وزگەدەن وقشاۋ تۇرۋدى و باستا-اق ويلاعان ەكسپرەسسيونيزمنىڭ كورنەكتى وكىلى, نەمىس سۋرەتشىسى فرانتس ماركتىڭ ءاربىر كەيىپكەرىنە ەرەكشە جاراتىلىس رەتىندە قارايتىنىنا قايران قالاسىز. مەيلى, ول جان-جانۋار بولسىن, قاناتى سىنعان قۇس بولسىن, نە بولماسا كوشە سىپىرۋشىسى, جولىنان اداسقان جولاۋشى ما دەرسىز, ءبارىبىر, شەبەر قالىڭ بوياۋمەن قالتقىسىز ورىنداپ شىعادى.
مۇنى «كوك ات» كارتيناسىنان-اق بايقاۋىمىزعا بولاتىنداي. شەبەردىڭ باسقا تۋىندىلارىنا قاراعاندا كوڭىلگە ىستىق, وقىرمانعا تانىمال شىعارماسى. ونىڭ باستى ارتىقشىلىعى – تارتىمدىلىعى مەن سۇيكىمدىلىگى. مۇنى ونەر سىنشىلارى دا قۇپتايدى. وسى تۇستا تاعى ءبىر قوسا كەتەتىن تولعام بار. كارتينانىڭ جاس تاڭدامايتىنى. ءتىپتى مەكتەپ وقۋشىسىنىڭ دا قىزىعۋشىلىعىن تۋدىرادى.
قاراڭىزشى, جىلقىنىڭ شالت قيمىلى, باسىن بۇلعاڭداتۋى, دەنەسى ءسال سىنعان پىشىندە جازىلۋى سۋرەتشىگە ءتان كەيىپ. ول ءتوس سۇيەگىن اق تۇسپەن ارلەسە, اياعى مەن تۇياعىن كوك رەڭككە تولتىرعان. بۇل كونتراستىڭ ناتيجەسىندە جىلقى ەرتەگى كەيىپكەرىنە ۇقسايدى. كەنەپتەگى ءبىر-بىرىنە قاراما-قارسى تۇستەر جالپى فوندى بەرىك ساقتاپ تۇر. ارعى كەڭىستىك پەن بەرگى كەڭىستىك ءبىر-ءبىرىنسىز اشىلمايتىنداي, نازىك ۇيلەسىم تۇزگەن.
ءبىز كارتينادان سۋرەتشىنىڭ ءتۇس تەورياسىن كورەمىز. ول قيالدىڭ شەكاراسى جوق دەپ ەسەپتەيدى. بايقاساڭىز, جىلقىعا نوقتا سالىنباعان, اساۋ ءارى ەركىن ءومىردى كوكسەيدى. سوندىقتان ءسىز كورگەن بەتتە ساناڭىزعا تازالىق ۇيالايتىنى انىق. قويۋ ءتۇستىڭ قۇپياسى وسىندا.
تاعى ءبىر ايتا كەتەتىن جايت, ۇقساس ءتۇس سحەماسى. بۇل دا فرانتس ماركتىڭ قولتاڭباسىنان حابار بەرەتىن قالىپ. سۋرەتشى اۆگۋست ماكقا جازعان حاتتارىنىڭ بىرىندە ءوز جۇمىسىنىڭ نەگىزگى تۇستەرى تۋرالى تۇسىنىك بەرەدى.
«سارى – ايەلدىك پرينتسيپ, ول جۇمساق جانە سەزىمتال; كوك – جىگىتتىك پرينتسيپ, ول سۋىق, بىراق سونىمەن بىرگە رۋحاني; قىزىل – بۇل زاتتىڭ ءتۇسى, ول وتە قاتتى, بىراق ول ارقاشان العاشقى ەكەۋىنىڭ ىقپالىندا جۇرەدى», دەيدى دوسىنا ارناعان جازباسىندا.
كارتيناداعى كورىنىستىڭ تارتىمدىلىعى تۇستەردە عانا ەمەس, جىلقى ءپىشىنىنىڭ ەكسپرەسسيونيزمدىك, ياعني ءار ادامنىڭ جان دۇنيەسىندە ءارتۇرلى ەموتسيالار تۋدىرۋىندا.
