استىنداعى تۇلپارىنىڭ بابىن تاپقان باتىرلار ءداستۇرلى اسىق اتۋ ويىنىندا باق سىناسا, ال ءاپايتوس بالۋاندارىمىز قازاق كۇرەسىنىڭ ءسانىن كەلتىرمەك. ال شاقار دا شاندوز شاباندوزدار كۇش پەن بىلەك جانە اقىل مەن قايرات قاتار توپقا تۇسەتىن كوكپار ويىنىندا كىمنىڭ مىقتى ەكەنىن انىقتاماق.
رەسپۋبليكامىزدىڭ تۇكپىر-تۇكپىرىنەن جينالعان سپورتشىلار – ءوز ايماعىندا ىرىكتەۋدەن ءوتىپ, ۇزدىكتەر قاتارىنان تابىلعاندار. سولتۇستىك قازاقستان, وڭتۇستىك قازاقستان, باتىس قازاقستان, شىعىس قازاقستان وبلىستارىنىڭ تاڭداۋلى سپورتشىلارى ۇلتتىق ويىندارىمىزدىڭ كوركىن قىزدىرماق نيەتتە.
جالپى العاندا 7 ويىن تۇرىنەن جارىستار وتكىزۋ جوسپارلانعان ەكەن. اتاپ ايتساق, اسىق اتۋ, قازاق كۇرەسى, توعىزقۇمالاق, اۋدارىسپاق, كوكپار, جامبى اتۋ, تەڭگە ءىلۋ. بۇل – بابامىزدان بىزگە جەتكەن اسىل مۇرا, قازاقتىڭ قانىنا سىڭگەن باسەكەلى بايگەلەر. سوندىقتان ءار وڭىردەن ءوز باعىن سىناۋ ءۇشىن كەلگەن جالىندى جىگىتتەردىڭ ەرلىگىنە سۇيسىنۋگە بولادى.
وتىز جىلدىق تورقالى تويعا ورايلاستىرىلعان ۇلان-عايىر سپورت شاراسىن ۇيىمداستىرۋعا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنە قاراستى «ۇلتتىق جانە ات سپورتى تۇرلەرى ورتالىعى» رمقك مۇرىندىق بولىپ وتىرعانىن دا ايتا كەتەيىك. ۇلتتىق ويىندار قازاق مادەنيەتىنىڭ اجىراماس بولىگى ەكەنى داۋسىز. وندا حالىقتىڭ ءومىرى مەن مىنەزى جاتىر.
دەنەشىنىقتىرۋ سالاسى – مەملەكەت ساياساتتىنىڭ ماڭىزدى بولىگى. اسىرەسە, ۇلتتىق ويىندارىمىز ۇلتتى بىرىكتىرەتىن ۇلكەن كۇشكە يە.
