تانىم • 19 قازان، 2021

«كيەلى جولدىڭ يەسى – رايىمبەك...»

159 رەت كورسەتىلدى

ازاتتىق جولىندا جوڭعار­لارعا قارسى اتقا قونىپ، اسقان ەرلىكتىڭ ۇلگىسىنە اينالعان رايىم­بەك باتىردىڭ ەرلىگى حاقىندا بۇگىندە اڭىزداردان جەتكەن دەرەك كوپ. باتىر بابانىڭ عيبراتتى شەجىرەسى كوپتەگەن ەڭبەكتەرگە ارقاۋ بولدى. رايىمبەك باتىرداي ءبىرتۋار تۇلعانىڭ، ەلى ۇلىقتاعان اۋليەنىڭ ەسىمىمەن بايلانىستى دەرەكتەر مەن دايەكتەر جانە باسقا دا دۇنيەلەر «رۋحاني جاڭعىرۋ» باعدارلاماسى اياسىندا الماتى قالالىق مادەنيەت باسقارماسىنىڭ باستاماسىمەن جارىققا شىققان «كيەلى جولدىڭ يەسى – رايىمبەك...» اتتى اكادەميالىق جيناققا توپتاستىرىلدى.

الماتى مۋزەيىندە وتكەن تۇ­­­ساۋكەسەر راسىمىندە باتىر بابا­مىزدىڭ ەل مەن جەر­دىڭ ازاتتىعى جولىنداعى كۇرەس­كەرلىك ءھام قاي­رات­كەرلىك مۇراسى حاقىن­داعى دايەكتەمەلەر دوڭگە­لەك ۇستەل تاقى­رى­بىنا ارقاۋ بولدى.

ءۇش بولىمنەن تۇراتىن اكادە­ميا­لىق باسىلىمدا اتى اڭىزعا اينالعان رايىم­­بەك تۇكە ۇلى تۋرالى زەرتتەۋلەر، ەسسەلەر مەن ما­قالالار، ەل اۋزىندا جۇرگەن اڭىزدار ءھام جىر-داستاندار، بەلگىلى اقىنداردىڭ ارناۋ ولەڭ­دەرى، ءباھادۇر باباعا قاتىستى فوتوسۋرەتتەر توپتاستىرىلعان.

جيناق اقيىق اقىن مۇقا­عالي ما­قا­تاەۆتىڭ «رايىمبەك، رايىم­بەك!» پوەماسىمەن ەرەك­شەلەنىپ تۇرسا، سابدالى جىراۋ ايتاتىن داستاننىڭ ەكى نۇسقاسى، جازۋشى ج.تۇرلىباي ۇلىنىڭ «رايىمبەك باتىر» رومان-ديلوگياسىنداعى فول­كلورلىق موتيۆتەر، سونىمەن بىرگە اقىن، دراماتۋرگ، نۇر­لان ورا­­­­­زا­لين، جازۋشى بەك­سۇلتان نۇر­­جەكەەۆ، تاريحشى مام­بەت قوي­­گەلدى، جازۋشى-ەتنوگ­راف نۇر­لان سارسەنباەۆ، تاعى دا باسقا اۆتورلاردىڭ ەسسە، زەرتتەۋلەرى مەن ماقالالارى، با­­تىر جايىنداعى اڭىزدار، جىر-داستاندار مەن ولەڭ­دەر اكادەميالىق باسىلىمدى تا­قى­رىپتىق جاعىنان بايىتا تۇسەدى.

