ءتول سپورتىمىزدىڭ كوكپار, الامان بايگە, تەڭگە ءىلۋ, اۋدارىسپاق, جامبى اتۋ, قازاق كۇرەسى, توعىزقۇمالاق, اسىق اتۋ سىندى تۇرلەرى بويىنشا 8 مىڭعا جۋىق ادام باق سىناعان سايىس كوماندالىق تارتىپپەن ءوتتى. تامىز ايىندا باستالىپ, قارا كۇزگە دەيىن ەكى ايعا جۋىق ۋاقىتقا سوزىلعان, كورەرمەن حالىقتىڭ قانىن قوزدىرعان ءدۇبىرلى دوداعا ەلىمىزدىڭ 14 وبلىسىنىڭ جانە ەكى قالاسىنىڭ كوماندالارى قاتىستى.
سونىمەن قازاق كۇرەسىنەن جانە كوكپار تارتۋدان جامبىل وبلىسىنىڭ بالۋاندارى باسىم ءتۇستى. اۋدارىسپاق پەن تەڭگە ىلۋدەن, سونداي-اق جامبى اتۋدان, اسىق ويىنىنان تۇركىستان وبلىسىنىڭ سپورتشىلارىنا تەڭ كەلەر قارسىلاس تابىلمادى. باتىس قازاقستان وبلىسى بولسا توعىزقۇمالاقتان جەڭىمپاز اتاندى.
بالۋان بىلەكتى, تەمىر تاقىمدى, ەپتى جىگىتتەردىڭ جارىسىندا ەرەكشە كوزگە تۇسكەن جەڭىمپازدار مەن جۇلدەگەرلەر سىيلىقسىز قالعان جوق. ۇلتتىق سپورت فەدەراتسيالارى مەن ۇلتتىق سپورت تۇرلەرى قاۋىمداستىعى جەكەلەي سپورتشىلار مەن كوماندالاردى قارجىلاي جانە باسقا دا باعالى سىيلىقتارمەن ماراپاتتادى. تەمىر تۇلپارعا يە بولعاندار دا بار.
ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان:
– جامبى اتۋ فەدەراتسياسىنىڭ پرەزيدەنتى نۇرلان امەتوۆ مىرزا جەڭىمپازعا ارنايى تەمىر تۇلپار مىنگىزدى. ءبىز دە قاۋىمداستىق اتىنان تەمىر تۇلپار اتادىق. سول كەزدە ءبىزدىڭ سپورتشىلارىمىزدىڭ كوزى بۇرىنعىدان دا قاتتىراق جانىپ, جارىسقا ەرەكشە ىجداعاتپەن, ىقىلاسپەن كىرىستى. فەستيۆال ۇلكەن تابىسپەن ءوتتى. كەلەسى جارىستاردا جامبى اتۋدان ناعىز مەرگەندەر, تەڭگە ىلۋدەن ناعىز سايىپقىراندار بوي كورسەتەتىنىنە كۇمانىم جوق, – دەدى .
وتىزجىلدىق تورقالى تويعا ورايلاستىرىلعان ۇلان-عايىر سپورت شاراسىن ۇيىمداستىرۋعا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنە قاراستى «ۇلتتىق جانە ات سپورتى تۇرلەرى ورتالىعى» رمقك مۇرىندىق بولعانىن ايتا كەتەيىك. ەكى جىلدا ءبىر مارتە وتكىزىلەتىن دودانىڭ ءدۇبىرى بيىل ەرەكشە بولعانى انىق.
