وتاندىق مادەني ونىمدەردى ءوندىرۋ جۇيەسى قۇرىلادى, ونىڭ ىشىندە كينوپروكاتتاعى وتاندىق فيلمدەردىڭ ۇلەسى 25 پايىزعا دەيىن ارتتىرىلادى. جاڭادان قۇرىلاتىن «قازاقانيماتسيا» شىعارماشىلىق بىرلەستىگى بازاسىندا 40-قا جۋىق انيماتسيالىق فيلم شىعارىلادى», دەگەن ۆەدومستۆو باسشىسى بولاشاعىنان ۇلكەن ءۇمىت كۇتتىرىپ وتىرعان تالانتتاردىڭ 150 جوباسىنا قولداۋ كورسەتىلەتىنىن دە ايتىپ ءوتتى.
بريفينگتە وتاندىق مادەنيەتتىڭ بارلىق جەتىستىگىمەن ونلاين رەجىمدە تانىسۋعا مۇمكىندىك بەرەتىن e-culture.kz بىرىڭعاي ەلەكتروندى پلاتفورماسى جايلى جان-جاقتى ءتۇسىندىرىپ بەرگەن ا.بالاەۆا مەملەكەتتىك ءتىلدىڭ قولدانۋ اياسىن كەڭەيتۋ – جوباداعى ماڭىزدى مىندەتتىڭ ءبىرى ەكەنىنە ەرەكشە توقتالدى. «ويتكەنى «ۇلتتى ساقتاۋ» دەگەنىمىزدىڭ ءوزى – ءتىلدى ساقتاپ, دامىتۋ ەكەنى بەلگىلى. مەملەكەت باسشىسى قازاق ءتىلىنىڭ بولاشاقتا – ۇلتارالىق تىلگە اينالاتىنىنا سەنىم بىلدىرگەنىن بىلەسىزدەر. وعان بۇگىندە بارلىق نەگىز بار. مەملەكەتتىك تىلگە دەگەن قوعامنىڭ سۇرانىسى ارتىپ كەلەدى. بۇل – ۋاقىت تالابى. سوندىقتان بۇل ماسەلەدە بىرقاتار اۋقىمدى جوبا قاراستىرىلىپ وتىر. اتاپ ايتقاندا, مەملەكەتتىك ءتىلدى وقىتۋ بويىنشا يننوۆاتسيالىق ءىت ونىمدەر ازىرلەۋ, تانىمال انيماتسيالىق جانە تانىمدىق ارنالاردى قازاقشالاۋ, ورتا ءبىلىم بەرۋدىڭ تىلگە قاتىستى باعدارلامالارىنا وزگەرىستەر ەنگىزۋ, تەحنيكالىق جانە كاسىپتىك ءبىلىم بەرۋ ۇيىمدارى ءۇشىن قازاق تىلىندەگى وقۋلىقتار ازىرلەۋ سياقتى جۇيەلى ءىس-شارالار بار», دەدى مينيسترلىك باسشىسى. ءبىر سوزبەن ايتقاندا, «ۇلتتىق رۋحاني جاڭعىرۋدىڭ» باستى كوزدەگەنى – قوعامداعى قازاقتىلدى ورتانى بارىنشا كەڭەيتۋ, ونى تۇرمىستا عانا ەمەس, عىلىم مەن ءبىلىمنىڭ, بيزنەس پەن الەۋمەتتىڭ تىلىنە اينالدىرۋ.
سونداي-اق بريفينگ بارىسىندا مادەنيەت جانە سپورت ۆيتسە-ءمينيسترى نۇرعيسا داۋەشوۆ ۇلتتىق جوبا اياسىندا 20 ءىس-شارا ۇيىمداستىرىلاتىنىن حابارلاسا, ءبىلىم جانە عىلىم مينيسترلىگى ءتىل ساياساتى كوميتەتىنىڭ توراعاسى ادىلبەك قاباەۆ الداعى ۋاقىتتا «قازاق ءتىلى» مەن «قازاق ادەبيەتى» پاندەرىنىڭ بولەك وقىتىلاتىنىن مالىمدەدى.
