ايماقتار • 07 قازان، 2021

مەنشىكتى ءتىلشى مۇمكىندىگى شەكتەۋلى جانداردىڭ ماسەلەسىن كوتەردى

70 رەت كورسەتىلدى

«Nur Otan» پارتياسىنان سايلانعان تۇركىستان وبلىستىق ءماسليحاتىنىڭ دەپۋتاتى رەتىندە، سول وڭىردەگى ءتىلشىمىز عالىمجان ەلشىباي مۇمكىندىگى شەكتەۋلى جانداردىڭ ماسەلەسى «كەدەرگىسىز كەلەشەك» باعدارلاماسىنداعىداي بولعانىن ماقۇل كورەدى، دەپ جازادى Egemen.kz.

باس پارتيانىڭ اتالعان باعدارلاماسىندا ەرەكشە قاجەتتىلىكتەرى بار ادامداردىڭ قوعامنان تىس قالماي، ەمىن-ەركىن ءجۇرىپ-تۇرۋىنا وڭتايلى جاعداي جاساپ، كەدەرگىسىز ورتا قالىپتاستىرۋعا ءمان بەرىلگەن. سونداي-اق قوعامدىق نىسانداردىڭ پاندۋستارمەن، بەيىمدەلگەن ليفتتەرمەن، دارەتحانالارمەن، زاعيپتارعا ارنالعان باعىتتاۋشى بەلگىلەرمەن قامتاماسىز ەتۋ قارالعان.

وركەنيەتتى ەل ساناتىندا ەڭسە تىكتەۋ، تەك ەكونوميكانىڭ قارقىنىمەن ولشەنبەيتىنىن ەسكەرگەن عالىمجان ەلشىباي ەرەكشە جانداردىڭ وزدەرىن قوعامنان جات سەزىنبەۋى ءۇشىن قولايلى جاعداي جاسالۋى ءتيىس ەكەنىن تىلگە تيەك ەتتى.

ءوزى دە قازاق قوعامىنىڭ مۇشەسى، جەرگىلىكتى ءماسليحاتتىڭ دەپۋتاتى رەتىندە جاڭارعان، تۇرلەنگەن تۇركىستاندا مۇمكىندىگى شەكتەۋلى جانداردىڭ قوناق بولۋىنا مۇرىندىق بولدى. ءبىرىنشى جانە ەكىنشى توپتاعى مۇگەدەك جاندار، ولاردىڭ كۇتۋشىلەرى مەن الەۋمەتتىك سالا ماماندارىن قوسقاندا جالپى سانى 20 ادام ەلىمىزدىڭ رۋحاني استاناسىنا ساپار شەگىپ، تاريحي، كورىكتى ورىنداردى كورىپ قايتتى.

تەلەديداردان تاماشالاپ قانا تامسانىپ جۇرگەندەردىڭ قۋانىشىن الەۋمەتتىك جەلىدەگى پاراقشاسى ارقىلى جۇرتشىلىققا جاريالادى.

«ساياحاتشىلار اۋەلى تۋريستەرگە قىزمەت كورسەتۋ ماقساتىندا اشىلعان «ۆيزيت ورتالىعىندا» بولىپ، ەتنوگرافيالىق زال مەن «قازاق حاندىعى» زالىنداعى ەكسپوناتتاردى تاماشالادى. ارينە، تۇركىستانعا بارىپ تۇرىپ ايگىلى قوجا احمەت ياسساۋي كەسەنەسىنە زيارات جاساپ شىقپاۋ مۇمكىن بە؟ كەسەنەدەگى زيارات، اتاقتى تايقازان جانىندا جان-جاقتى پىكىر الماسۋ كەرەمەت اسەر سىيلادى. سونداي-اق اۋەندى سۋبۇرقاق، ەتنواۋىل جانە « ۇلى دالا ەلى» ورتالىعىن ارالادى. قازاق ەلىنىڭ تاريحى مەن مادەنيەتى تۋرالى ءارتۇرلى تاقىرىپتى اشاتىن 9 ەكسپوزيتسيالىق ايماقتان تۇراتىن ورتالىقتا قۇندى اقپاراتتار ايتىلدى. ال كەرۋەن ساراي تۋريستىك كەشەنىمەن تولىق تانىسىپ شىعۋعا التىن ۋاقىت جەتپەگەندىكتەن امالسىز «كەلەسى جولى كەلگەندە دە كورەتىن جەر قالسىن»، دەپ ءوز-ءوزىمىزدى جۇباتىپ ساپارىمىزدى سول نۇكتەدەن تۇيىندەدىك»، دەپ جازدى عالىمجان ەلشىباي.

ەرەكشە ساياحاتشىلاردىڭ تەبىرەنىسى مەن شىن قۋانىشىن جەلىدەگى جازبادا ءبولىستى.

ەۋروپاداعى مۇمكىندىگى شەكتەۋلى جانداردىڭ 70 پايىزىنا جۋىعى جىلدا ءتۇرلى ورىندارعا ساياحاتتاپ تۇرادى ەكەن. ءبىزدىڭ ەلدەگى جاعدايدىڭ دا وسى دارەجەگە جەتۋىنە ءتىلشى دە مۇددەلى ەكەندىگىن ءبىلدىردى.

1

1

سوڭعى جاڭالىقتار

«وميكرون» جەدەل تارالۋدا

الەم • بۇگىن، 08:23

ۇقساس جاڭالىقتار