سپورت • 20 قازان، 2021

باپكەر اۋىستىراتىن ۋاقىت كەلدى

98 رەت كورسەتىلدى

جاقىندا قازاقستان قۇراماسىنىڭ بالۋاندارى كەزەكتى رەت الەم بىرىنشىلىگىنەن التىن مەدالسىز قايتتى. سوناۋ 1999 جىلدان بەرى جاھاندىق جارىستىڭ باس جۇلدەسىنە جەتە الماي جۇرگەن بالۋاندارىمىزدىڭ جەڭىلىستەرىنە، وكىنىشكە قاراي، ەتىمىز ۇيرەنە باستادى.

وسىدان ءۇش جىل بۇرىن الەم بىرىنشىلىگى نۇر-سۇلتاندا ۇيىمداستىرىلعان كەزدە بالۋاندارىمىزدان كەمى ءبىر التىن مەدال كۇتىپ ەدىك. ءوز ەلىمىزدە، ءوز جەرىمىزدە، ميلليونداعان جانكۇيەردىڭ الدىندا با­لۋاندارىمىز بارىن سالاتىن شىعار دەدىك. جوق، ول كەزدە دە ءۇمىتىمىز اقتالمادى. جىگەرىمىز قۇم بولدى. التىن بىتكەننىڭ ءبارىن رەسەي، يران، جاپونيا، گرۋزيا بالۋاندارى سىپىرىپ اكەتتى. قازاققا بۇيىرماعان التىن مەدال سول كەزدە قىرعىز باۋىرلارعا بۇيىردى.

پ

قىرعىز دەمەكشى، وسى الەم چەمپيوناتىندا قىرعىزستان بالۋاندارى ايدى اسپانعا شىعارىپ، 2 التىن، 2 كۇمىس، 2 قولا مەدال الدى. ولار مۇنداي جەتىستىككە الەم چەمپيوناتىنىڭ تاريحىندا تۇڭعىش رەت قول جەتكىزدى. ال بىزدەر ءجاميلا باقبەرگەنوۆا مەن المات كەبىسباەۆتىڭ جۇلدەسىنە شۇكىر دەستىك. باسقا نە دەيمىز؟!

قوش، سونىمەن وسلوداعى الەم چەمپيو­ناتىنا ورالايىق. جارىستىڭ العاشقى كۇنى بوزكىلەمگە ەركىن كۇرەس شەبەرلەرى شىقتى. اسەت سەرىكباەۆ باپتايتىن با­لۋاندارىمىز سوڭعى جىلدارى جاپ-جاقسى ناتيجە كورسەتىپ جۇرگەندىكتەن بە، جۇلدە بولادى-اۋ دەپ توپشىلاعان ەدىك. الايدا بالۋاندارىمىز شەتىنەن قيراپ قالدى. ادلان اسقاروۆ پەن نۇرقوجا قايپانوۆتى، الىشەر ەرعالي مەن ازامات داۋلەتبەكوۆتى مۇلدە تاني المادىق. سوڭعىسى قولا مەدال ءۇشىن كۇرەسىپ ەدى، بىراق بەسىنشى ورىننان اسپادى.

ە

قىزدار كۇرەسىندە 72 كگ سالماقتا كۇرەسكەن ءجاميلا باقبەرگەنوۆانىڭ جەتىستىگىن باس بارماقپەن باعالاۋعا بولادى. ول وسى جەڭىسىنە (كۇمىس مەدالدىڭ ءوزى ءبىز ءۇشىن جەڭىس) جىگەرىنىڭ، قايتپاس-قايسار مىنەزىنىڭ ارقاسىندا جەتتى. شيرەك جانە جارتىلاي فينالدىق بەلدەسۋلەردە ول جەڭىستى ج ۇلىپ اكەتىپ وتىردى. وكىنىشكە قاراي، فينالدىق بەلدەسۋدە جاپونيا بالۋانى ءبىزدىڭ قىزدى ابدەن زەرتتەپتى. التى مينۋت بويى جاپون قىزى تەك قورعانۋمەن ءجۇردى. ادەتتە جاپونيالىقتار قارسىلاستارىن اتويلاپ ءجۇرىپ ۇتاتىن. جاميلامەن اشىق ايقاسقا بارسا، جازا باساتىنىن باپكەرلەرى دە، بالۋاننىڭ ءوزى دە سەزدى.  باقبەرگەنوۆا ء«ا» دەگەننەن ءادىس جاساۋعا تالپىنعان ەدى. بىراق ونىسىنان ەشتەڭە شىقپادى. كەرىسىنشە، ءۇش ۇپايدى قارسىلاسىنا بەرىپ قويدى. جاپون قىزى ءجاميلانىڭ ءاربىر قيمىلىن اڭدىپ، قارىمتاسىن قايتارۋعا دايىن تۇردى. ءبىزدىڭ قىز دا جاسقاندى ما، ايتەۋىر تاۋەكەلگە بارا المادى.

