باياناۋىل اۋدانىندا ەگىندىبۇلاق اۋىلىن قار باسىپ قالعان. جەرگىلىكتى تۇرعىن مايا ماناشەۆا قار باسقان اۋلاسىن ۆيدەوعا ءتۇسىرىپ, تۋىستارىنا جىبەرگەن. كەيىن ۆيدەو الەۋمەتتىك جەلىلەردە پايدا بولدى. ونىڭ ارتىنان جەلىدە ايەل ادامنىڭ كەشىرىم سۇراعانى تۇسىرىلگەن تاعى ءبىر ۆيدەو تارادى.
كەيىن اۋدان اكىمدىگىندە بولعان جاعدايعا قاتىستى تۇسىنىكتەمە بەردى: اۋىل اكىمى سامات ىبىراەۆ ايەل ادامعا كومەككە مۇقتاجدىعىن ءبىلۋ ءۇشىن كەلگەن.
ول اۋدان اكىمىنىڭ الەۋمەتتىك جەلىلەردەگى شاعىمدارعا بايلانىستى ارەكەت ەتۋ تۋرالى تاپسىرماسىن ورىنداۋ ءۇشىن زەينەتكەردى ۆيدەوكامەراعا تۇسىرگەنىن تۇسىندىرگەن.
مايا ماناشەۆا شاعىمى جوق, كومەككە مۇقتاج ەمەس ەكەنىن, الەۋمەتتىك جەلىدە ۆيدەونى كىمنىڭ جاريالاعانىن بىلمەيتىنىن ايتتى.
ال باياناۋىل اۋدانىنىڭ اكىمىنە قولاستىنداعى ادامنىڭ ارەكەتى ءۇشىن كەشىرىم سۇراۋعا تۋرا كەلدى.
قر مەملەكەتتىك قىزمەت ىستەرى اگەنتتىگىنىڭ وڭىرلىك دەپارتامەنتىندە اۋىل اكىمىنە قاتىستى قىزمەتتىك تەرگەۋ باستالعانى جايلى حابارلادى.
- قازىرگى ۋاقىتتا اۋىلدىق وكرۋگ اكىمىنە قاتىستى تارتىپتىك ءىس قوزعالدى. سول بويىنشا قىزمەتتىك تەرگەۋ جۇرگىزەتىن بولامىز. قىزمەتتىك تەرگەۋ قورىتىندىسى بويىنشا ءتيىستى شەشىم قابىلدانادى. ەگەر جاۋاپتى ادامنىڭ كىناسى راستالسا, ول تارتىپتىك جاۋاپكەرشىلىككە تارتىلادى. تارتىپتىك نورمالاردى بۇزعانى ءۇشىن جاسالعان تەرىس قىلىقتىڭ اۋىرلىعىنا بايلانىستى ەسكەرتۋدەن باستاپ جۇمىستان شىعارۋعا دەيىن تارتىپتىك جاۋاپكەرشىلىك كوزدەلگەن, - دەپ ناقتىلادى ۆەدومستۆودا.
