جيىرماعا ەندى ىلىككەن جاسىندا كولدەنەڭ كەسەلگە كەزىككەن. سول قولىنا جارا شىعىپ, يىقتان ءسال تومەن كەسۋگە تۋرا كەلگەندە مىناۋ جالعاننىڭ تۇك قىزىعى قالماعانداي, ءتۇن ارتىنان كۇن شىقپاستاي قاتتى نالىعان. ۋاقىت تا توقتاپ قالعانداي. الدەكىمنىڭ الدىندا كەشىرىمگە جاتپايتىن كۇناسى بولعانداي كىسى كوزىنە تۇسۋگە قىمسىندى. بەيتانىستار كوز سۇعىن قاداپ, تاڭىرقاپ قارايتىنداي. قاراعانى ەشتەڭە ەمەس قوي, كوپتىڭ كوزىنشە تاقاقتاپ, وزدەرىنە تۇك قاتىسى بولماسا دا ماسەلەنىڭ ءمان-جايىن بىلگىسى كەلىپ سۇرايتىندارى قينادى. ەسكى جارانىڭ اۋزىن تىرنايتىندار دا بار ەكەن. بىرتە-بىرتە ەتى ۇيرەنگەن. ايتسە دە ءالى كۇنگە دەيىن بەيتانىس توپتىڭ ىشىنە تۇسكىسى كەلمەيدى.
كوڭىلىن اۋلايىن دەدى مە, كىم ءبىلسىن, العاشقى بەتتە ەت جاقىن تۋىس پەن جاناشىر جورا-جولداس قوناققا كوپ شاقىراتىن. اۋزىنا تۇسكەن سەبەبىن ايتىپ, ات-تونىن الا قاشاتىن. تاعدىردىڭ سالعان ىسىنە شارا بار ما, كوندى, كوندىكتىردى. كەيىن قىسىلمايتىن بولدى. سويتسە ءومىردىڭ ءوزى وسىنداي قاتىگەز سىناقتان تۇرادى ەكەن عوي. بۇل دا ءبىر ەر جىگىتتىڭ باسىنا كەلگەن, ءتوزىمى مەن جىگەرىن سىناماقشى بولعان ەمتيحان ىسپەتتى. كۇن وتكەن سايىن قاراعايدىڭ قارسى بىتكەن بۇتاعىنداي بەكي ءتۇستى. سپورتتى سەرىك ەتۋگە بەل بۋدى. سپورت دەنساۋلىعى كەمنىڭ عانا ەمەس, تەپسە تەمىر ۇزەتىن اتپال ازاماتتارعا دا قاجەت ەكەنىنە داۋ جوق قوي. ال تىرەك-قيمىل اپپاراتى زاقىمدانعاندار ءۇشىن ءتىپتى اۋاداي قاجەت. تەك جاعداي جاسالا بەرمەيتىنى جانعا باتادى. رەسپۋبليكالىق سايىستارعا وبلىستان كوماندا جيناقتاعاندا كوزبوياۋشىلىقتىڭ ورىن الاتىنىن كورىپ ءجۇر. جاتتىعىپ جۇرمەسە دە, سپورتتىق قۇرال-جابدىقتارى تالاپقا ساي بولماسا دا قاتىستى دەگەن اتى بولسىن دەپ كوگەندەگەن قويداي مۇرىندارىنان ءتىزىپ اپارا بەرەدى. جارىستان كەيىن جان بالاسى ىزدەمەيتىنى تاعى بار.
رەسپۋبليكالىق التىنشى سپارتاكيادادان ورالعان, كوماندالىق ەسەپ بويىنشا توپ جارىپ, سپورت شەبەرى اتانعان ەرجان جاقانوۆپەن كەزدەسىپ, جەڭىسىنە قۇتتى بولسىن ايتىپ, از-كەم سويلەستىك. ۇستەل تەننيسىنەن وتكىزىلگەن جارىسقا تىرەك-قيمىل اپپاراتى زاقىمدانعان 10 سپورتشى قاتىستى.
– ەكى جۇماداي قالعاندا جۇرتتىڭ بارىنە جالىنىپ ءجۇرىپ جاتتىعۋ زالىنىڭ كىلتىن سۇراپ الدىم, – دەيدى ەرجان قايىرگەلدى ۇلى, – جاتتىقتىرۋشىمىز جوق. بۇل ارادا ايتا كەتەتىن ءبىر جايت, جاتتىقتىرۋشىنىڭ ەڭبەكاقىسىنىڭ ازدىعى. بىلتىر اقتوبەدەن جاتتىقتىرۋشى كەلگەندە بوركىمىزدى اسپانعا اتىپ قۋانعان ەدىك, كوپكە شىدامادى, كەتىپ قالدى. كەيىن بىلسەك, جالاقىسى نەبارى 100 مىڭ تەڭگە توڭىرەگىندە ەكەن. وعان دا كىنا جوق, باسپاناسى بولماعاندىقتان پاتەر جالداپ تۇرۋعا ءماجبۇر بولدى. جالداۋ قۇنى 100 مىڭ تەڭگە شاماسىندا. بىزگە قانشا بۇيرەگى بۇرىپ تۇرسا دا, ادامدى تۇرمىس بيلەيدى ەمەس پە؟ رەسپۋبليكالىق ۇستەل تەننيسى فەدەراتسياسى ازداپ كومەك قولىن سوزعانىمەن, عيمارات جەكەمەنشىكتىكى. وبلىستىق سپورت باسقارماسى جالعا الىپ وتىر. ونداعىلار ءبىز ءتارىزدى ادامداردىڭ جاتتىعۋىن حوش كورە بەرمەيدى. ايتاتىن ۋاجدەرى: «دوڭعالاقتى اربالارىڭمەن ەدەننىڭ توسەنىشىن جىرتاسىڭدار». وسى جولى سپارتاكياداعا بارعاندا باسقا وبلىستاردان كەلگەن ءوزىمىز ءتارىزدى سپورتشىلاردىڭ حال-احۋالىن سۇراستىردىق, ولاردا ءدال وسىنداي سپارتاكيادادا جۇلدەلى بولىپ, ءبىرىنشى ورىن العان سپورتشىلارعا 200, ەكىنشى ورىنعا 150, ءۇشىنشى ورىنعا 100 مىڭ تەڭگە ستيپەنديا تاعايىندالادى ەكەن.
ءدال وسىنداي قولداۋ بولىپ جاتسا, سپورتشىلاردىڭ دا كۇنكورىسى كوپ-كورىم جاقسارىپ قالار ەدى. ايتپاقشى, كوكشەتاۋدان بارعان كوماندانىڭ ىشىندە نىسانا كوزدەۋشىلەردىڭ اراسىندا قولىنا مىلتىق ۇستاپ كورمەگەندەرى دە بار ەكەن. ءتىپتى, ەلەكتروندى تابلونىڭ نە كورسەتىپ تۇرعانىن ايىرا المايدى. سونىڭ وزىندە ءبىر سپورتشى فينالعا ىلىككەن. ايتۋلارىنا قاراعاندا, ەلدىڭ ءبارى, ءار كوماندا بىركەلكى ينە-جىپتەن جاڭا شىققان سپورت كوستيۋمدەرىن كيىپ, جارقىراپ جۇرگەندە, بۇلار ارقايسىسى ءارتۇرلى, الا-قۇلا كيىممەن قاتىسىپ, كوڭىلدەرى ءپاس بولعان. ايتسە دە, نامىسقا تىرىسىپ باعىپتى.
– اسحات تاجميەۆ ەكەۋىمىز قازاقستان رەسپۋبليكاسىنىڭ چەمپيونى اتاندىق, – دەيدى ەرجان قايىرگەلدى ۇلى, – ارنايى فورما ساتىپ الۋعا قاراجات تاپشى. قولتىعىڭنان دەمەر دەمەۋشى ىزدەۋگە نامىسىمىز جىبەرمەيدى. ءوزى ارزان دا دۇنيە ەمەس. راكەتكانىڭ ءوزى 90 مىڭ تەڭگەنىڭ توڭىرەگىندە.
بۇگىندە وبلىستىق كىتاپحانانىڭ ۇيىمداستىرۋ ءبولىمىنىڭ جەتەكشىسى بولىپ قىزمەت ەتەتىن كەيىپكەرىمىز وبلىس ورتالىعىندا اباي مىرزاحمەتوۆ اتىنداعى ۋنيۆەرسيتەتتى بىتىرگەن ەكونوميست ءتورت بىردەي پەرزەنتىن تاربيەلەپ وتىر. ەندىگى ارمانى وبلىس ورتالىعىندا ءوزى ءتارىزدى تاعدىر تالكەگىنە ۇشىراعان ادامدارعا ازداعان جاناشىرلىق جاسالسا.
پەندەنى العا جەتەلەيتىن ءۇمىت شىراعى. ازىرگە لاۋلاپ جانىپ تۇر.
