الەمدىك ارحيۆ عىلىمىنىڭ جەتىستىكتەرى جان-جاقتى ءسوز بولعان حالىقارالىق كونفەرەنتسيادا ەكونوميكا مەن قوعامنىڭ تەحنولوگيالىق جاڭعىرۋىنىڭ تاجىريبەلەرى, تسيفرلى تەحنولوگيالاردى بەلسەندى ەنگىزۋ ماسەلەلەرى دە كۇن تارتىبىنە شىعارىلدى. جيىنعا قاتىسۋشىلار سونداي-اق ارحيۆتەر قىزمەتىنىڭ جاڭا مازمۇنىن ەسكەرە وتىرىپ, الداعى ۋاقىتتا ارحيۆ ءىسىن دامىتۋ جايلى وي-پىكىرلەرىن ورتاعا سالدى. قوعامدىق سانانى جاڭعىرتۋداعى ارحيۆتەردىڭ ءرولى, بۇگىنگى ارحيۆ سالاسىنىڭ جاعدايى دا نازاردان تىس قالمادى. كونفەرەنتسيادا قازاقستان رەسپۋبليكاسى ۇلتتىق ارحيۆ قورىنىڭ قۇجاتتارىنىڭ ساقتالۋى جانە ولاردىڭ قولجەتىمدىلىگىن قامتاماسىز ەتۋ ماسەلەلەرى كەڭىنەن ءسوز بولدى.
پرەزيدەنت كەڭسەسىنىڭ باسشىسى نۇرلان ونجانوۆ قۇتتىقتاۋ سوزىندە كونفەرەنتسيانىڭ العاش رەت ونلاين فورماتتا ۇيىمداستىرىلىپ وتىرعانىن ايتا كەلىپ, مۇنداي الاڭنىڭ ارحيۆ ءىسىنىڭ ەلىمىزدىڭ ءتۇرلى وڭىرلەرى مەن بەلارۋس, قىتاي, قىرعىزستان, پولشا, رەسەي جانە وزبەكستاننان كەلگەن كاسىبي مامانداردىڭ باسىن بىرىكتىرۋگە مۇمكىندىك بەرگەنىن دە العا تارتتى. ارحيۆ سالاسىن دامىتۋدىڭ وزەكتى ماسەلەلەرىن تالقىلاۋدا جيىننىڭ ماڭىزدىلىعى مەن قاجەتتىلىگىن اتاپ كورسەتكەن ن.ونجانوۆ: «تولىق تسيفرلاندىرۋ – قازىرگى تاڭدا الەمدە باسەكەگە قابىلەتتىلىكتىڭ باستى فاكتورلارىنىڭ ءبىرى. مۇنى پرەزيدەنت قاسىم-جومارت توقاەۆ سوڭعى جولداۋىندا دا ەرەكشە اتاپ ءوتتى. سوندىقتان جاھاندىق اقپاراتتاندىرۋ داۋىرىندە كونفەرەنتسيانىڭ كۇن تارتىبىندە كوتەرىلىپ وتىرعان ماسەلەلەرى ەرەكشە مانگە يە», دەدى. ال قازاقستان, قىرعىزستان, پولشا, رەسەي, وزبەكستان جانە فينليانديانىڭ عالىمدارى مەن تاجىريبەلى ماماندارى قاتىسقان كونفەرەنتسيادا «ححI عاسىرداعى ارحيۆ ءىسى: ءداستۇر جانە دامىتۋ باعىتتارى», «ارحيۆتەر جانە قوعام: تاريحي جادىنى ساقتاۋداعى ارەكەتتەستىك», «ارحيۆتىك ءبىلىم: كادرلاردى دايارلاۋ ماسەلەلەرى» تاقىرىپتارى قىزۋ تالقىلاندى.
