كەزدەسۋ بارىسىندا تاراپتار ءسۇتتى باعىتتاعى مال شارۋاشىلىعى سالاسىنداعى ەكىجاقتى ىنتىماقتاستىق ماسەلەلەرىن تالقىلادى.
مينيستر ءوز سوزىندە ءسۇتتى مال شارۋاشىلىعىن دامىتۋ قازاقستانداعى اگروونەركاسىپتىك كەشەندى دامىتۋدىڭ ۇلتتىق جوباسى تۇجىرىمداماسىنىڭ نەگىزگى باسىمدىقتارىنىڭ ءبىرى بولىپ تابىلاتىنىن اتاپ ءوتتى.
قازىرگى ۋاقىتتا 2021-2025 جىلدارى ارالىعىندا جالپى وندىرىستىك قۋاتى جىلىنا 597,7 مىڭ توننا ءسۇت وندىرەتىن 106,8 مىڭ باسقا ارنالعان 169 ءسۇت-تاۋار فەرماسىن ىسكە قوسۋ جونىندەگى جوسپار ازىرلەنگەن.
ءسۇت-تاۋار فەرمالارىنىڭ قوسىمشا قۋاتتارىن ىسكە قوسۋ رەسپۋبليكانىڭ ىشكى نارىعىن 2024 جىلدىڭ سوڭىنا قاراي وتاندىق ءسۇت ونىمدەرىمەن 100% - عا قامتاماسىز ەتۋگە مۇمكىندىك بەرەدى. بۇل سايكەسىنشە ءسۇت ونىمدەرىن وزگە ەلدەرگە ەكسپورتتاۋ كولەمىن ۇلعايتادى.
بۇل سالاعا شەتەلدىك ينۆەستيتسيالاردىڭ كەلۋى ونىڭ جوسپارلى دامۋىنا ىقپال ەتەدى. بۇگىندە ينۆەستورلارعا ء«بىر تەرەزە» قاعيداتى بويىنشا قىزمەتتەردىڭ تولىق سپەكترى كورسەتىلەدى. سونداي-اق, ينۆەستيتسيادان كەيىنگى كەزەڭدە دە تولىق مونيتورينگ جۇرگىزىلىپ, ءاربىر ينۆەستورمەن ناقتى جوبالاردىڭ اياسىندا بارلىق دەڭگەيلەردە ءتيىستى جۇمىستار اتقارىلادى.
«قازاقستان رەسپۋبليكاسىنىڭ زور ينۆەستيتسيالىق الەۋەتى بار. ءبىز ينۆەستورلار ءۇشىن ءتيىستى جاعداي جاساۋ, ينۆەستيتسيالارعا كەپىلدىك بەرۋ, ولاردىڭ قاۋىپسىزدىگىن قامتاماسىز ەتۋ جانە ءتۇرلى تاۋەكەلدەردى بارىنشا ازايتۋ ءۇشىن بارلىق قاجەتتى جۇمىستاردى جۇرگىزەمىز», - دەدى مينيستر.
ءوز كەزەگىندە ايدان تىنان Baladna Food Industries كومپانياسىنىڭ قىزمەتى جانە الداعى دامۋ جوسپارلارى تۋرالى ايتىپ, ءسۇت ونىمدەرىن تۇتىنۋدىڭ ءوسۋى جانە حالىقتىڭ كوبەيۋى ەسەبىنەن بولاشاقتا ءسۇتتى تۇتىنۋ تەك ارتا تۇسەتىنىن اتاپ ءوتتى. ايدان تىناننىڭ ايتۋىنشا, قازاقستان رەسپۋبليكاسىنىڭ وڭتۇستىك-شىعىس ازيا ەلدەرىنە ءسۇت جانە ءسۇت ونىمدەرىن ەكسپورتتاۋشى ەل بولۋىنا بارلىق مۇمكىندىكتەرى بار.
سونداي-اق, ايدان تىنان مينيسترگە قازاقستاننىڭ كاسىپكەرلەرىمەن كەزدەسۋلەر وتكىزگەنىن جانە وندا بىرقاتار ينۆەستيتسيالىق جوبالار تانىستىرىلعانى تۋرالى حابارلادى. اتاپ ايتقاندا, الماتى قالاسىنداعى 250-دەن استام جوعارى بىلىكتى جۇمىس ورىندارىن قۇرا وتىرىپ, قۋاتى تاۋلىگىنە 150 توننا شيكىزات بولاتىن ىرىمشىك ءوندىرۋ زاۋىتىن سالۋ جوباسى تۋرالى ايتتى.
تاعى ءبىر ينۆەستيتسيالىق جوبا قوستاناي وبلىسىندا جىلىنا 106 مىڭ توننا ءونىم شىعاراتىن شيكى سيىر ءسۇتىن وندىرۋگە ارنالعان 8 ءسۇت-تاۋار فەرماسىن سالۋ بولىپ تابىلادى.
«ەكسپورتتىق الەۋەتتى دامىتۋ جانە يننوۆاتسيالىق ەكونوميكانى دامىتۋ تۇرعىسىنان ەل الدىنا قويعان ماقساتتاردى ەسكەرە وتىرىپ, ءبىزدىڭ كەزدەسۋىمىز وتە ماڭىزدى ەكەنىن اتاپ وتكىم كەلەدى. قازاقستان رەسپۋبليكاسى اۋىل شارۋاشىلىعى مينيسترلىگى ينۆەستيتسيالىق جوبالاردى ىسكە اسىرۋعا قولداۋ كورسەتۋگە جانە جان - جاقتى كومەك كورسەتۋگە دايىن», دەدى ەربول قاراشوكەەۆ.
كەزدەسۋ قورىتىندىسى بويىنشا تاراپتار كەلىسسوزدەر ناتيجەلەرىنە سايكەس, بارلىق اسپەكتىلەر بويىنشا ىنتىماقتاستىقتى جالعاستىرۋ تۋرالى ۋاعدالاستى.
