جاڭا تۋعان نارەستەلەردىڭ پاتروناجى دەگەنىمىز نە؟
جاڭا تۋعان نارەستەلەردىڭ پاتروناجى – اۋرۋدىڭ الدىن الۋ, اتا-انالاردى بالانىڭ ۇيلەسىمدى دامۋى ءۇشىن وعان دۇرىس كۇتىم جاساۋعا ۇيرەتۋ ماقساتىندا پەرزەنتحانادان شىققاننان كەيىن ۇيدەگى كىشكەنتاي پاتسيەنتتى بەلسەندى باقىلاۋ جۇيەسى. ايتا كەتۋ قاجەت, اناسى مەن بالاسى اۋرۋحانادان تاۋلىك بويى مەديتسينالىق باقىلاۋ ءۇشىن مەديتسينالىق كورسەتكىشتەر بولماعان كەزدە جانە قاناعاتتانارلىق جاعدايدا عانا شىعارىلادى. بالا ۇيگە شىعارىلعاننان كەيىن پەرزەنتحانا ول تۋرالى اقپاراتتى ودان ءارى باقىلاۋ ءۇشىن ناقتى تۇراتىن جەرى بويىنشا ەمحاناعا بەرەدى.
ەرەجەگە سايكەس, مەدبيكە العاش رەت كىشكەنتاي پاتسيەنتكە اۋرۋحانادان شىققاننان كەيىن 1-3 كۇننەن كەشىكپەي بارۋى كەرەك. پەريناتالدى جانە تۋا بىتكەن پاتولوگيا بەلگىلەرى بار شالا تۋىلعان نارەستەلەردى شىعارىلعان كۇنى بىردەن قاراۋعا ءتيىستى. ەگەر بۇل كۇن دەمالىس نەمەسە مەرەكە كۇندەرىنە تۇسسە, مۇنداي نارەستەلەرگە كەزەكشى پەدياتر-دارىگەر بارادى.
بالالار ۋچاسكەلىك مەدبيكەسى بالاعا ءومىرىنىڭ ءبىرىنشى ايىندا ءار 7 كۇن سايىن 28 كۇن تولعانعا دەيىن بارادى. سودان كەيىن ول اناسى مەن بالاسىن ءبىر ايلىق جاسىندا ەمحاناعا العاشقى تەكسەرۋگە شاقىرادى.
بيىل 8 ايدىڭ ىشىندە مەدبيكەنىڭ جاڭا تۋعان نارەستەگە ۇيگە پاتروناجدىق بارۋ قىزمەتى 1,5 ملن-نان استام رەت كورسەتىلدى.
نارەستەلەردىڭ ۇيدەگى پاتروناجىنا نە كىرەدى؟
بالاعا ءبىرىنشى رەت بارعان كەزدە مەدبيكە اتا-اناسىمەن تانىسادى, تولقۇجات مالىمەتتەرىن, سونداي-اق بالانىڭ بارلىق دەرەكتەرىن جازادى, سونىمەن قاتار اناعا دەنساۋلىعىنا بايلانىستى سۇراقتار قويادى, انا مەن بالانى حاتتاما بويىنشا تەكسەرەدى. مەدبيكەنىڭ مىندەتى: انا مەن بالانىڭ دەنساۋلىعى تۋرالى سۇراۋ (شاعىمدار, ءسۇت بەزدەرىنىڭ جاعدايى, فيزيكالىق بەلسەندىلىك, تاماقتانۋ, ۇيقى, كونتراتسەپتسيا); انانىڭ كوڭىل كۇيىن باعامداۋ, ءۇي ورتاسىنىڭ قاۋىپسىزدىگىن جانە جاڭا تۋعان نارەستەنىڭ قاجەتتىلىكتەرىنە باعام جاساۋ; انانى سابيگە كۇتىم جاساۋ ەرەجەلەرى, بالا ەمىزۋ پرينتسيپتەرى, تەمپەراتۋرالىق رەجىمدى ساقتاۋدىڭ ماڭىزدىلىعى, بالا كۇتىمىنە وتباسىنىڭ قاتىسۋىن حاباردار ەتۋ, كەڭەس بەرۋ جانە ۇيرەتۋ; بالانى تەكسەرۋ جانە قاۋىپتى بەلگىلەر انىقتالعان جاعدايدا دەرەۋ ۋچاسكەلىك دارىگەرگە حابارلاۋ; وتباسىنا دەرەۋ مەديتسينالىق ۇيىمعا جۇگىنۋدى قاجەت ەتەتىن اۋرۋدىڭ قاۋىپتى بەلگىلەرىن ۇيرەتۋ, بۇل – تاماقتانۋ پروبلەمالارى, جاڭا تۋعان نارەستەنىڭ بەلسەندىلىگىنىڭ تومەندەۋى, مينۋتىنا 60-تان استام تىنىس الۋدىڭ جيىلەۋى, تىنىس الۋدىڭ قيىنداۋى, قىزبا نەمەسە تەمپەراتۋرانىڭ تومەندەۋى, قۇرىسۋلار, قالتىراۋ جانە باسقالار; ۆاكتسينالاۋ مەرزىمى تۋرالى حابارلاۋ; بالانىڭ ومىرىنە, دەنساۋلىعىنا, قاۋىپسىزدىگىنە جانە دامۋىنا قاۋىپ توندىرەتىن الەۋمەتتىك قاتەرلەرگە باستاپقى باعالاۋ جۇرگىزۋ جانە ونى انىقتاعان جاعدايدا امبۋلاتورلىق-ەمحانالىق كومەك كورسەتەتىن ەمحانانىڭ الەۋمەتتىك قىزمەتكەرىنە حابارلاۋ; قوسىمشا كومەككە مۇقتاج بالالاردى انىقتاۋ جانە ولار ءۇشىن جەكە بارۋدى جوسپارلاۋ (تۋ كەزىندە دەنە سالماعى تومەن بالالار, ايتۆ جۇقتىرعان انالاردان تۋعان نەمەسە اۋىرعان بالالار).
مۇنىڭ بارلىعىن بالاعا ودان ءارى پاتروناج جاساۋ كەزىندە ەسكەرۋ ماڭىزدى.
جاڭا تۋعان نارەستەگە بارعاننان كەيىن مەدبيكە نە ىستەۋى كەرەك؟
ەمحاناداعى جۇمىس ورنىندا مەدبيكە كىشكەنتاي پاتسيەنتتى بحت اج-دا تىركەيدى («بەكىتىلگەن حالىق تىركەلىمى» اقپاراتتىق جۇيەسى), بالانىڭ امبۋلاتورلىق كارتاسىندا تەكسەرۋ ناتيجەلەرى تۋرالى جازبا جاسايدى, ۋچاسكەلىك پەدياتر دارىگەرگە ۇيدە تەكسەرۋدىڭ ناتيجەلەرى تۋرالى حابارلايدى.
ەگەر مەدبيكە ءسابيدىڭ دەنساۋلىعىندا ورتاشا جانە جوعارى قاۋىپتى انىقتاسا, ول جپد دارىگەرگە, اعا مەيىربيكەگە, ەمحانا مەڭگەرۋشىسىنە مەديتسينالىق ۇيىم وسىنداي بالانى باقىلاۋدا ۇستاۋى ءۇشىن جانە دارىگەر قاۋىپ دارەجەسى مەن فاكتورلارىنا سايكەس جەكە باقىلاۋ جوسپارىن ازىرلەۋى ءۇشىن حابارلايدى.
