بۇل تۋرالى اتالعان كومپانيانىڭ ءباسپاسوز قىزمەتى حابارلادى. مۇنىڭ نەگىزگى ماقساتى – ۋراندى ۇزاقمەرزىمدى ينۆەستيتسيا رەتىندە ساقتاۋ, ونىڭ باستاپقى ساتىپ الۋى قور قۇرىلتايشىلارىنىڭ 50 ملن دوللار مولشەرىندەگى بىرلەسكەن ينۆەستيتسيالار ەسەبىنەن جۇزەگە اسىرىلادى. قوردىڭ ينۆەستورلارى «قازاتومونەركاسىپ» (48,5%), «قازاقستان ۇلتتىق بانكىنىڭ ۇلتتىق ينۆەستيتسيالىق كورپوراتسياسى» اق (48,5%) جانە 3%-دى يەلەنەتىن Genchi Global Limited («قور مەنەدجەرى») سانالادى.
قوردىڭ وپەراتسيالىق قىزمەتى باستالعاننان كەيىن ونى دامىتۋدىڭ ەكىنشى كەزەڭى شەڭبەرىندە ۋراننىڭ قوسىمشا كولەمىن ساتىپ الۋ ماقساتىندا جاريا نەمەسە جەكە ورنالاستىرۋ ارقىلى 500 ملن دوللار كولەمىندەگى ينۆەستيتسيانى ينستيتۋتسيونالدى نەمەسە جەكە ينۆەستورلاردان تارتۋ كوزدەلەدى. بۇل رەتتە ورنالاستىرۋ پارامەترلەرى مەن مەرزىمدەرى نارىقتىق شارتتارمەن ايقىندالادى.
«قور «قازاتومونەركاسىپتىڭ» ۋران نارىعىنداعى تاجىريبەسىن جانە «ۇلتتىق ينۆەستيتسيالىق كورپوراتسياسىنىڭ» سەنىمدى ينۆەستيتسيالىق تاريحىن بىرىكتىرىپ, احقو قۇرالدارى ارقىلى ينۆەستورلارعا ۋران نارىعى مەن اتوم ونەركاسىبىنىڭ تارتىمدى ۇزاقمەرزىمدى ىرگەلى مۇمكىندىكتەرىنە تىكەلەي قول جەتكىزۋگە جول اشادى. كومپانيا بارلىق مۇددەلى تاراپ ءۇشىن ۇزاقمەرزىمدى نارىقتىق قۇندىلىقتى قۇرۋعا باعىتتالعان كەڭەيتىلگەن ستراتەگياسى شەڭبەرىندە ANU Energy جوباسى بويىنشا ءتورت جىلداي جۇمىس ىستەگەن بولاتىن. ال قوردىڭ ۋران نارىعىندا قىسقارىپ بارا جاتقان ۇسىنىس جاعدايىندا قۇرىلۋى بارلىق ستەيكحولدەرگە (مۇددەلى تاراپقا) ەلەۋلى پايدا اكەلەدى», دەدى «قازاتومونەركاسىپتىڭ» باسقارما توراعاسى ءماجيت ءشارىپوۆ.
تازا ەنەرگيا كوزدەرىنە, ونىڭ ىشىندە تومەن كومىرتەكتى جانە مينيمالدى كليماتتىق اسەرگە يە اتوم ەنەرگەتيكاسىنا الەم ەلدەرىنىڭ نازار اۋدارۋى ۋران ونەركاسىبى ءۇشىن سەنىمدى كەپىل سانالادى. الايدا سوڭعى ۋاقىتتا حالىقارالىق جانە ايماقتىق ينۆەستورلار تاراپىنان قىزىعۋشىلىقتىڭ ارتۋىنا قاراماستان تابيعي ۋرانعا قول جەتكىزۋ ەكى ۋران قورىمەن شەكتەلگەن بولاتىن. بۇلار – كاناداداعى تورونتو قور بيرجاسى جانە لوندونداعى AIM Exchange (لوندون قور بيرجاسىنىڭ بولىگى) قور بيرجاسى.
احقو الاڭىندا قۇرىلعان ANU Energy قورى دامۋشى نارىقتارعا ينۆەستيتسيالارىن باعىتتايتىن, اسىرەسە ەكولوگيا, الەۋمەتتىك جاۋاپكەرشىلىك جانە كورپوراتيۆتىك باسقارۋ (ESG) ماسەلەرىنە جانە تازا ەنەرگياعا نازار اۋداراتىن ينۆەستورلاردىڭ ءارتۇرلى ساناتتارىنا, سونداي-اق شيكىزات قورلارىنا, تاۋەلسىز قورلارعا جانە مەملەكەتتىك كاسىپورىندارعا تىكەلەي قولجەتىمدىلىكتى قامتاماسىز ەتەتىن العاشقى ۋران قورىنا اينالادى دەگەن سەنىم باسىم.
