فوتو: Depositphotos. com
ايتا كەتەيىك, ۇشقىشسىز جۇيەلەردى پايدالانۋداعى نەگىزگى ماقسات – جەردەگى جاعداي تۋرالى اقپاراتتى ناقتى ۋاقىت رەجيمىندە جەدەل الۋ جانە قامتاماسىز ەتۋ, ءتۇرلى مىندەتتەردى ءتيىمدى ورىنداۋدى ارتتىرۋ. مۇنداي ىستەردىڭ قاتارىنا ءارتۇرلى جۇكتەردى جەتكىزۋ, جارالانعانداردى ىزدەۋ جانە ەۆاكۋاتسيالاۋ, سونداي-اق تابيعي جانە تەحنوگەندىك سيپاتتاعى توتەنشە جاعدايلاردىڭ سالدارىن جويۋ شارالارىنا قاتىسۋ جاتادى.
قارۋلى كۇشتەردىڭ باس شتابىنىڭ ۇشقىشسىز اۆياتسيالىق جۇيەلەر جانە روبوتوتەحنيكا كەشەندەرى دەپارتامەنتى باستىعىنىڭ ورىنباسارى ءامىر قاسەنوۆ اسكەردە دروندار قانداي نەگىزگى مىندەتتەردى ورىندايتىنىن, ۇشقىشسىز جۇيەلەر قارۋلى كۇشتەردە كەڭ اۋقىمدى مىندەتتەردى اتقاراتىنىن اتاپ ءوتتى.
«دروندار مەملەكەتتىك شەكارانى پاترۋلدەۋ, سوققى بەرۋ مىندەتتەرىن ورىنداۋ, سونداي-اق ءارتۇرلى قامتاماسىز ەتۋ تۇرلەرى بويىنشا تاپسىرمالاردى جۇزەگە اسىرادى. ولاردىڭ قاتارىنا راديوەلەكتروندىق كۇرەس, رادياتسيالىق, حيميالىق جانە بيولوگيالىق قورعانىس, ەكولوگيالىق قاۋىپسىزدىك, بايلانىس جانە باسقا دا باعىتتار جاتادى», دەدى ول.
ءامىر ساعىندىق ۇلى اتاپ وتكەندەي, اسكەري قىزمەتشىلەردى وقىتۋ قورعانىس مينيسترلىگىنىڭ جوعارى اسكەري وقۋ ورىندارى مەن اسكەري كوللەدجدەرى بازاسىندا جۇزەگە اسىرىلادى. اسكەرلەردە وقىتۋ قارۋلى كۇشتەردىڭ تۇرلەرى مەن اسكەر تەكتەرىنە قاراي وقۋ ورتالىقتارىندا جۇرگىزىلەدى. سونداي-اق ول درونداردى قۇراستىراتىن اسكەري قىزمەتشىلەردى وقىتۋ نەنى قامتيتىنى تۋرالى توقتالدى.
«وقۋ باعدارلاماسى تەوريالىق جانە پراكتيكالىق بولىمدەردەن تۇرادى. الدىمەن ءبىلىم الۋشىلار ۇشقىشسىز جۇيەلەردىڭ ماقساتتارى مەن مىندەتتەرى تۋرالى جالپى تۇسىنىك الادى, سودان كەيىن دروننىڭ جۇيەلەرى مەن باعدارلامالىق قامتاماسىز ەتۋىمەن تانىسادى. كەيىن اسكەري قىزمەتشى سيمۋلياتوردا پراكتيكالىق دايىندىقتان ءوتىپ, كەيىن ناقتى ۇشۋ تاپسىرمالارىن ورىنداۋعا كىرىسەدى», دەدى ول.
ال ءبىر ۇشقىشسىز جۇيەنى قۇراستىرۋعا جۇمسالاتىن قاجەتتى ۋاقىت ونىڭ تۇرىنە جانە ماماننىڭ دايىندىق دەڭگەيىنە بايلانىستى وزگەرۋى مۇمكىن.
«كۆادروكوپتەر تيپىندەگى ۇشقىشسىز جۇيەنى تاجىريبەلى مامان شامامەن 3-6 ساعاتتا قۇراستىرا الادى, ال «جاڭادان ۇيرەنۋشى» ءۇشىن بۇل ۋاقىت 1-2 تاۋلىككە دەيىن سوزىلۋى مۇمكىن», دەدى ءا. قاسەنوۆ.
قۇراستىرىلعاننان كەيىن دروندار ءارتۇرلى مانەۆرلەردى ورىنداۋ ارقىلى بىرقاتار سىناقتىق ۇشۋلاردان وتەدى. بۇل ۇشۋلار ءارتۇرلى اۋا رايى جاعدايلارىندا, كۇندىز جانە تۇندە جۇرگىزىلىپ, ۇشۋ-تەحنيكالىق سيپاتتامالارى راستالادى. اتالعان سىناقتاردان كەيىن دروندار اسكەري بولىمدەرگە جىبەرىلەدى.
ءا. ساعىندىق ۇلى ۇشقىشسىز اۆياتسيالىق جۇيەلەر وپەراتورلارىن دايارلاۋ تۋرالى دا ايتىپ بەردى. ونىڭ ايتۋىنشا, وپەراتورلاردى ۇشۋعا دايارلاۋ الدىن الا جانە تىكەلەي دايىندىق كەزەڭدەرىنەن تۇرادى.
«الدىن الا دايىندىق بارىسىندا وپەراتور ۇشقىشسىز جۇيەلەردى, ولاردىڭ مۇمكىندىكتەرىن زەرتتەيدى, سونداي-اق مىندەتتەردى ورىنداۋدىڭ ءارتۇرلى تاسىلدەرى بويىنشا ءبىلىمىن جەتىلدىرەدى. بارلاۋ نىساندارىنىڭ سيپاتتامالارىن مەڭگەرەدى جانە سيمۋلياتورلاردا ۇشۋ جاتتىعۋلارىن ورىندايدى.
تىكەلەي دايىندىق كەزىندە وپەراتورلار ناقتى مىندەتتەردى ورىنداۋعا كىرىسەدى, جاعدايدى زەردەلەيدى, مارشرۋتتاردى جوسپارلايدى جانە قويىلعان تاپسىرمالاردى ورىنداۋدىڭ ادىستەرى مەن تاكتيكالىق تاسىلدەرىن ايقىندايدى», دەپ تۇيىندەدى ءامىر قاسەنوۆ.
