سۋرەتشى دجون ميللە «وفەليا» كارتيناسىنا نەگىز رەتىندە ۋيليام شەكسپيردىڭ «گاملەت» پەساسىنان سيۋجەت الادى. بۇل – سۇيىكتىسى اكەسىنىڭ قولىنان ولگەنىن ءبىلىپ, ءوز-وزىنە قول جۇمساعان قىزدىڭ اجال قۇشاعىنداعى بەينەسى. مۇندا ونىڭ وزەنگە قۇلاعان ءساتى بەرىلگەن. ارۋ مۇڭلى ءاننىڭ ىرعاعىنا تەربەلىپ بارا جاتقانداي. ەكى قولىن قۇس قاناتىنداي جايىپ جىبەرىپ, كوز جانارىن اسپانعا قادايدى. سوندىقتان ونىڭ قالىبىن كوپتەگەن وقىرمان ايقىشقا شەگەلەنگەن يسا ماسىحپەن بايلانىستىرادى.
وفەليا بىرتە-بىرتە ەرەكشە تۇستەرمەن تارالعان تۇمسا تابيعاتتىڭ قوينىنا سۇڭگىپ بارا جاتقانداي. سۇيگەنىنەن ايىرىلعان سۇلۋدىڭ جۇزىندە قورقىنىش تا, ۋايىم دا جوق. ول ومىرمەن تەزىرەك قوشتاسىپ, ولىممەن كەزدەسۋگە اسىعاتىن سەكىلدى.
اعىلشىن سۋرەتشىسىنىڭ بۇل تۋىندىسى تەك قانا قىز تاعدىرىنان حابار بەرمەيدى, وندا تابيعات تا ەگجەي-تەگجەي سۋرەتتەلگەن. سان الۋان بوياۋعا ورانعان وسىمدىكتەر بەلگىلى ءبىر سيمۆولدار رەتىندە ارەكەت ەتەدى.
قاراڭىزشى, سارى مايلى ءتۇس – ادالدىقتى بىلدىرەدى. وفەليانىڭ بەتىنە يىلگەن تال جاپىراقتارى – ماحابباتتان باز كەشكەن مەزەتى, قالاقاي – اۋىرسىنۋ, ال تۇيمەداق – قىزدىڭ كىناسىزدىگىنىڭ كورىنىسى.
سۋدا جۇزگەن راۋشاندار – ءداستۇرلى تۇردە ماحاببات سيمۆولى. كارتينانىڭ بۇرىشىنا ورنالاستىرعان شالعىن – نونسەنس, ماعىناسىز جاس قىزدىڭ ءولىمى. سۋ بەتىندە قالقىپ جۇرگەن قىزىل ادونيس – جاننىڭ مۇڭ-زارى, كويلەگىنىڭ ەتەگىندەگى ورنەكتەر جاۋاپسىز ماحابباتتىڭ بەلگىسى ىسپەتتى.
ميللەنىڭ كارتيناسىندا قولدانعان رەڭكتەر وتە تەرەڭ ماعىناعا يە. وزەننىڭ باتپاق ءتارىزدى كورىنۋى ەرتەڭگى كۇندەرىنىڭ قاراڭعىلىققا تولى بولاتىنىن سيپاتتاپ تۇر. ال ونىڭ اعىسى و دۇنيەدەن حابار بەرەدى.
سۋرەتشى ءوز تۋىندىسىن قالاي جازعانى قىزىق. بىرىنشىدەن, ول فون تاڭداعان, تابيعات اياسىندا بىرنەشە ساعات بويى پەيزاج سىزادى. سودان كەيىن شەبەرحاناعا اۋىسادى. ارنايى شاقىرىلعان مودەل سۋىققا توزە وتىرىپ, ۆاننادا وفەليا كۇيىندە ۇزاق جاتقان ەكەن. بۇل اۋىر دا ۇزاق شىعارماشىلىق پروتسەستىڭ بەرگى بەتى عانا. ال ونى جەتكىزۋدەگى اۆتوردىڭ جان كۇيى مەن سەزىمى قۇپياعا تولى مۇحيت تارىزدەس. تەك ونى وزىنەن باسقا ەشكىم سەزىنە المايدى.
