ونى كورىپ تە, ءبىلىپ تە ءجۇرمىز. ەلىمىزدەگى ءبىلىم الاتىن وقۋشىلار ءۇشىن ونلاين ءبىلىم بەرەتىن وڭتايلى شەشىمدەردى قاراستىرعان پلاتفورمالار ساناۋلى. سونىڭ ءبىرى – قازاقستاندىق Daryn.Online پلاتفورماسى. جوبا ماقساتى – ۋاقىت پەن قاشىقتىققا تاۋەلسىز ۇزدىك ءبىلىم پلاتفورماسىن كوپشىلىككە ۇسىنۋ. قازاقستانداعى ءوز سالاسى بويىنشا ەڭبەگى كورىنگەن بىلىكتى ۇستازداردى جيناپ, بەينەساباقتار ءتۇسىرىلدى. كەز كەلگەن ءپاننىڭ ىشىندەگى تاقىرىپتى وقۋشىعا 5-7 مينۋت ارالىعىندا جەتىك تۇسىندىرەدى. 2019 جىلى ءبىلىم جانە عىلىم مينيسترلىگىنىڭ ماماندارى مەكتەپتەرگە ونلاين ءبىلىم الۋعا بولاتىن پلاتفورمالاردىڭ ءبىرى رەتىندە تاڭدادى. جوبا كارانتين كەزەڭىندە تولىق اقىسىز رەجىمدە كوپشىلىكتىڭ يگىلىگىنە ۇسىنىلدى. الايدا قازىرگى ۋاقىتتا بۇل پلاتفورمالار اقىلى تۇردە قىزمەت كورسەتەدى. سونىڭ سالدارىنان, بىرىنشىدەن, قولدانۋشى وقۋشىلار, مۇعالىمدەر سيرەك پايدالانۋدا. بۇل ءبىلىم بەرۋشى مەكەمەگە دە بايلانىستى, سەبەبى كەلىسىمشارتقا قول قويىلماسا بەرىلگەن مۇمكىنشىلىكتەر ءبىلىم الۋشىلار مەن ۇستازدارعا قولجەتىمدى بولا بەرمەيدى. ەكىنشى جاعىنان, ەڭبەكتى باعالاۋ دا ماڭىزدى. قانشا دەگەنمەن, قازاقستاننىڭ ءار ايماعىنداعى بىلىكتى ۇستازدارمەن بايلانىس جاساپ, وفلاين ءبىلىم الۋعا مۇمكىندىك بەرىلىپ, تابىسقا جەتىپ تە جاتىر.
پلاتفورمانىڭ بارلىق ءپان بويىنشا سلايدى, ۆيدەوساباقتارى, ساباق جوسپارلارى, بجب, تجب, شىعارماشىلىق ۆيرتۋالدى تاپسىرمالارى جانە ت.ب. رەسۋرستارى بار. ءبىلىم قورى ۇلكەن. 2021 جىلى جوبا قارقىندى دامي كەلە Daryn Teacher مەن Daryn Tutor پلاتفورمالارى دا ىسكە قوسىلدى. قولدانۋ مۇمكىنشىلىكتەرى ارتتى. پلاتفورمادا ەلىمىزدەگى كەز كەلگەن ۇستاز رەپەتيتور رەتىندە تىركەلىپ جۇمىس ىستەي الادى. ارينە, جۇمىس بارىسى ارنايى شارتتارعا سايكەس بولۋى قاجەت.
سوڭعى جىلدارى ءبىلىم پلاتفورمالارى مەن سايتتارىندا اقىلى كۋرستار, وليمپيادالار, ديپلوم, اقىلى سەرتيفيكاتتار الۋ مۇمكىندىكتەرى كوبەيدى. بۇل ءبىر جاعىنان تاجىريبە الماسۋعا پايدالى, ەكىنشى جاعىنان ءبىلىمنىڭ ساپاسىزدانۋىنا الىپ كەلەدى, ياعني بىلىكتىلىكتى راستايتىن قۇجاتتاردىڭ قولجەتىمدى بولۋى ارتۋدا. مۇعالىمدەر اتتەستاتتاۋدان ءوتۋى ءۇشىن پورتفوليوعا سەرتيفيكاتتار جيناپ, كەيىننەن ول قۇجاتتاردىڭ دا جارامايتىندىعى انىقتالدى. بىراق ءتيىستى ورگاندار ونى دا باستى نازارعا الدى. 2021 جىلدان باستاپ وقۋ جىلىنا ارنايى كاسىبي دامۋ سايىستارى, وقۋشىلاردىڭ زامان تالابىنا ساي قالىپتاسۋىنا ارنالعان مينيسترلىكپەن بەكىتىلگەن سايتتار, سايىستار, ءبىلىم پلاتفورمالارى مەن ورتالارى بار. مەملەكەت تسيفرلاندىرۋعا كوشۋ ماقساتىن دا ءوزى ۇسىنىپ وتىر.
