ايماقتار • 15 قازان، 2021

تارازداعى حالىقارالىق كونفەرەنتسيادا قازاقستاندىق ۇلگىنى تاراتۋ تۋرالى قارار قابىلداندى

106 رەت كورسەتىلدى

تارازدا 200-دەن اسا ەتنوسارالىق قاتىناستار سالاسىنداعى رەسەي، ۋكراينا، يزرايل، بولگاريا، وزبەكستان مەملەكەتتەرىنەن كەلگەن جانە وتاندىق ساراپشىلاردىڭ قاتىسۋىمەن وتكەن «قازىرگى كەزەڭدەگى ەتنوسارالىق كەلىسىم: تاجىريبە مەن الداعى مىندەتتەر» حالىقارالىق عىلىمي-پراكتيكالىق كونفەرەنتسياسى ءوز مارەسىنە جەتتى، دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.

جيىنعا، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، مەملەكەتتىك جانە قۇقىق قورعاۋ ورگاندارىنىڭ وكىلدەرى قاتىستى.

پلەنارلىق وتىرىستان كەيىن كونفەرەنتسيا «كوپەتنوستى ەلدى مەكەندەردەگى الەۋمەتتىك پروبلەمالاردى شەشۋدەگى جەرگىلىكتى اتقارۋشى ورگاندار مەن ازاماتتىق ينستيتۋتتاردىڭ ءرولى»، «شيەلەنىستەر مەن نارازىلىق كوڭىل-كۇيلەردى الدىن الۋ جانە ولاردى ەسكەرتۋ»، «مۋلتيمادەني ورتاداعى قاقتىعىستاردىڭ الدىن الۋ ىسىنە عىلىمي-ساراپتامالىق الەۋەتتى پايدالانۋ»، «قوعامدىق كەلىسىمدى نىعايتۋداعى قازاقستان حالقى اسسامبلەياسى مەن باق-تىڭ ءرولى» سەكىلدى جەكەلەگەن سەكتسيالار شەڭبەرىندە جالعاستى. ەكى كۇن ىشىندە كونفەرەنتسيادا 40-قا جۋىق وتاندىق جانە شەتەلدىك سپيكەرلەر بايانداما جاسادى.

تالقىلاۋ قورىتىندىسى بويىنشا كونفەرەنتسياعا قاتىسۋشىلار ەتنوسارالىق كەلىسىمدى نىعايتۋ بويىنشا جەرگىلىكتى اتقارۋشى ورگاندارعا ارنالعان ۇسىنىمدار كورسەتىلگەن قارار قابىلدادى. اتاپ ايتقاندا، كونفەرەنتسياعا قاتىسۋشىلار «بەيبىتشىلىك پەن كەلىسىم» جوباسىن جۇزەگە اسىرۋ بويىنشا جامبىل وبلىسىنىڭ تاجىريبەسىن تاراتۋ كەرەكتىگىن ۇسىندى.

— قر تۇڭعىش پرەزيدەنتى - ەلباسى نۇرسۇلتان نازارباەۆ تۇراقتىلىق پەن كەلىسىم – بۇل ۇرپاقتان ۇرپاققا جالعاسۋى ءتيىس قۇندىلىق ەكەنىن اتاپ وتكەن بولاتىن. ەلباسى جۇيەلى باعىتىنىڭ نەگىزىندە ءبىزدىڭ ەلىمىزدە ەتنوستاردىڭ مادەنيەتىن، تىلدەرى مەن داستۇرلەرىن دامىتۋ ءۇشىن بارلىق جاعداي جاسالدى. مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «بەيبىتشىلىك پەن كەلىسىم» پيلوتتىق جوباسى قوعامدىق كەلىسىمدى نىعايتۋعا ءوز ۇلەسىن قوسۋدا. ەتنومادەني بىرلەستىكتەرمەن بىرلەسە وتىرىپ، ءبىز قوعامدا ءوزارا سىيلاستىق، توزىمدىلىك، ۇلتارالىق جانە دىنارالىق كەلىسىم يدەيالارىن نىعايتۋعا كۇش سالۋدامىز. ناتيجەسىندە، جوبا شەتەلدىك ساراپشىلاردىڭ جوعارى باعاسىنا يە بولدى. كونفەرەنتسيا بارىسىندا كوتەرىلگەن بارلىق ۇسىنىستارىڭىز مىندەتتى تۇردە ەسكەرىلەتىن بولادى. كونفەرەنتسيا قورىتىندىسى بويىنشا باياندامالار جيناعى شىعارىلادى. كونفەرەنتسيانىڭ ءتۇرلى ۇلتتاردىڭ وكىلدەرى شوعىرلانعان ءبىزدىڭ وڭىردە ءوتۋىنىڭ وزىندىك ءمانى  زور.  تاراز – تاريحى تەرەڭ، وركەنيەتكە وشاعىنا اينالعان قالا. قازاق جەرىندە ۇلى جىبەك جولى زامانىنان بەرگى بارلىق كارتالاردا كورىنىس تاپقان ەكى قالا بار، ولار – تاراز جانە جاركەنت. ەگەر ەلىمىزدە يۋنەسكو تىزىمىنە ەنگەن 11 نىسان بولسا، ولاردىڭ بەسەۋى جامبىل وبلىسىندا ورنالاسقان، - دەپ اتاپ ءوتتى جامبىل وبلىسىنىڭ اكىمى بەردىبەك ساپارباەۆ.

تاراز قالاسىنداعى حالىقارالىق كونفەرەنتسياعا قاتىسقان شەتەلدىك ساراپشىلار اتالعان ءىسشارانىڭ ۇيىمداستىرىلۋىن جوعارى باعالاپ، قازاقستاننىڭ ەتنوسارالىق قاقتىعىستاردىڭ الدىن الۋ، رەتتەۋ جانە شەشۋ ماسەلەلەرىندەگى تاجىريبەسى ەل اۋماعىندا عانا ەمەس، ودان تىس مەملەكەتتەردە دە بىرەگەي جانە سۇرانىسقا يە ەكەنىن اتاپ ءوتتى.

- كونفەرەنتسيا جوعارى دەڭگەيدە ءوتتى، سپيكەرلەردىڭ ءار ءسوزى تىڭداۋشىلاردىڭ ۇلكەن قىزىعۋشىلىعىن تۋدىردى. مەملەكەت قايراتكەرلەرىنىڭ بەلسەنە قاتىسقانى قۋانتادى. بۇل ەلدەگى ۇلتارالىق قاتىناستار سالاسىنا ەرەكشە كوڭىل بولىنەتىنىن ايعاعى.

قازاقستان رەسپۋبليكاسىنىڭ كونستيتۋتسياسىندا ۇلتارالىق جانە كونفەسسياارالىق قاتىناستار سالاسىن رەتتەيتىن كەشەندى نورمالار بار. قازاقستان حالقى اسسامبلەياسى – بىرەگەي قوعامدىق ينستيتۋت جانە قوعامنىڭ بىرىگۋىندە وراسان زور ءرول اتقارادى. قحا وكىلدەرى قايىرىمدىلىق شارالارىنا بەلسەندى اتسالىسۋدا. وسىلايشا، ءوزارا قولداۋ، كومەك كورسەتۋ مادەنيەتى قالىپتاسۋدا، - دەيدى الەۋمەتتانۋ عىلىمدارىنىڭ دوكتورى، ۋكراينالىق پروفەسسور ۆيكتور ششەربينا.

سوڭعى جاڭالىقتار

ۇقساس جاڭالىقتار