08 اقپان، 2014

قويدى قاسقىرعا باقتىرعاندا...

165 رەت كورسەتىلدى
قوستانايدا ەسىرتكى ساۋداسى جانە ولارعا «كوكەلىك» جاساعاندار جونىندەگى وتكەن جىلى باستالعان «شۋلى» ءىستىڭ نۇكتەسى قويىلدى. ادەتتە، پوليتسەيلەرگە ەلدىڭ تى­نىش­تىعىن قورعايدى، قىلمىستى ازايتۋعا اتسالىسادى دەپ سەنەمىز. ال پوليتسەي ەلدىڭ، ۇلتتىڭ، ءتىپتى، ادامزاتتىڭ بولاشاعى ءۇشىن قاۋىپتى دەرت سانالاتىن ەسىرتكى ساۋداسىنىڭ قىزا تۇسۋىنە «اتسالىسسا»، ونىمەن اينالىساتىنداردى «قورعاپ» وتىرسا، ولاردى قوي باقتىرعان قاسقىر دەمەگەندە نە دەيمىز؟ قانشاما ورىمدەي جاستار پوليتسەيلەر سىرتىنان «باس-كوز» بولىپ، «كوكەلىك» جاساپ وتىرعان ەسىرتكى ساۋداسىنىڭ قۇربانىنا اينالادى. وبلىستا وتكەن جىلى ەسىرتكى ساۋداسىمەن اينالىسقان وسىنداي ۇلكەن توپ قۇرىقتالىپ، سوتى بىرنەشە ايعا سوزىلعان ەدى. قىلمىستىق توپ 16 ادامنان تۇرادى. ونىڭ ىشىندە 6 ايەل – ەسىرتكى تاراتاتىن جۇگىرتەكتەر، ال ون قىلمىسكەر – شەنى سەرجانتتان مايورعا دەيىنگى بۇرىنعى پوليتسيا قىزمەتكەرلەرى. ەڭ قاۋىپتىسى دە وسى، جاس ۇرپاقتى ازدىرار ج ۇلىنقۇرتقا اينالعان ەسىرتكى بيزنەسىنە پوليتسەيلەر كىرىستى. ەل كىمگە سەنەدى؟ سوت ۇدەرىسىنە قاتىسقانداردى قيناعانى دا وسى وي ەدى. ال قوستانايدا ەسىرتكى تاراتاتىن ۇيىمداسقان قىلمىستىق توپ بۇگىن عانا بەلگىلى بولىپ وتىرعان جوق، ول مۇنداي ارام ىسپەن، گەروين ساتۋمەن كوپ جىلدان بەرى اينالىسىپ كەلگەن. اقىرىندا ءادىل سوت ولاردىڭ ارقايسىسىنا قىلمىس اۋىرلىعىنا قاراي جازا ۇكىمىن شىعاردى. توپقا جەتەكشىلىك جاساعان رەزيدا اسىلباەۆا مەن الەۆتينا پەترەنكونىڭ ارقايسىسى 20 جىلدان باس بوستاندىعىنان ايىرىلدى. نادەجدا كيسەلەۆاعا – 10 جىل، پولينا سەرەدەنكوۆاعا – 8 جىل، ليۋبوۆ وسەننيكوۆاعا – 10 جىل، ولگا چەبۋنيناعا 8 جىل بەرىلدى. ال ەسىرتكى بيزنەسىنە «قام­قورلىق» جاساعان پوليتسەيلەردىڭ اراسىندا جازانىڭ ەڭ اۋىرىن، ياعني 16 جىلدى پوليتسيا اعا لەيتەنانتى نۇرلان الماعانبەتوۆ ارقالادى. ودان كەيىن پوليتسيا اعا لەيتەنانتتارى ەرمەك ورازاقوۆ، سامات ەرماعامبەتوۆ، ريۆال عازيزۋللين جانە پوليتسيا كاپيتانى سەرىكجان مۇحامەدجانوۆتىڭ ارقايسىسى 15 جىل 5 ايدى تەمىر توردىڭ ارعى جاعىندا وتكىزەدى. پوليتسيا مايورى جانگەلدى ەركەباەۆ – 6، پوليتسيا كاپيتانى دميتري تسوي – 4، پوليتسيا مايورى ارمان بوزبالين – 4، كىشى سەرجانت نۇرسۇلتان شۋپوۆ – 2 جىلعا، اعا لەيتەنانت تولەگەن ناۋرىزباەۆ – 5 جىلعا سوتتالدى. وتاننىڭ، ەلدىڭ، اتا-انانىڭ، مەملەكەتتىڭ سەنىمىن ەسىرتكىدەن كەلەتىن ارام اقشاعا ايىرباستاعان ولاردىڭ بارلىعى دا 30 بەن 40-تىن اراسىنداعى جىگىتتەر. العان ءبىلىمىن ەلدىڭ يگىلىگىنە، وتباسىنا، بالالارىنىڭ تاربيەسىنە جۇمسايتىن، اقىل-وي توقتاتقان، تولىسقان شاقتارى. ەڭبەكسىز كەلگەن اقشاعا ەلىك­كەندەردىڭ وزدەرىنىڭ ايتقان انتىنا ساتقىندىق جاساعاندارى وكىنىشتى. ال ەسىرتكى بيزنەسىنىڭ وسىلاي «دامۋىنىڭ» قاۋپى كىمدى دە بولسا ويلانتارى حاق. ءنازيرا جارىمبەتوۆا، «ەگەمەن قازاقستان». قوستاناي.
سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار