كەشە رەسەيدىڭ سوچي قالاسىندا XXII قىسقى وليمپيا ويىندارىنىڭ الاۋى تۇتاندى. ءسويتىپ, كەزەكتى اق وليمپيادانىڭ دودا-دۋمانى باستالىپ كەتتى. قازاقستاندىق سپورتشىلارعا جارىس جولىندا تەك تابىس تىلەيمىز!
كەشە ءتۇس الەتىندە ەلباسى نۇرسۇلتان نازارباەۆ XXII قىسقى وليمپيا ويىندارىنىڭ اشىلۋ سالتاناتىنا قاتىسۋ ءۇشىن سوچي قالاسىنا ۇشىپ كەلدى. مەملەكەت باسشىسى ادلەردەگى حالىقارالىق اۋەجايعا تابان تىرەگەن بويدا بىردەن قازاقستان ۇلتتىق وليمپيالىق كوميتەتتىڭ قوناق قابىلداۋ ۇيىنە باعىت تۇزەدى. مۇندا ەلباسى ءوزىن كۇتىپ تۇرعان وليمپيالىق قۇراما كوماندا مۇشەلەرىمەن كەزدەستى.
كەزدەسۋ بارىسىندا نۇرسۇلتان نازارباەۆ سوچيدەگى وليمپيادانىڭ بۇعان دەيىنگى بارلىق ويىندارعا قاراعاندا, رەسپۋبليكامىزعا گەوگرافيالىق جاعىنان ەڭ جاقىن تۇرعانىن اتاپ كورسەتتى. ءوزىنىڭ وليمپيالىق قۇراما مۇشەلەرىنە ارناعان ءسوزىندە پرەزيدەنت سپورتتىڭ ءبىرىكتىرۋشى كۇش ەكەنىنە توقتالدى.
– سىزدەردىڭ ارقايسىلارىڭىزدىڭ وليمپيادا ليتسەنزياسىن جەڭىپ الۋلارىڭىزدىڭ ءوزى – سپورتتىق جولداعى ءۇلكەن جەتىستىك. ءبىز لوندون وليمپياداسىنان كەيىن سپورتتىق جەتىستىكتەرىمىزدىڭ دەڭگەيىن جوعارى كوتەرگەن ەدىك, مەن ەندى سىزدەرگە دە سونداي جاڭا جەڭىستەر ءتىلەيمىن. بۇگىندە مەملەكەتىمىز سىزدەردىڭ حالىقارالىق ارەنادا زور جەتىستىكتەرگە جەتۋلەرىڭىز ءۇشىن بارلىق جاعدايدى جاساپ وتىر. مەنىڭ تاپسىرمام بويىنشا قاجەتتى بارلىق قاراجات ءبولىنىپ, سپورت عيماراتتارى سالىنىپ جاتىر, سىزدەردى ەڭ ۇزدىك وتاندىق جانە شەتەلدىك جاتتىقتىرۋشىلار جاتتىقتىرادى. ءوز باسىم سىزدەرگە ءاردايىم قولداۋ كورسەتەمىن جانە بارشا جەتىستىكتەرىڭىزدى ۇدايى قاداعالاپ وتىرامىن, – دەدى مەملەكەت باسشىسى.
نۇرسۇلتان نازارباەۆ گازەتتەر مەن تەلەۆيدەنيەنىڭ ارقاسىندا قازاقستاندىقتار وليمپياداشىلاردىڭ ارقايسىسىن ءبىلەتىنىن جانە ولارعا بۇكىل ەلىمىز شىنايى جانكۇيەر بولاتىنىن ايتتى.
– قازاقستاندىق جانكۇيەرلەر وليمپيا ويىندارىن ءبىرىنشى رەت جاڭادان اشىلعان «KAZSport» ارناسىنان كورەدى. سىزدەر ءۇشىن ميلليونداعان وتانداستارىمىز جانكۇيەرلىك ەتىپ, وزدەرىڭىزدەن جوعارى ناتيجەلەر كۇتەدى. ءبىز سوچيدەگى باستى سايىسقا وليمپياداشىلار مەن جاتتىقتىرۋشىلاردىڭ بارلىعى جاقسى دايىندالعانىن بىلەمىز, – دەدى قازاقستان پرەزيدەنتى.
مەملەكەت باسشىسى, سونداي-اق, 2022 جىلعى قىسقى وليمپيا ويىندارىن وتكىزۋگە الماتىنىڭ كانديداتۋراسى ۇسىنىلعانىن, ەلىمىزدە زاماناۋي سپورتتىق ينفراقۇرىلىمداردىڭ, جارىستاردى ەڭ جوعارى دەڭگەيدە وتكىزۋ تاجىريبەسى بار ەكەنىن اتاپ ءوتتى.
كەزدەسۋ سوڭىندا وليمپيادالىق كوماندا مۇشەلەرى وزدەرىنە ۇدايى كوڭىل ءبولىپ, قولدايتىنى ءۇشىن مەملەكەت باسشىسىنا ريزاشىلىقتارىن ءبىلدىرىپ, ەستەلىك كادەسىي تاپسىردى. ال پرەزيدەنت ءوز كەزەگىندە سپورتشىلارعا دەنساۋلىق, كۇش-جىگەر جانە وليمپيادالىق اق جول تىلەدى.
مەملەكەت باسشىسى, سونداي-اق, قوناق قابىلداۋ ۇيىندەگى كەزدەسۋ بارىسىندا «استانا ەكسپو-2017» ۇك» اكتسيونەرلىك قوعامى باسقارماسىنىڭ ءتوراعاسى تالعات ەرمەگياەۆتىڭ استانادا دۇنيەجۇزىلىك كورمەنى وتكىزۋ جونىندەگى جوسپارلارى جانە الماتى قالاسىنىڭ اكىمى احمەتجان ەسىموۆتىڭ 2022 جىلعى قىسقى وليمپيا ويىندارىن وتكىزۋگە الماتى قالاسى ءوتىنىمىن دايىنداۋ بارىسى تۋرالى ەسەپتەرىن تىڭدادى.
بۇدان كەيىن نۇرسۇلتان نازارباەۆ «روسسيا» تەلەارناسىنىڭ ءجۋرناليسى سەرگەي بريلەۆكە سۇحبات بەردى. قازاقستان ۇلتتىق وليمپيالىق كوميتەتىنىڭ قوناق قابىلداۋ ۇيىندە وتكەن اڭگىمەلەسۋ بارىسىندا پرەزيدەنت سوچيدەگى قىسقى وليمپياداعا دايىندىق كەزىندە وراسان جۇمىس جۇرگىزىلگەنىن, سونىڭ ارقاسىندا قالا ايرىقشا جاڭارىپ, جوعارى دەڭگەيدەگى كۋرورتتىق ايماققا اينالعانىن اتاپ ءوتتى. مەملەكەت باسشىسى, سونداي-اق, اۋقىمدى ينفراقۇرىلىمدىق جوبالاردى ىسكە اسىرۋ, سونىڭ ىشىندە قازاقستاننىڭ استاناسىن سالۋ دا ءاردايىم بىرقاتار سىنعا ۇشىراعانىن, بىراق ناتيجەسىندە وسىنىڭ ءبارى قاراپايىم ازاماتتار ءۇشىن قولايلىلىق پەن جايلىلىقتى ارتتىرۋعا اكەلەتىنىن تىلگە تيەك ەتتى.
قازاقستان پرەزيدەنتى الماتىدا قىسقى ۋنيۆەرسيادا وتكىزۋ دايىندىعىنىڭ جوسپارلارى مەن 2022 جىلعى قىسقى وليمپيادانى وتكىزۋگە ءوتىنىمدى دايارلاۋ بارىسى جايىنداعى ويلارىن دا ورتاعا سالدى. سوڭىندا نۇرسۇلتان نازارباەۆ رەسەيدىڭ قىسقى وليمپيا ويىندارىن تابىستى وتكىزۋىنە تىلەكتەستىك ءبىلدىرىپ, بۇل كەزەڭدە الەمدەگى قاقتىعىستار مەن شيەلەنىستەر دەڭگەيى ەداۋىر باسەڭدەيتىنىنە ءۇمىت ارتتى.
سەرىك ءپىرنازار,
«ەگەمەن قازاقستان» – سوچيدەن.
سۋرەتتەردى تۇسىرگەندەر
س.بوندارەنكو, ب.وتارباەۆ.