گرەك-ريم كۇرەسىندە قورجىنىمىزعا جالعىز قولا مەدال سالعان المات كەبىسباەۆقا العىستان باسقا ايتارىمىز جوق. ول وسىمەن الەم چەمپيوناتىنداعى بەسىنشى جۇلدەسىن الدى. 2010 جىلى قولا مەدالمەن قايتسا، 2011 جىلى فينالدا ۇتىلىپ، كۇمىس مەدالدى قاناعات تۇتتى. ودان بەرى ءۇش بىردەي الەم چەمپيوناتىندا ۇزدىك ۇشتىكتى تۇيىندەدى. الەم نەمەسە وليمپيادا چەمپيونى دەگەن اتاعى جوق دەمەسەڭىز، ءدال قازىر الەمدە الماتتاي كۇرەسەتىن بالۋان كەمدە-كەم.

الماتتىڭ شيرەك فينالداعى نورۆەگيا بالۋانىمەن بولعان بەلدەسۋى وتە قيىنعا سوقتى. تورەشىلەردىڭ دە كىلەم قوجايىنىنا «بۇيرەگى بۇرعانى» انىق اڭعارىلدى. بىراق وعان كونەتىن كەبىسباەۆ پا؟ جارتىلاي فينالدا كەزدەسكەن رەسەيلىك بالۋان دا الماتقا قارسى تاس-ءتۇيىن شىققانى بىردەن بايقالدى. اسىرەسە ءبىزدىڭ جىگىتتىڭ قۇرىعىنا ءتۇسىپ، ەندى بولماعاندا تازا جەڭىلەيىن دەپ تۇرعان جەردەن وتە ادەمى سىتىلىپ شىقتى. قولا مەدال ءۇشىن بولعان بەلدەسۋدە كەبىسباەۆ تۇرىك بالۋانىن جەڭدى.       

جالپى، سوڭعى جىلدارى الماتتىڭ ارداگەر بالۋان ەكەنى، جاستارعا ورىن بوساتۋ كەرەكتىگى كوپ ايتىلىپ ءجۇر. بىراق ول جاستارعا قاراعاندا تاجىريبەسى مول، الەمدىك دەڭگەيدە ءالى دە بولسا كۇرەسە الاتىنىن وسى الەم چەمپيوناتىندا تاعى ءبىر مارتە كورسەتتى. ەلىمىزدە الماتتى جەڭەتىن بالۋان جوق ەمەس، بار. بىراق ءدال سول سياقتى كۇرەسەتىن بالۋان جوقتىڭ قاسى.

تاياۋدا قازاقستان كۇرەس فەدەرا­تسيا­سىنىڭ باسشىلىق قىزمەتىنە ەرلان قوجاسباي كەلدى. ول بۇعان دەيىن ەركىن كۇرەس بويىنشا فەدەراتسيانىڭ ۆيتسە-پرە­زيدەنتى قىزمەتىن اتقارعان. ەندى جاڭادان تاعايىندالعان پرەزيدەنت جاڭالىق اكەلە مە؟ ەگەر كۇرەس سالاسىندا ناتيجە شىعارامىن دەسە، جاڭا پرەزيدەنت ەڭ الدىمەن باپكەرلەر ماسەلەسىنە باسا نازار اۋدارۋى ءتيىس. اسىرەسە گرەك-ريم كۇرەسى مەن ايەلدەر كۇرەسىندە باپكەر اۋىستىراتىن ۋاقىت جەتكەنى انىق. ءبىزدىڭ باپكەرلەردە قارسىلاستاردى زەرتتەۋ، بالۋانداردى جى­گەرلەندىرۋ، ءاربىر ءادىستى سوڭىنا دەيىن جەتكىزە ورىنداتۋ، سوڭىنا دەيىن كۇرەستىرۋ دەگەن اتىمەن جوق. ەگەر بولسا، جيىرما ەكى جىل بويى التىن كۇتىپ، زارىعىپ جۇرمەس ەدىك.

گرەك-ريم كۇرەسىندە بالۋاندارعا باس بولىپ جۇرگەن باقتيار بايسەيىتوۆتىڭ بالۋاندىعىنا قارسى ەشتەڭە ايتا المايمىز. بىراق باپكەرلىك ۇعىم – مۇلدە بولەك الەم، تۇنىپ تۇرعان عىلىم. سول سياقتى ايەلدەر كۇرەسىنە دە وزگەرىس قاجەت. الەم چەمپيوناتىندا العان جالعىز جۇلدەنى جەلەۋ ەتۋگە بولمايدى.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار