«2020 جىلى «سەرپىن» جوباسى بويىنشا 2653 ادام جوعارى جانە جوعارى وقۋ ورنىنان كەيىنگى ءبىلىم بەرۋ مەكەمەلەرىندە وقۋىن اياقتادى. «سەرپىن» باعدارلاماسىن ىسكە اسىرۋ ناتيجەسىندە 2018 جىلدان 2021 جىلعا دەيىن 7707 ادام وقۋدى اياقتادى, ونىڭ ىشىندە 5526 ادام جۇمىسقا ورنالاستىرىلدى (71,7%). 2018-2019 وقۋ جىلىنا 931 ادام وقۋ ءبىتىردى, ونىڭ ىشىندە 875 ادام جۇمىسقا ورنالاستىرىلدى (93,9%). 2019-2020 وقۋ جىلىنا 4123 ادام ءبىتىردى, ونىڭ ىشىندە 3238 ادام جۇمىسقا ورنالاستىرىلدى (78,5%). 2020-2021 وقۋ جىلىندا 2653 ادام وقۋىن اياقتادى, ونىڭ ىشىندە 1413 ادام (53,2%) جۇمىسقا ورنالاستىرىلدى», دەدى ەرالى توعجانوۆ دەپۋتاتتىق ساۋالعا.
ونىڭ ايتۋىنشا, جوبا تۇلەكتەرىن ودان ءارى جۇمىسقا ورنالاستىرۋ بويىنشا ءتيىستى جۇمىستار ءجۇرىپ جاتىر.
«كادرلاردى دايارلاۋ پەداگوگيكالىق, تەحنيكالىق جانە اۋىل شارۋاشىلىعى ماماندىقتارى بويىنشا جۇرگىزىلەدى. جوباعا قاتىسۋشىلاردى قابىلداۋ كۆوتاسى مەملەكەتتىك ءبىلىم بەرۋ تاپسىرىسىنىڭ جالپى كولەمىنىڭ 10% قۇرايدى. 2021-2024 جىلدارعا جوو بازاسىندا «سەرپىن» باعدارلاماسى بويىنشا كادرلار دايارلاۋعا 20624 گرانت كولەمىندە مەملەكەتتىك تاپسىرىس بەكىتىلدى», دەدى ۆيتسە-پرەمەر.
«سونىمەن قاتار «نۇر وتان» پارتياسىنىڭ سايلاۋالدى باعدارلاماسىن ىسكە اسىرۋ اياسىندا «سەرپىن» باعدارلاماسى بويىنشا مەملەكەتتىك تاپسىرىس 2025 جىلعا قاراي پەداگوگيكالىق ماماندىقتار بويىنشا تاعى 2000 گرانت بەرىلەدى», دەپ تولىقتىردى ە.توعجانوۆ.
