سابيلەرگە ساۋلىق سىيلاعان

ەڭبەك جولىن ەلورداداعى ونكو­لوگيا ورتالىعىندا باستاسا، ءارى قاراي بالالاردى وڭالتۋ باعىتىندا جۇمىس ىستەپ كەلە جاتىر. بۇعان قوسا، Best for Kids قوعامدىق قورىنىڭ جانە «داري دوبرو» باستا­ماشىل ۇيىمىنىڭ، سون­داي-اق ونكو­لو­گيالىق دياگنوزى بار بالالارعا كومەك كورسەتەتىن توپتىڭ بەلسەندى مۇشەسى.

رەابيليتولوگ دارىگەر تىرەك-قي­مىل جۇيەسى بۇزىلعان بالالارعا جار­دەم­دەسىپ، دەنساۋلىقتارىن وڭالتۋعا كومەكتەسەدى. لاتيف پارپيەۆ «اتا-انا­لارعا ارنالعان مەكتەپ» جانە «رەاني­ماتسيا جانە ينتەنسيۆتى تەراپيا ءبولىمى مەن جاڭا تۋعان سابيلەردىڭ پاتولوگيا ءبولىمى جاعدايىنداعى بالالاردى ەرتە وڭالتۋ» سەكىلدى جوبالاردىڭ نەگىزىن قالادى. ەكىنشى جوباعا رەانيماتسيا مەن ينتەنسيۆتى تەراپيا كەزىندەگى ءتۇر­لى اۋرۋلاردىڭ اسقىنۋىنىڭ الدىن الۋ شارالارى ەنگىزىلگەن. اتالعان باستامالاردىڭ اياسىندا دارىگەرلەر مەن مەديتسينالىق قىزمەتكەرلەرگە، رەس­پۋبليكانىڭ ءارتۇرلى قالالارىن­داعى اتا-انالارعا 15-تەن استام مەدي­تسينالىق ماستەر-كلاستار وتكىزىلگەن. يگى باستاما قازاقستاندا عا­نا سەرپىن الىپ قويماي، شەتەلدەردە دە 10 مىڭ­نان استام بالاعا ەم-دوم جاسالدى. بۇدان بو­لەك، لاتيف پارپيەۆ وتاندىق رەابيليتولوگ-دارىگەرلەرمەن بىرگە كوروناۆيرۋس ىندەتىمەن اۋىر­عان ناۋقاس­تاردىڭ دەن­ساۋلىعىن قالپىنا كەل­تىرۋ ءۇشىن بىرنەشە تا­نىمدىق بەينەساباق ءتۇ­سىرىپ، قامكوڭىل جاندارعا قولۇشىن سوزا ءبىلدى.

وعان قوسا، جاس دارىگەر نەۆرو­لو­­گيالىق، ورتوپەديالىق، تراۆما­تو­لوگيالىق، ونكولوگيالىق جانە جۇ­رەك قان-تامىر جۇيەسىندەگى وپەرا­تسيادان كەيىن ەرەسەكتەر مەن بالا­لار­دىڭ دەنساۋلىعىن وڭالتۋ پروتسەدۋ­رالارىمەن اينالىسادى. ونىڭ نە­گىزگى مىندەتتەرىنە ەمدىك دەنە ماسساجى، لوگوپەديالىق ماسساج، دەنە شى­نىقتىرۋ، سونىمەن قاتار دەنە ءبىتىمى وزگەرگەن ناۋقاستارعا ەم تاعايىنداۋ جاتادى. اق حالاتتى ابزال جان جۇمىس ۋاقىتىندا تىرەك-قيمىل جۇيەسى بۇزىل­عان بالالارعا كومەكتەسسە، بوس ۋاقى­تىندا شالا تۋعان نارەستەلەرگە ارنايى كيىم توقىپ تاراتادى.

ستاتيستيكالىق زەرتتەۋلەر بويىن­شا ەلىمىزدە جىل سايىن مىڭداعان نارەستە شالا دۇنيەگە كەلىپ، سالماعى 1 000 گرام­نان تومەن بولادى ەكەن. دارىگەردىڭ جۇن­نەن توقىعان كيىمدەرى بالالاردىڭ جۇي­كە تالشىقتارىن وياتىپ، ولاردىڭ دەن­ساۋ­لىعى تەز وڭ­الىپ كەتۋىنە سەپتىگىن تي­گى­زەدى. سونى­مەن بىرگە ول كۇنىنە 2 جاس­قا دەيىنگى سابيلەر مەن ودان جوعارى جاس­تاعى سكو­ليوز دەرتىنە شالدىققان 15-كە جۋىق ناۋ­قاستى قابىلدايدى. تاعى ءبىر ايتا كەتەرلىگى، اۋىر جاعدايدا جات­قان سابيلەر بولسا، جانساقتاۋ بولىمىنە بارىپ كومەكتەسىپ قايتادى ەكەن.

ۋاقىتىنىڭ تىعىزدىعىنا قارا­ماستان، تاڭەرتەڭ بالالارعا بۇلشىق ەت جاتتىعۋى مەن گيمناستيكا جاساتسا، تۇستەن كەيىن كونسۋلتاتسيا وتكىزەدى. لاتيف پارپيەۆكە رەسپۋبليكانىڭ تۇكپىر-تۇكپىرىنەن ناۋقاستاردىڭ اتا-انالارى حابارلاسىپ، Instagram جانە WhatsApp جەلىلەرىندە كەڭەس سۇرايدى. پاندەميا باستالماي تۇرىپ، وعان الىس-جاقىن شەتەلدەردەن، اسىرەسە رەسەي مەن ۋكراينادان ەمدەلۋشى ناۋقاستار كوپ كەلگەن. الايدا ىندەت ەتەك جايا باستاعاننان كەيىن ەمدىك ءىس-شارالارى كەيىنگە شەگەرىلگەن.

لاتيف پارپيەۆ سەكىلدى اۋىر حال­دەگى بالالاردى، ونىڭ ىشىندە 2 جاس­قا دەيىنگى سابيلەردى ەمدەيتىن رەابي­ليتولوگ-دارىگەرلەر ساۋساقپەن سا­نار­لىق. سوندىقتان جانىڭا مەدەۋ، دەن­ساۋلىعىڭا دەمەۋ بولاتىن دارى­گەرلەردىڭ قاتارى كوبەيە بەرسىن.