فوتو: Life.ru
ددسۇ بىرنەشە ەلدە حانتاۆيرۋس جۇقتىرۋ جاعدايلارىنىڭ جيىلەۋىنە بايلانىستى احۋالدى باقىلاۋعا الدى. قازىرگى تاڭدا يزرايل, فرانتسيا, شۆەيتساريا جانە نيدەرلاندىدا قاۋىپتى ىندەتتىڭ تارالۋى بايقالىپ وتىر. ماسەلەن, يزرايل دارىگەرلەرى ەلدەگى العاشقى جاعدايدى رەسمي تۇردە راستادى. Jerusalem Post باسىلىمىنىڭ مالىمەتىنشە, ناۋقاس ۆيرۋستى بىرنەشە اي بۇرىن شىعىس ەۋروپا اۋماعىندا جۇرگەندە جۇقتىرۋى مۇمكىن. قازىر ونىڭ جاعدايى تۇراقتى.
ەۋروپا ەلدەرىندە دە الاڭداۋشىلىق كۇشەيىپ وتىر. حانتاۆيرۋس جۇقتىرعاندار فرانتسيا, شۆەيتساريا جانە نيدەرلاندىدا تىركەلدى. The Sun باسىلىمىنىڭ جازۋىنشا, فرانتسيا ازاماتى ۆيرۋس انىقتالعان «MV Hondius» كرۋيزدىك لاينەرىنىڭ جولاۋشىسىمەن ءبىر رەيستە ۇشقان بولۋى ىقتيمال. سونىمەن قاتار نيدەرلاندىنىڭ KLM اۋە كومپانياسىنىڭ بورتسەرىگى دە ىندەت جۇقتىردى دەگەن كۇدىكپەن باقىلاۋعا الىندى.
كونگو-قىرىم قىزباسى: قاۋىپتى ۆيرۋستان قالاي قورعانۋعا بولادى؟
ددسۇ ەپيدەميولوگى ماريا ۆان كەركحوۆە قازىرگى جاعدايدى كوروناۆيرۋس پاندەمياسىمەن سالىستىرۋعا بولمايتىنىن ايتتى. ماماننىڭ سوزىنشە, حانتاۆيرۋس ادامدار اراسىندا وڭاي تارالمايدى جانە جۇعۋى ءۇشىن وتە تىعىز بايلانىس قاجەت. عالىمدار بۇل ينفەكتسيانىڭ ادامنان ادامعا بەرىلۋ ىقتيمالدىعىن زەرتتەپ جاتقانىمەن, مۇنداي جاعدايلاردىڭ وتە سيرەك كەزدەسەتىنىن العا تارتادى.
ايتا كەتەرلىگى, ۆيرۋستىڭ جاسىرىن كەزەڭى التى اپتاعا دەيىن سوزىلۋى مۇمكىن. سوندىقتان الداعى ۋاقىتتا ناۋقاستار سانىنىڭ ارتۋى ىقتيمال.
ەسكە سالا كەتەيىك, MV Hondius كرۋيزدىك لاينەرىندە حانتاۆيرۋس ىندەتى تاراپ ءۇش ادام قازا تاپقان بولاتىن. الايدا ماماندار ۆيرۋس تاسىمالداۋشىسى سانالاتىن كەمىرگىشتەردىڭ لاينەر بورتىنان تابىلماعانىن مالىمدەدى. قازىرگى تاڭدا بورتىندا 150-گە جۋىق ادامى بار كەمە كابو-ۆەردە جاعالاۋىندا تۇر. لاينەر يسپانيانىڭ تەنەريفە ارالىنا بەت العان. كەيبىر جولاۋشىلار ينفەكتسيا تۋرالى رەسمي اقپارات جاريالانباي تۇرىپ كەمەدەن ءتۇسىپ كەتكەندىكتەن, بىرنەشە ەل ولاردىڭ جۇرگەن جەرىن انىقتاۋعا كىرىستى. تەنەريفەگە جەتكەن سوڭ دەنى ساۋ جولاۋشىلاردى ەلدەرىنە قايتارۋ جوسپارلانعان. يسپانيانىڭ 14 ازاماتى مادريدتەگى اسكەري گوسپيتالدە كارانتينگە ورنالاستىرىلادى.
اسىلجان قۇرمانعالي