الماتى قالالىق مۋزەيلەر بىرلەس­تىگىنىڭ ۇيلەستىرۋىمەن قولعا الىنعان جيناق وسى ۇجىم­­نىڭ باسشىسى ءانۋار ۇم­بەتاليەۆ جانە مادەنيەت جاناشى­رى، مەتسەنات اينۇر جۇماش­تىڭ دەمەۋ­شىلىگىمەن جۇزەگە اسىپ وتىر. باس رەداكتورى – قا­­­­زاقستان جازۋشىلار ودا­عى توراعاسىنىڭ كەڭەسشىسى، اقىن ەر­جان الاشتۋعان. ە.الاش­تۋعان ءوز سوزىندە كۇنى بۇگىنگە دەيىن باتىر با­با تۋرالى قانداي ەڭبەكتەر جا­رىق­­قا شىقسا، سو­نىڭ بارلىعى وسى عىلىمي-تا­نىمدىق اكادەميالىق جي­ناققا ەنىپ وتىرعاندىعىن جەت­كىزدى. كىتاپتى جيناۋ بارىسىندا كوپ­تەگەن اكادەميالىق نۇسقالار باسشىلىققا الىنعان. عىلىمي ساراپتاما جاسالىپ، دايەكتەمەسى، عىلىمي نەگىزدەمەسى جوق دەرەكتەر قولدانىلماعان. كىتاپ سۋرەتشى شاكەن بوكەنتاي ۇلىنىڭ تۋىندىلارى نەگىزىندە بەزەندىرىلدى.

تۇساۋكەسەر راسىمىندە وسى جيناق اۆ­­تورلارىنىڭ ءبىرى جازۋشى-پۋبليتسيست جاقىپجان نۇرعوجاەۆ جادىندا جاتتالىپ قالعان باتىر ەرلىگى حاقىندا ءسوز قوزعاي كەلىپ، «مۇقاعالي» جۋر­نالى­نىڭ جارىققا شىعۋىنىڭ  تاريحىنا توقتالىپ ءوتتى. وسى يگى باستامانىڭ باتىر بابانىڭ تۋعانىنا 300 جىل تولۋى قار­ساڭىن­دا قولعا الىنعاندىعى جايىن­داعى قىزىقتى دەرەكتەر قا­تىسۋشىلاردىڭ نازارىن اۋداردى.

ءوز ءسوزىن وڭتۇستىك استاناداعى مۋزەيلەر، كىتاپحانالار ءىسىنىڭ جاندانىپ كەلە جاتقاندىعىمەن بايلانىستىرا باستاعان قالالىق مادەنيەت باسقارماسىنىڭ باسشىسى عاني مايلىباەۆ باتىر بابا جايىنداعى ەڭبەكتىڭ وسكەلەڭ ۇرپاق ءۇشىن قاجەت ەكەنىن، سونىمەن قاتار ەل ازاتتىعى جولىندا كۇرەسكەن قايراتكەر تۇلعالار جايىنداعى باسىلىمداردىڭ كوپتەپ جارىققا شىعۋى، كىتاپ­حانالاردا قولجەتىمدى بولۋىنىڭ ماڭىزدىلىعىنا توقتالدى. 

اقىن، قازاقستان جازۋشىلار ودا­عى باسقارما توراعاسىنىڭ ورىنباسا­رى باقىت بەدەلحان  جيناقتى دايىن­داۋعا اتسالىسقان رەداكتسيا القاسىنىڭ جۇمىس­ى جايىندا ايتىپ ءوتىپ، ەلىمىزدىڭ تۇتاستىعى جولىندا بۇل بارشا الاشقا كەرەك ەڭبەك دەپ اتاپ ءوتتى. كەمەڭگەر كوشباسشى،  ادىلەت تۋىن اسقاقتاتقان باتىر بابا جايىنداعى جيناقتىڭ قو­عام ءۇشىن ماڭىزدىلىعىنا توقتالعان جۇل­دىز مۇقاعالي ۇلى، جۋرناليست رىسبەك سارسەنباەۆ وسى يگى ىسكە باستاماشى بولعان ازا­ماتتارعا ريزاشىلىعىن ءبىلدىردى.

تاعىلىمدى دەرەكتەرمەن تو­لىق­قان عىلىمي-تانىمدىق باسىلىم ارناۋلى جانە جوعارى وقۋ ورىندارىنىڭ ستۋدەنتتەرىنە، مەك­تەپ وقۋشىلارى مەن قالىڭ وقىرمانعا ارنالىپ وتىر.

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:40

847 ادام كوروناۆيرۋس جۇقتىردى

كوروناۆيرۋس • بۇگىن، 09:00

ۇقساس جاڭالىقتار