قازاقستان • 20 قازان، 2021

24 جىل بۇرىن اقمولانى ەل استاناسى دەپ جاريالاۋ تۋرالى جارلىققا قول قويىلدى

60 رەت كورسەتىلدى

24 جىل بۇرىن، 1997 جىلعى 20 قازاندا قازاقستاننىڭ تۇڭعىش پرەزيدەنتى نۇرسۇلتان نازارباەۆ اقمولانى رەسپۋبليكانىڭ استاناسى دەپ جاريالاۋ تۋرالى جارلىققا قول قويدى، دەپ حابارلايدى Egemen.kz قالا اكىمدىگىنىڭ سايتىنا سىلتەمە جاساپ.

بۇل تاريحي قۇجات وسىنداي قىسقا مەرزىم ىشىندە ءوزىن الەمدىك ارەنادا گەوساياسي، الەۋمەتتىك-ەكونوميكالىق، مادەني ۇدەرىستەردىڭ گۇلدەنگەن ورتالىعى رەتىندە جاريالاعان شاعىن قالاشىقتىڭ وركەندەگەن مەگاپوليسكە اينالۋىنا جول اشتى، دەپ حابارلايدى قالا اكىمدىگىنىڭ رەسمي سايتى.

رەسمي تۇردە اقمولا قالاسى 1997 جىلدىڭ 10 جەلتوقسانىندا قازاقستاننىڭ استاناسى بولدى. ال 1998 جىلدىڭ ماۋسىم ايىندا ەلىمىزدىڭ جاڭا استاناسىنىڭ رەسمي تۇساۋكەسەرى ءوتتى.

نۇرسۇلتان نازارباەۆتىڭ 2005 جىلى جارىق كورگەن «ەۋرازيا جۇرەگىندە» اتتى كىتابىندا ەلباسى استانانى كوشىرۋ جانە ەلدىڭ باس قالاسى رەتىندە اقمولانى تاڭداۋ سەبەپتەرى تۋرالى اڭگىمەلەدى.

گ

«جاڭا استانانى ىرىكتەۋدىڭ بارلىق كريتەريى نەگىزىندە تاۋەلسىز قازاقستاننىڭ اكىمشىلىك جانە ساياسي ورتالىعىن اقمولا قالاسىنا ورنالاستىرۋ مۇمكىندىگى باسىم بولدى. 1994 جىلعى شىلدەدە ەلوردانى 1000 شاقىرىمنان استام سولتۇستىككە، دالالى اقمولاعا اۋىستىرۋ تۋرالى شەشىم قابىلداندى... اقمولا قازاقستاننىڭ گەوگرافيالىق ورتالىعىنا، قازاقستان ەكونوميكاسىنىڭ جەتەكشى جانە قارقىندى ءوسۋ نۇكتەلەرى بولىپ سانالاتىن ماڭىزدى شارۋاشىلىق وڭىرلەرىنە جاقىن ورنالاسقان. قالا ءىرى كولىك ماگيسترالدارىنىڭ قيىلىسىندا ورنالاسقان جانە وسىعان بايلانىستى ەلىمىزدىڭ بارلىق وڭىرىمەن بايلانىسقان. سونىمەن قاتار، قالا قازاقستان ءۇشىن كوپتەگەن شەت ەلدەرگە شىعۋدىڭ ەڭ وڭاي جولى بولىپ سانالاتىن ترانسەۋرازيالىق ماگيسترالداردىڭ جانىندا ورنالاسقان»، - دەلىنگەن كىتاپتا.

ەلباسىنىڭ اقپاراتى بويىنشا، ەلوردانى كوشىرۋ تۋرالى شەشىم قابىلدانعان ساتتە اقمولا تۇرعىندارىنىڭ سانى 290 مىڭ ادام بولاتىن. وسى جىلدار ىشىندە ءوسىم ميلليونعا جۋىق بولدى، ال قازىرگى نۇر-سۇلتاندا 1 ملن 200 مىڭنان استام ازامات تۇرادى.

ەلباسى اتاپ وتكەندەي، جاڭا ەلوردا ەلىمىزدىڭ بارلىق وڭىرىنە تىنىس بەرىپ، حالقىمىزدىڭ ۇلتتىق رۋحىن كوتەردى.

«جاڭا قالانىڭ، ونىڭ جاڭا قۇرىلىسىنىڭ، جايلاستىرىلعان كوشەلەردىڭ، الاڭداردىڭ، سكۆەرلەر مەن ساياباقتاردىڭ كوز الدىمىزدا بولىپ جاتقان قارقىندى وزگەرىستەرى قالا قوناقتارىنىڭ – بۇرىن تسەلينوگراد جانە اقمولامەن تانىس بولعانداردىڭ، جانە بىزگە العاش رەت كەلگەندەردىڭ دە شىنايى تاڭدانىسىن تۋدىرادى. استانا – قازاقستاننىڭ جاڭارۋىنىڭ سيمۆولى، ونىڭ كوپۇلتتى حالقىنىڭ سارقىلماس جاسامپاز ەنەرگياسىنىڭ سيمۆولى. بۇل جاڭا استانانى سالۋ ءۇشىن ەڭ قيىن ۋاقىتتا باستالعان حالىقتىڭ سەنىمى. بۇل بوستاندىققا قول جەتكىزگەن ۇلتتىڭ ءوزىنىڭ گۇلدەنگەن بولاشاعىنا، ۇرپاقتارىنىڭ بولاشاعىنا دەگەن ءۇمىتى مەن سەنىمدىلىگىنىڭ سيمۆولى. قازاقستاننىڭ جاڭا استاناعا يە بولۋى – ويلاۋ مەن زەرتتەۋ ىزدەنىستەرى ءۇشىن مول تاماق بەرەتىن ەرەكشە، كوپ ولشەمدى جانە جەتكىلىكتى ۇزاق تاريح»، – دەپ جازدى نۇرسۇلتان نازارباەۆ ءوز كىتابىندا.

1999 جىلى يۋنەسكو شەشىمىمەن قازاقستاننىڭ جاڭا استاناسى «الەم قالاسى» اتاعىنا يە بولدى.

بۇگىندە ەلباسىنىڭ تاريحي جانە تاعدىرشەشتى جوباسى بولىپ سانالاتىن نۇر-سۇلتان قالاسى – الەمدەگى ەڭ جاس استانا جانە ورتالىق ازياداعى ەڭ جىلدام دامىپ كەلە جاتقان قالا.

جىل سايىن قالادا تۇرعىن ءۇي، الەۋمەتتىك ينفراقۇرىلىم قۇرىلىسىنىڭ قارقىنى ارتىپ كەلەدى. «Nur Otan» پارتياسىنىڭ سايلاۋالدى باعدارلاماسىن ىسكە اسىرۋ اياسىندا 2025 جىلعا دەيىن ەلوردادا 50 مىڭ الەۋمەتتىك پاتەر، ءبىلىم بەرۋ، مەديتسينا، سپورت جانە ت.ب. نىساندار سالۋ جوسپارلانعان.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار