7 قازاندا «شەتەلدىك جانە وتاندىق حيتتەر» اتتى كونتسەرتتىك باعدارلاما وتكەن بولاتىن. وندا جاس ارتىستەر تانىمال كومپوزيتورلاردىڭ ءانىن ورىنداپ, بىرەگەي نومىرلەرىن ۇسىندى. بالالاردىڭ ونەرىن ەسترادامىزدىڭ جاس جۇلدىزدارى باعالادى. ولاردىڭ ىشىندە ءالي وقاپوۆ, ايگەرىم راقىشەۆا (Ayree), ەردەن جاقسىبەكوۆ, بەيبىت كوشقاليەۆ جانە ديانا سنەگينا بار.
ال 9 قازان كۇنى بايقاۋدىڭ 5 جىلدىعىنا جانە تاۋەلسىزدىكتىڭ 30 جىلدىعىنا ارنالعان «تۋعان كۇنىڭمەن, «بالا داۋىسى!» گالا-كونتسەرتى ءوتتى.
بالالار تالىمگەرلەرمەن – وتكەن جىلداردىڭ فيناليستەرىمەن بىرگە اۆتورلىق ءان كومپوزيتسيالارىن ورىندادى. التىنشى ماۋسىمنىڭ گران-پري يەگەرى – نۇر-سۇلتان قالاسىنىڭ ونەرپازى جاسمينا تۇزەلوۆا اتاندى. وعان ۇلتتىق ونەر ۋنيۆەرسيتەتىندە وقۋعا گرانت بەرىلدى.
ءبىرىنشى ورىن – ماڭعىستاۋلىق ءامينا اسعاتوۆاعا بەرىلسە, ەكىنشى ورىن – الماتىلىق يۋليا ماكس پەن قاراعاندى وبلىسىنان ۆيكتور ەمەليانوۆقا بۇيىردى. قالعان ءۇش فيناليست ءۇشىنشى ورىن سىيلىعىنا يە بولدى. ولار – اتىراۋ وبلىسىنان التىناي تولەگەن, قىزىلوردا وبلىسىنان ماديار سەرىك جانە تۇركىستان وبلىسىنان مايا بولات.
«تەلەكورەرمەندەر جۇلدەسى» اتالىمىندا باتىس قازاقستان وبلىسىنان كەلگەن سانجار داۋكەنوۆ جەڭىمپاز اتاندى.
