رۋحانيات • 20 قازان، 2021

اقىل الىبى

146 رەت كورسەتىلدى

ادامزاتتىڭ الىبى كىم دەسە، قازاق ويلانباي «اباي» دەيتىنى انىق. ويتكەنى ونىڭ ءشولىن باسقان كاۋسار بۇلاعى، تىنىسىن اشقان جۇپار اۋاسى، جىلىنار جالىن وتى، تۋرا جولدى كورسەتەتىن باعدارشامى، بوي تۇزەر قۇبىلاناماسى – سول الىپ اقىن. دانالىقتىڭ دارياسىنا ءبىر شومىلىپ شىقساڭىز، ءسىزدىڭ عۇمىرىڭىزعا تاتيتىن يگىلىك ءوزى-اق ىزدەپ كەلەدى. سۋرەتشى قۋانىش ەسىركەەۆتىڭ «اباي» كارتيناسى وسىنى مەڭزەپ تۇرعانداي.

ۇلى ابايدىڭ بەينەسىن اركىم ءارتۇرلى كورەدى، ءارتۇرلى سەزىنەدى. مۇندا تەك ونىڭ سىرت­قى قالىبىنا ەمەس، ىشكى جان-دەرتىنە دەگەن كوزقاراس جاتىر. اقىننىڭ بەكزادا بولمىسىن جازۋ-بەينەلەۋ ونەرىنە عۇمىرىن ارناعان ءاربىر سۋرەتشىنىڭ اسقاق ارمانى. سودان دا بولار، ۇلى تۇلعانىڭ دارالىعى مەن جان-جاقتىلىعىن سيپاتتايتىن كوپتەگەن كارتينا جازىلىپ، مۇ­سىندىك جانە گرافيكالىق كومپوزيتسيالار جاسالدى. ءالى دە ۇلكەن شىعارمالار ومىرگە كەلەتىنى داۋ­سىز. ءبىز بۇگىن سونىڭ بىرىنە توقتالىپ وتىرمىز.

حاكىمنىڭ ءومىرى مەن ونەگەسى قاراعاندىلىق سۋرەتشىسى قۋانىش ەسىركەەۆتىڭ شىعارما­شىلىعىنا ارقاۋ بولىپتى. سۋرەتشى ادەت­تەگى كوشىرمە پورترەتتەردەن وزگەرەك، نا­قىشى بولەك پورترەت جازعان. اۆتور كەيىپكەرىن ءوز قيالىنىڭ جەلىسىمەن باسقا دەڭگەيگە كوتەرگەن.

بۇل جەردە شىعارماشىلىق شابىتتىڭ قارقىندى پروتسەسىن انىق بايقايمىز. قارا­ڭىزشى، كوركەم پورترەت-مەتافورا گرافيكالىق تۇردە ورىندالعان. قولىندا قالام مەن قاعاز پاراعىن ۇستاعان قازاقتىڭ ۇلى ويشىلى ويعا باتىپ وتىر. سۋرەتشى فونداردى ادەيى بولشەكتەپ، ءپىشىندى كۇشەيتەدى. كەسكىندەمەنىڭ ءاربىر شەتى ءوزىنىڭ رەڭكىمەن بەلگىلەنگەن. كولدەنەڭ سىزىقتار قاتاڭ ۆەرتيكالدارعا قاراما-قايشى كەلەدى. بۇل دا – قىزىق شەشىم.

قىلقالام يەسى قانىق جانە قويۋ تۇستەردى قولدانا وتىرىپ كومپوزيتسياداعى شيەلەنىس پەن اۋىر سەزىمدى ارتتىرادى. ۇلى ابايدىڭ ار­تىنداعى ەكى بولىكتەن تۇراتىن فون شىنايى الەم مەن (وڭ جاقتا جاسىل-كوك تۇستەگى دالا كورىنىسى) شىعارماشىلىق كەڭىستىكتى (سول جاق­تا كۇرەڭ قىزىل تۇستە) كورسەتەدى. بۇل – اقىل الى­بىنىڭ شىعارماشىلىق ىزدەنىس كەزىندەگى كەيپى. جانارىنا ۇيالاعان ىزگىلىكتى قاعازعا قۇيىپ وتىر.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

دوللار قىمباتتاپ بارادى

قارجى • بۇگىن، 11:20

ۇقساس جاڭالىقتار