وسىدان ءبىر اي بۇرىن بوسنيانىڭ زەنيتسا قالاسىنداعى ەكى قۇرامانىڭ العاشقى ويىنىندا تالعات ءبايسۋفينوۆتىڭ شاكىرتتەرى جاقسى ماتچ وتكىزىپ, ازۋلى قارسىلاسپەن سىرت الاڭدا 2:2 ەسەبىمەن تەڭ تۇسكەن ەدى. سوندىقتان ءوز الاڭىمىزدا وتەتىن ويىننىڭ جاۋاپكەرشىلىگى مەن ماڭىزدىلىعى فۋتبولشىلار ءۇشىن دە, جانكۇيەرلەر ءۇشىن دە وتە جوعارى بولاتىن. ويتكەنى وزىمىزگە جانە وزگەلەرگە قازاقستان قۇراماسىنىڭ كورسەتىپ جۇرگەن بۇعان دەيىنگى ءتاۋىر ناتيجەلەرى (ۋكراينامەن – ەكى رەت, بوسنيا جانە گەرتسەگوۆينامەن ءبىر رەت تەڭ ويىن) كەزدەيسوق ەمەس ەكەندىگىن دالەلدەۋگە جاقسى مۇمكىندىك ەدى. وكىنىشكە قاراي, ناتيجە جانكۇيەرلەر كۇتكەندەي بولمادى. سىرت الاڭدا تەرەزەسى تەڭ تۇسكەن قۇرامادان قالايشا ءوز ەلىڭدە, ءوز جانكۇيەرلەرىڭنىڭ قولداۋىمەن وتكەن ويىندا جەڭىلىپ قالۋعا بولادى؟
ونىڭ ۇستىنە قارسىلاستار قازاقستانعا وزدەرى قالاعانداي وڭتايلى قۇراممەن كەلە المادى. ميرالەم پيانيچ جانە تاعى ءتورت فۋتبولشى جاراقاتىنا بايلانىستى كەشەگى ويىنعا قاتىسا الماسا, تاعى التى ويىنشى ۆيزا ماسەلەسى بويىنشا ۇلتتىق قۇراماسىنا كومەكتەسە المادى. وسىلايشا, بوسنيا قۇراماسى 11 فۋتبولشىسىن ەلگە قالدىرىپ كەتۋگە ءماجبۇر بولسا دا, سىرت الاڭدا ەش قيىندىقسىز جەڭىسكە جەتتى. مىنە, بۇل – وتكەننەن ساباق الىپ, قاتەلىكپەن جۇمىس ىستەۋدىڭ جارقىن ناتيجەسى!
«استانا ارەنادا» وتكەن ويىندى جەرلەستەرىمىز وتە بەلسەندى باستادى. تورەشىنىڭ ىسقىرىعى ەستىلگەن ساتتەن باستاپ باقتيەر زاينۋتدينوۆ باستاعان جىگىتتەر العا قاراي ۇمتىلدى. ەكى قاپتال ارقىلى كەزەك-كەزەك شابۋىل ۇيىمداستىرىپ, قارسىلاس قۇرامانىڭ قورعاۋشىلارىن ساق ويناۋعا ماجبۇرلەدى. دەگەنمەن جاساندى الاڭعا بوي ۇيرەتكەن بوسنيالىقتار 10-مينۋتتان باسىمدىقتى ءوز قولدارىنا الا باستادى. ناتيجەسىندە, ماتچتىڭ 25-مينۋتىندا ميروسلاۆ ستەۆانوۆيچتىڭ وڭ قاپتالدان اسىرعان پاسىن سمايل پرەۆلياك باسپەن قاقپاعا ءدال باعىتتاپ, ەسەپ اشتى. بۇل ساتتە يۋري لوگۆينەنكو شابۋىلشىنى قورعاپ تۇرعانىمەن, پرەۆلياكتىڭ الدىندا دارمەنسىزدىك تانىتتى. وسى ارادا قاقپاشىمىزدىڭ دا قاتەلىك جىبەرگەنىن ايتا كەتۋ كەرەك. ءبىرىنشى تايم 1:0 ەسەبىمەن قوناقتاردىڭ باسىمدىعىمەن اياقتالدى.
قازاقستان قۇراماسىنىڭ فۋتبولشىلارى ەكىنشى تايمدى دا وتە شيراق باستادى. جەرلەستەرىمىز ءبىرىنشى تايمداعىداي ەكى قاپتال ارقىلى شابۋىل ۇيىمداستىرىپ, قاقپا كىلتىن تابۋعا تىرىسقان ەدى. بىراق بوسنيالىق تاجىريبەلى قورعاۋشىلار گول سوعۋعا مۇمكىندىك بەرمەدى. ال كەزدەسۋدىڭ 66-مينۋتىندا سمايل پرەۆلياك قاقپاشىمەن بەتپە-بەت قالىپ, ءدۋبلدىڭ اۆتورى اتاندى – 2:0. ماتچتىڭ سوڭعى مينۋتتارىنداعى ستاندارت جاعدايىندا باقتيەر زاينۋتدينوۆ جۇبانىش گولىن سوعىپ, ەسەپ ايىرماسىن قىسقارتقان ەدى. الايدا يتاليادان كەلگەن باس تورەشى قاقپاشىعا قارسى ويىن ءتارتىبى بۇزىلدى دەپ, بۇل گولدى ەسەپكە المادى.
ماتچتان كەيىن قازاقستان قۇراماسىنىڭ باس باپكەرى تالعات بايسۋفينوۆ ويىن تۋرالى ءوز پىكىرىن ءبىلدىردى. «نەگىزى ويىندى جاقسى باستادىق. بىراق ەكى قاتەلىك جىبەرىپ, قاقپامىزعا ەكى گول وتكىزىپ الدىق. ءۇزىلىس كەزىندە فۋتبولشىلاردان «نەگە قورقاسىڭدار؟» دەپ سۇرادىم. بىراق بۇل تۋرالى كەيىنىرەك سويلەسەيىك. قازىرشە ءبىز ءبىرىنشى نومىرمەن ويناۋعا دايىن ەمەسپىز. بۇل فۋنكتسيونالدى جاتتىعۋلارعا بايلانىستى ەمەس. مەنىڭ ويىمشا, بۇل پسيحولوگيا مەن مەنتاليتەتكە تىكەلەي قاتىستى. ءبىزدىڭ باسىمىزدا قارسىلاس ءبىرىنشى نومىرمەن ويناۋعا مۇمكىندىك بەرمەيدى دەگەن وي قالىپتاسىپ قالعان. جىگىتتەرمەن سويلەسىپ, وسى جاعدايدى تالقىلاۋ كەرەك», دەدى تالعات بايسۋفينوۆ.
ەندى قازاقستان ۇلتتىق قۇراماسى كەلەسى ويىنىن ەرتەڭ تاعى «استانا ارەنادا» فينليانديا قۇراماسىمەن وتكىزەدى.
