تۇركيادا نارازىلىق اكتسيالارى ءالى دە جالعاسۋدا

تۇركيادا ينتەرنەت قىزمەتىن شەكتەيتىن جاڭا زاڭعا قارسى جاپپاي نارازىلىق اكتسيالارى جالعاسۋدا. بۇل تۋرالى Novoteka.ru حابارلادى. دەرەككوزدىڭ اقپارى بويىنشا, باسىندا بەيبىت جاعدايدا بولعان شەرۋ سوڭى پوليتسيامەن قاقتىعىسقا ۇلاستى. ءتارتىپ ساقشىلارى اشىنعان توپتى تاراتۋ ءۇشىن كوز جاساۋراتاتىن گاز قولدانۋعا ءماجبۇر بولدى. بۇدان بۇرىن تۇركيا پارلامەنتى ينتەرنەت رەسۋرستارىنا كىرۋگە تىيىم سالاتىن زاڭ جوباسىن ماقۇلداعان ەدى. وعان سايكەس, ءتيىستى ورگاندار سوتتىڭ وردەرىنسىز اككاۋنتتى, ءتىپتى تۇتاس سايتتى جاۋىپ تاستاي الادى. الايدا, ەرەۋىلشىلەردىڭ پايىمىنشا,  بيلىك بۇل زاڭدى تاۋەلسىز جۋرناليستەر مەن ءوز ويلارىن ەركىن بىلدىرەتىن بلوگەرلەردىڭ قىزمەتىن شەكتەۋ ءۇشىن قابىلداماق. ال تۇركيا پرەمەر-ءمينيسترى تايپ ەردوگان قابىلدانۋعا ۇسىنىلعان جاڭا زاڭ ينتەرنەت قىزمەتىنىڭ قاۋىپسىزدىگىن قامتاماسىز ەتەتىنىن العا تارتتى. ايدار ورىسباەۆ. دەرەككوز: Novoteka.ru. فوتو: Gha.com.ua.