ۇلتتىق ەكونوميكا مينيسترلىگى ەكونوميكا سالالارىن دامىتۋ دەپارتامەنتىنىڭ ديرەكتورى ولجاس سىزدىقوۆتىڭ دەرەگىنشە, جوبا ءۇش باعىتتان تۇرادى. ءبىرىنشى باعىت – شيكىزاتتىق ەمەس سەكتور ينۆەستيتسيالارىنىڭ ءوسۋى, سونداي-اق قۇن جاساۋدىڭ جاھاندىق جانە وڭىرلىك تىزبەكتەرىنە قوسىلۋ نەگىزىندە ەكونوميكانى ءارتاراپتاندىرۋ. ەكىنشى باعىت ونىمدىلىگى جوعارى جۇمىس ورىندارىن قۇرۋ ارقىلى حالىقتىڭ تابىسىن ارتتىرۋعا باعىتتالعان. ءۇشىنشى باعىت – تومەن كومىرتەكتى دامۋ ترەندىن ەسكەرە وتىرىپ, جاڭارتىلاتىن ەنەرگيا كوزدەرى بازاسىندا ەلەكترگەنەراتسيانىڭ وزىق دامۋىن قامتاسىز ەتۋ.
جوبا 5 باعىتتان تۇرادى. ولار – يندۋستريالىق-يننوۆاتسيالىق دامۋ, مۇناي-گاز حيمياسى كەشەنىن دامىتۋ, گەولوگيالىق زەرتتەۋلەردى دامىتۋ, ەنەرگەتيكالىق كەشەندى دامىتۋ جانە شيكىزاتتىق ەمەس ەكسپورتتى ىلگەرىلەتۋ. بۇعان قوسا نەگىزگى 6 مىندەت جانە 13 كورسەتكىش ايقىندالعان.
– يندۋستريالىق-يننوۆاتسيالىق دامۋ بويىنشا ەكى نەگىزگى مىندەت ايقىندالدى. ياعني وڭدەۋشى ونەركاسىپ كاسىپورىندارىن تەحنولوگيالىق جاڭعىرتۋ, سونداي-اق ءوندىرىس كولەمىن ۇلعايتۋ جانە وڭدەۋ ونەركاسىبى تاۋارلارىنىڭ نومەنكلاتۋراسىن كەڭەيتۋ. بۇل ءۇشىن كاسىپورىنداردىڭ جاڭا تەحنولوگيالاردى ساتىپ الۋىنا, ەنگىزۋىنە, جابدىقتاردى مونتاجداۋعا جانە ىسكە قوسۋ-جوندەۋ جۇمىستارىنا, سونداي-اق كادرلاردىڭ بىلىكتىلىگىن ارتتىرۋعا, تەحنولوگيالىق جابدىقتاردى ساتىپ الۋعا كرەديت بەرۋ, ونىڭ ىشىندە ليزينگ شارتتارىن جاقسارتۋعا ارنالعان شىعىندارىن وتەۋ جونىندەگى كەشەندى شارالار ازىرلەنەدى. وسىلايشا, 2025 جىلعا دەيىن تسيفرلى تەحنولوگيالاردى پايدالاناتىن وڭدەۋ ونەركاسىبىندەگى كاسىپورىنداردىڭ ۇلەسىن 23 پايىزعا دەيىن جەتكىزۋ جوسپارلانۋدا. 2025 جىلى جابدىقتار مەن ماشينالار ءۇشىن نەگىزگى كاپيتالعا سالىناتىن ينۆەستيتسيالار 1 ترلن تەڭگەدەن اساتىن بولادى, – دەيدى و.سىزدىقوۆ.
بۇل رەتتە ءوندىرىس كولەمىن ۇلعايتۋ جانە وڭدەۋ ونەركاسىبى تاۋارلارىنىڭ نومەنكلاتۋراسىن كەڭەيتۋ مىندەتىن ورىنداۋ ءۇشىن 418 يندۋستريالىق جوبانى ىسكە اسىرۋ جوسپارلانۋدا. 2025 جىلعا قاراي نەگىزگى كاپيتالعا 11 ترلن تەڭگەدەن استام ينۆەستيتسيا تارتىلماق.
سونداي-اق وڭدەۋ ونەركاسىبىنىڭ ءونىمىن ەكسپورتتاۋ كولەمى 24 ملرد دوللارعا ۇلعايادى دەپ كۇتىلۋدە. جاڭادان قۇرىلاتىن بىلىكتىلىگى جوعارى جۇمىس ورىندارىنىڭ سانى شامامەن 100 مىڭدى قۇراماق. 2025 جىلعا دەيىن ىسكە قوسۋ جوسپارلانعان ءىرى جوبالاردىڭ قاتارىندا Monterra Qasaqstan, «ەۆروحيم-قاراتاۋ», «مەگا سمارت», KamLit KZ جانە باسقا دا سەرىكتەستىكتەر بار. بۇل رەتتە رەسپۋبليكالىق دەڭگەيدە 50 نەگىزگى جوبا ايقىندالعان.
– مۇناي-گاز حيمياسى كەشەنىن دامىتۋ باعىتى بويىنشا سىرتقى سۇرانىستى قاناعاتتاندىرۋ ءۇشىن ءىرى جوعارى تەحنولوگيالىق مۇناي-گاز حيمياسى وندىرىستەرى ەنگىزىلەدى. 2025 جىلعا قاراي 5 مۇناي-گاز حيميا زاۋىتىن پايدالانۋعا بەرۋ جوسپارلانعان. ولار – پوليپروپيلەن ءوندىرىسى, بەنزين مەن پوليپروپيلەنگە ارنالعان قوسپا ءوندىرىسى, مەتانول ءوندىرىسى, پوليەتيلەنتەرەفتالات ءوندىرىسى جانە قاشاعان كەن ورنىنىڭ شيكىزاتى بازاسىندا گاز وڭدەۋ زاۋىتى. وسىنىڭ ناتيجەسىندە مۇناي-گاز حيمياسى ونىمدەرىن ءوندىرۋ كولەمى 360 مىڭنان 2 ملن تونناعا دەيىن, ياعني 5 ەسە ۇلعايادى. سونىمەن قاتار ەكسپورت 9 ەسە وسەدى, – دەيدى مينيسترلىككە قاراستى ەكونوميكا سالالارىن دامىتۋ دەپارتامەنتىنىڭ ديرەكتورى.
گەولوگيالىق بارلاۋ سالاسىن دامىتۋ ينۆەستيتسيالىق تارتىمدىلىقتى ارتتىرۋعا جانە گەولوگيالىق ماتەريالداردى ساقتاۋ مەن وڭدەۋدى زاماناۋي ينفراقۇرىلىممەن قامتاماسىز ەتۋگە باعىتتالادى. اۋماقتىڭ گەولوگيالىق زەرتتەلۋىن قامتۋ 683,9 مىڭ شارشى شاقىرىمعا ۇلعايادى. ءبىر قور قويماسى, 2 كەرن قويماسى سالىنادى جانە 4 كەرن قويماسى جوندەلمەك.
– ءتورتىنشى باعىت ەكونوميكا مەن حالىقتىڭ ءوسىپ كەلە جاتقان قاجەتتىلىكتەرىن قاناعاتتاندىرۋ ماقساتىندا ەنەرگەتيكالىق كەشەندى جاڭعىرتۋدى كوزدەيدى. 2025 جىلعا دەيىن جۇمىس ىستەپ تۇرعان ەلەكتر ستانسالارىن جاڭعىرتۋ ەسەبىنەن 5 404 مۆت قوسىمشا قۋاتتى ىسكە قوسۋ جوسپارلانۋدا. سونداي-اق باتىس قازاقستان, اتىراۋ جانە ماڭعىستاۋ وبلىستارى اراسىندا ەكىنشى تىزبەك (220 كۆ) سالىنباق. قابىلدانعان شارالاردىڭ ناتيجەسىندە ەلەكتر ەنەرگياسىن ءوندىرۋدىڭ جالپى كولەمىندەگى جاڭارتىلاتىن ەنەرگيا كوزدەرىنەن الىناتىن ەلەكتر ەنەرگياسىنىڭ ۇلەسى 6 پايىزعا جەتەدى. جوبالاردى ىسكە قوسۋ ەكونوميكانىڭ ەلەكتر ەنەرگياسىنا قاجەتتىلىگىن 120 ملرد كۆت/ساعاتقا دەيىن وتەيتىن بولادى, – دەدى و.سىزدىقوۆ.