ونلاين پلاتفورما – قاجەت دۇنيە. دەگەنمەن, قولدانىستاعى پلاتفورمالاردىڭ كەمشىلىك تۇستارى دا جەتەرلىك. قازىر ءبارىمىز تسيفرلى ورتالار مەن قۇرىلعىلارعا تاۋەلدىمىز. قازاقستاندىق نارىقتا ءبىلىم پلاتفورمالارى وتە از. مىسالى, BilimLand پلاتفورماسىنىڭ مازمۇنىنا كەلەتىن بولساق, رەسۋرستىق قورى تىم از جانە جاڭارتىلعان ءبىلىم مازمۇنى بويىنشا تولىقتاي بارلىق پاندەر بويىنشا وزگەرتىلمەي ەسكى كونتەنتپەن بەرىلگەندىكتەن, وقۋ ۇدەرىسىندە كەڭ كولەمدە قولدانۋعا مۇمكىندىك بەرە بەرمەيدى. سوندىقتان, رەسۋرستاردى جاڭارتىپ وتىرۋ وتە ماڭىزدى. ءبىلىم الۋ جانە ءبىلىم بەرۋ نەگىزىندە بۇل پلاتفورمالارعا قىزىعۋشىلىقتارىن ارتتىرۋ ماقساتىندا ءبىر مەزەتكە جاپپاي قولجەتىمدى بولۋ ءۇشىن مۇمكىندىگىنشە تەگىن جازىلىم بولعانى ابزال. سەرۆەرلەردىڭ تەحنيكالىق مۇمكىندىگىن كەڭەيتۋ مەن ساپالى ۆيدەو كونتەنتتەر, رەسۋرستاردى تولىقتىرىپ جاڭارتىپ وتىرۋ قاجەت. مۇنداي پلاتفورمالاردىڭ زامان تالابىنا ساي دامۋى, پايدالى, قولجەتىمدى بولۋى ءسىز بەن ءبىزدىڭ قولىمىزدا. پانگە بايلانىستى اقپاراتتاردى پلاتفورمالارعا ەنگىزۋ بارىسىندا كەيبىر كىرىككەن سوزدەردى تۋرا ماعىنادا اۋدارماي, قازاق تىلىندە ماعىنالى, ساۋاتتى جەتكىزۋگە كوپ كوڭىل اۋدارۋ قاجەت. بولاشاق ۇرپاقتىڭ انا تىلىندە كەز كەلگەن ءپاندى ەركىن ويىمەن ماعىنالى ءارى ساۋاتتى جەتكىزە ءبىلۋى قاجەت ءارى مىندەتتى. نەگە وقۋ پلاتفورمالارىنىڭ كونتەنتتەرىن جاڭارتىپ وتىرماسقا؟! مىسالى, ۇبت-عا دايىندىق دەگەن ارنايى بولىمدەر ورنالاستىرىلعان. دايىن تەستتىك تاپسىرمالاردىڭ تالاپكەرلەردىڭ ءبىلىمىن جەتىلدىرىپ ۇبت-عا دايىندالۋعا مۇمكىنشىلىگى تومەن. پاندەر اراسىندا بايلانىس جوق, قازىرگى جەكەلەگەن كونتەنتتەر جاڭا مازمۇنمەن تولىقتاي ەنگىزىلمەگەن. پلاتفورمانى جاساۋشى ۇيىمداردىڭ جۇمىسى ساپالى, قولجەتىمدى بولۋى ءۇشىن, مەكتەپ مۇعالىمدەرىمەن نەگە بايلانىستا بولماسقا؟! قازىر جاڭارتىلعان ءبىلىم مازمۇنى بويىنشا جاسالعان وقۋلىقتار عىلىمي باعىتقا نەگىزدەلگەن. سوندىقتان ءبىلىم بەرۋ پلاتفورمالارىنداعى ءبىلىم بەرۋ رەسۋرستارى عىلىمي باعىتتارعا نەگىزدەلىپ جاڭارتىلسا دەيمىز. ءبىلىم بەرۋ جۇيەسىندە سونىمەن قاتار جاراتىلىستانۋ-ماتەماتيكالىق باعىتىنداعى پاندەردى اعىلشىن تىلىندە وتكىزۋ قولعا الىنۋدا. وسى ماقساتتا اعىلشىن تىلىندەگى كونتەنتتەردى دە پلاتفورمالارعا قوسۋ قولعا الىنسا دەيمىن. «سىن تۇزەلمەي, ءمىن تۇزەلمەيدى», «كوش جۇرە تۇزەلەدى» دەمەكشى, جوعارىدا ايتىلعان ارتىقشىلىقتار مەن كەمشىلىكتەر ەسكەرىلىپ, وقۋ پلاتفورمالارىنىڭ مۇمكىنشىلىگى جوعارى دەڭگەيدە بولادى دەگەن سەنىم بىلدىرەمىن.
ايزادا ءابدىجاپپاروۆا,
نۇر-سۇلتان قالاسىنداعى №82 «دارىن» مامانداندىرىلعان ليتسەيى ينفورماتيكا ءپانىنىڭ مۇعالىمى
