پرەزيدەنت • 13 قازان، 2021

مەملەكەت باسشىسى موڭعوليانىڭ سىرتقى قاتىناستار ءمينيسترىن قابىلدادى

106 رەت كورسەتىلدى

مەملەكەت باسشىسى نۇر-سۇلتان قالاسىنا رەسمي ساپارمەن كەلگەن موڭعوليانىڭ سىرتقى قاتىناستار ءمينيسترى باتمۋنح باتتسەتسەگتى قابىلدادى.

كەزدەسۋ بارىسىندا قاسىم-جومارت توقاەۆ قارقىندى دامىپ كەلە جاتقان قازاق-موڭعول قارىم-قاتىناستارىنا توقتالدى.

– موڭعوليا – ءبىزدىڭ سەنىمدى ءارى ستراتەگيالىق سەرىكتەسىمىز. مەملەكەتتەرىمىزدى ورتاق تاريحىمىز بىرىكتىرەدى. موڭعول حالقىنا، ءسىزدىڭ مەملەكەتىڭىزگە دەگەن قۇرمەتىمىز ەرەكشە. سىزدەر ءبىزدىڭ حالىقارالىق باستامالارىمىزعا تۇسىنىستىك تانىتىپ، ۇنەمى قولداۋ كورسەتەسىزدەر. سونداي-اق حالىقارالىق الاڭداردا بىرگە بەلسەندى جۇمىس ىستەپ كەلەمىز. وسى ىنتىماقتاستىعىمىزدى ودان ءارى ارتتىرىپ، ءىس جۇزىندە نىعايتا بەرۋىمىز قاجەت دەپ سانايمىن. بۇل، ەڭ الدىمەن، ساۋدا-ەكونوميكالىق ىقپالداستىققا قاتىستى. ءبىز كولىك لوگيستيكاسى سالاسىن پىسىقتاي ءتۇسۋىمىز كەرەك، – دەدى پرەزيدەنت.

مەملەكەت باسشىسى قالىپتاسقان ەكىجاقتى ىنتىماقتاستىقتىڭ الەۋەتىن بارىنشا پايدالانۋعا شاقىردى.

– وسى ءساتتى پايدالانا وتىرىپ، ەتنيكالىق قازاقتارعا كورسەتىلىپ وتىرعان قۇرمەت پەن قامقورلىعى ءۇشىن ءسىزدىڭ ەلدىڭ باسشىلىعىنا جانە موڭعول حالقىنا ريزاشىلىعىمدى بىلدىرەمىن. موڭعوليا قازاقتارىنىڭ ءتىلىن، مادەنيەتى مەن ءداستۇرىن ساقتاۋ ماسەلەلەرى بويىنشا تىعىز ىنتىماقتاستىعىمىز جالعاسا بەرەدى دەپ ۇمىتتەنەمىن. بۇل – ءسىزدىڭ مەملەكەتىڭىز جۇرگىزىپ وتىرعان ۇلتتىق ساياساتتىڭ ناتيجەسى.  مۇنى زور ريزاشىلىقپەن اتاپ وتكىم كەلەدى، – دەدى قاسىم-جومارت توقاەۆ.

موڭعوليا سىرتقى ساياسات ۆەدومستۆوسىنىڭ باسشىسى قابىلداعانى ءۇشىن قاسىم-جومارت توقاەۆقا العىس ايتىپ، موڭعوليا پرەزيدەنتى ۋحنااگين حۋرەلسۋحتىڭ سالەمىن جەتكىزدى.

– پرەزيدەنتىمىزدىڭ شىنايى سالەمىن جەتكىزۋدى زور مارتەبە سانايمىن. موڭعوليا مەن قازاقستاندى جاقىن كورشى ەلدەر دەپ ايتۋعا بولادى. قازاقستان رەسپۋبليكاسىمەن اراداعى بايلانىستاردى دامىتۋ ءىسى موڭعوليانىڭ سىرتقى ساياساتىندا ماڭىزدى ورىن الادى. ءبىز بۇل قاتىناستاردى جانداندىرعىمىز كەلەدى. كەلەسى جىلى ەلدەرىمىز اراسىندا ورناعان ديپلوماتيالىق قاتىناستاردىڭ 30 جىلدىق مەرەيتويىن اتاپ وتەمىز، – دەدى باتمۋنح باتتسەتسەگ.

كەزدەسۋ سوڭىندا مەملەكەت باسشىسى قاسىم-جومارت توقاەۆ موڭعوليا پرەزيدەنتى ۋحنااگين حۋرەلسۋحتى ەلىمىزگە رەسمي ساپارمەن كەلۋگە شاقىراتىنىن ايتتى. مەملەكەت باسشىسى اتالعان رەسمي ساپار قازاقستان مەن موڭعوليا اراسىنداعى ىنتىماقتاستىقتىڭ دامۋىنا تىڭ سەرپىن بەرەدى دەپ سانايدى.

سوڭعى جاڭالىقتار

الماتى تۇرعىندارى سۋسىز قالدى

ايماقتار • بۇگىن، 15:57

كانەلونى اۋىر شايقاس كۇتىپ تۇر

كاسىپقوي بوكس • بۇگىن، 12:18

ۇقساس جاڭالىقتار