شيكىزاتتىق ەمەس ەكسپورتتى ىلگەرىلەتۋ باعىتى بويىنشا شيكىزاتتىق ەمەس ەكسپورت كولەمىن 41 ملرد دوللارعا دەيىن ءوسىرۋ مىندەتى شەشىلمەك. بۇل ءۇشىن جاڭا ەكسپورتتاۋشىلاردى وسىرۋگە جانە جۇمىس ىستەپ جاتقان ەكسپورتتاۋشىلاردىڭ قۇزىرەتىن ارتتىرۋعا باعىتتالعان ەكسپورتتىق اكسەلەراتسيا باعدارلاماسىن دامىتۋ جالعاسادى. 1 مىڭ بەلسەندى ەكسپورتتاۋشىنىڭ سىرتقى نارىقتارعا شىعۋى قامتاماسىز ەتىلمەك. سونىمەن قاتار 350-گە جۋىق ەكسپورتتاۋشىنى Alibaba, Amazon, OZON سەكىلدى ەلەكتروندى ساۋدا پلاتفورمالارىنا شىعارۋ جوسپارلانۋدا. بۇعان قوسا مەملەكەتتىك ەتالونداردىڭ حالىقارالىق تالاپتارعا سايكەستىگىن قامتاماسىز ەتۋ ءۇشىن سىناق زەرتحانالىق بازالارىنىڭ 30 پايىزى, ياعني 250-دەن استامى جاڭعىرتىلماق.
– ەكسپورتتاۋشىلاردى سىرتقى نارىقتارعا ىلگەرىلەتۋ ءۇشىن بىرقاتار شارالار قاراستىرىلعان. اتاپ ايتقاندا, ەكسپورت الدىنداعى جانە ەكسپورتتىق قارجىلاندىرۋ; ساقتاندىرۋ, اينالىم قاراجاتىن تولىقتىرۋ ءۇشىن قارجىلاندىرۋ; ەكسپورتتاۋشىلاردىڭ شىعىندارىن وتەۋ; ەكسپورتتاۋشىلاردىڭ لوگيستيكالىق شىعىندارىن وتەۋ تەتىكتەرى جۇمىس ىستەيدى. وسىنىڭ ناتيجەسىندە شيكىزاتتىق ەمەس تاۋارلاردىڭ ەكسپورتى 14 ملرد دوللاردان 29 ملرد دوللارعا دەيىن ۇلعايادى. كورسەتىلەتىن قىزمەتتەر ەكسپورتى 2,4 ەسە وسپەك, دەپ ناقتىلادى دەپارتامەنت ديرەكتورى.
ۇلتتىق جوبانى قارجىلاندىرۋ ءۇشىن 15,9 ترلن تەڭگە كەرەك. ونىڭ 402 ملرد تەڭگەسى رەسپۋبليكالىق بيۋدجەتتە قاراستىرىلعان. 15,5 ترلن تەڭگەنى جەكە ينۆەستيتسيالار ەسەبىنەن تارتۋ كوزدەلىپ وتىر.
ۇلتتىق جوبانى ىسكە اسىرۋ ناتيجەسىندە 2025 جىلعا دەيىن 102 مىڭنان استام جاڭا تۇراقتى جۇمىس ورنى قۇرىلىپ, ەڭبەك ونىمدىلىگى 20 پايىزعا وسەدى. وڭدەۋ ونەركاسىبى ونىمدەرىن ءوندىرۋ كولەمى 1,5 ەسە ۇلعايادى. شيكىزاتتىق ەمەس ەكسپورتتى 41 ملرد دوللارعا دەيىن, ياعني ەكى ەسە ۇلعايتۋ كوزدەلگەن. جاڭارتىلاتىن ەنەرگيا كوزدەرىنەن الىناتىن ەلەكتر ەنەرگياسىنىڭ ۇلەسى گەنەراتسيانىڭ جالپى كولەمىنىڭ 6 پايىزىن قۇرايتىن بولادى.
ۇلتتىق جوبا جالپىۇلتتىق باسىمدىقتاردى جانە ەلدى دامىتۋدىڭ 2025 جىلعا دەيىنگى ۇلتتىق جوسپارىن ىسكە اسىرۋ ءۇشىن ازىرلەنگەنىن اتاپ وتكەن ءجون. سونداي-اق جوبا 2025 جىلعا قاراي ورنىقتى ەكونوميكالىق ءوسۋدى 5 پايىز دەڭگەيىندە قامتاماسىز ەتۋگە باعىتتالعان.
