سكا-نى دا بۋلليتتە ءسۇرىندىردى
قۇرلىقتىق حوككەي ليگاسىندا (قحل) ونەر كورسەتىپ جۇرگەن نۇر-سۇلتاننىڭ «بارىسى» سىرت ايدىنداعى كەزەكتى تۋر ويىنىن سانكت-پەتەربۋرگتىڭ سكا ۇجىمىمەن وتكىزىپ, قاتارىنان ەكىنشى جەڭىسىنە قول جەتكىزدى.
بىرەر كۇن بۇرىن قىتايدىڭ «كۋنلۋن رەد ستار» كلۋبىنان شايبالى حوككەيدەگى پەنالتيدەن باسىم تۇسكەن جەرلەستەرىمىز كەشەگى ويىندا دا سول ەرلىكتەرىن قايتالادى. سانكت-پەتەربۋرگتەگى «مۇز سارايىندا» 3500-گە جۋىق جانكۇيەردىڭ قولداۋىمەن وتكەن ماتچتىڭ نەگىزگى ۋاقىتى 3:3 ەسەبىمەن تەڭ اياقتالدى. العاشقى كەزەڭدى ءتاۋىر باستاعان جەرلەستەرىمىز كەزدەسۋدىڭ 6-مينۋتىندا ەسەپ اشتى. داررەن ديتستەن پاس العان كيريلل ساۆيتسكي قحل-داعى العاشقى گولىن سوقتى.
ەكىنشى كەزەڭدە مۇزايدىنعا جينالعان كورەرمەندەر بەس گولدىڭ كۋاسى بولدى. سكا قۇرامىنان ۆالەنتين زىكوۆ, انتون بۋرداسوۆ جانە ەميل گاليموۆ مەرگەندىگىمەن كوزگە تۇسسە, «بارىس» ساپىنان نيكيتا ميحايليس پەن رومان ستارچەنكو ءبىر-ءبىر گول سوقتى. ءۇشىنشى كەزەڭدە تابلوداعى ەسەپ وزگەرىسسىز قالىپ, كەزدەسۋ وۆەرتايمعا ۇلاستى. بۇل كەزەڭدە دە جەڭىمپاز انىقتالماعان سوڭ, حوككەيشىلەر بۋلليت سەرياسىندا باق سىنادى. وندا قارسىلاستارىنا قاراعاندا, دالدىك تانىتقان «بارىس» ويىنشىلارى جەڭىسكە جەتتى. ەندى جەرلەستەرىمىز بۇگىن مينسكىدە «دينامومەن» كەزدەسەدى.
قازاقستان – ۇزدىك تورتتىكتە
ەۋروپا فۋتبول قاۋىمداستىعىنىڭ وداعى (ۋەفا) فۋتزالدان ۇلتتىق قۇرامالاردىڭ جاڭارتىلعان رەيتينگىن جاريالادى.
ۇزدىكتەر كوشىن جەتى دۇركىن الەم بىرىنشىلىگىنىڭ جەڭىمپازى, ەكى مارتە ەۋروپا چەمپيونى اتانعان يسپانيا قۇراماسى باستاپ تۇر. ەكىنشى ورىنعا رەسەي قۇراماسى جايعاسقان بولسا, جۋىردا عانا ليتۆادا وتكەن الەم چەمپيوناتىندا توپ جارعان پورتۋگاليا رەيتينگتە ءۇشىنشى ورىنعا كوتەرىلدى.
ال ليتۆادا تاريحي ناتيجە كورسەتىپ, ءتورتىنشى ورىن العان قازاقستان قۇراماسى ەۋروپا رەيتينگىندە دە 4-ورىنعا تۇراقتادى. ەسكە سالا كەتەيىك, جەرلەستەرىمىز جاھاندىق بىرىنشىلىكتىڭ جارتىلاي فينالىندا بولاشاق الەم چەمپيوندارى پورتۋگاليادان جەڭىلسە, ءۇشىنشى ورىن ءۇشىن وتكەن باسەكەدە الەمنىڭ بەس دۇركىن چەمپيونى برازيلياعا ەسە جىبەرگەن ەدى.
الەم كۋبوگىنا قاتىساتىندار انىقتالدى
الداعى بەيسەنبى كۇنى قىتايدا شورت-ترەكتەن 2021/22 جىلعى ماۋسىمنىڭ شىمىلدىعى تۇرىلەدى. بەيجىڭدەگى الەم كۋبوگىنىڭ ءبىرىنشى كەزەڭى 21-24 قازان ارالىعىندا وتەدى.
بيىلعى الەم كۋبوگىنىڭ كەزەڭدەرى 2022 جىلعى بەيجىڭ وليمپياداسىنا ىرىكتەۋ ءتۋرنيرى سانالادى. سوندىقتان بارلىق سپورتشىلار ءۇشىن بۇل باسەكەنىڭ ماڭىزى زور. قازاقستاننىڭ ۇلتتىق وليمپيادا كوميتەتىنىڭ مالىمەتى بويىنشا, الەم كۋبوگىنىڭ ءبىرىنشى كەزەڭىندە قازاقستاننىڭ ەرلەر قۇراماسىنان ابزال اجىعاليەۆ, ەركەبۇلان شامۇحانوۆ, ءادىل عالياحمەتوۆ, دەنيس نيكيشا, مەرسايد جاقسىباەۆ, نۇرتىلەك قاجىعالي, ال قىزدار باسەكەسىندە ولگا تيحونوۆا, ءمادينا جانبوسىنوۆا, الەنا ۆولكوۆيتسكايا, يانا حان, ءاليا امىرعاليەۆا جانە اسەل تايشىمانوۆا باق سىنايدى.
مادىعالي قارسىبەكوۆ جاتتىقتىراتىن قازاقستان كومانداسى بۇگىندە بەيجىڭدە سوڭعى دايىندىق جۇمىستارىن جۇرگىزىپ جاتىر.
دايىنداعان الي بيتورە
