مۇنداي قارجىلاي سەرتيفيكات الدىمەن قىزىلوردا وبلىسىنىڭ قازالى اۋدانىندا ورنالاسقان ەرجىگىت بوزعۇلوۆ اتىنداعى №249 مەكتەپ-ليتسەيىنە تابىس ەتىلدى. اتالعان مەكتەپ اۋىل وقۋشىلارىنا ارنالعان «مىڭ بالا» ۇلتتىق زياتكەرلىك وليمپياداسىندا ۇزدىك ناتيجە كورسەتتى. جوباعا قاتىسقان 4 مىڭنان اسا مەكتەپتىڭ ىشىندە وسى ءبىلىم وشاعى – ۇزدىكتەر قاتارىندا. وليمپيادانىڭ قورىتىندىسى بويىنشا بۇل مەكتەپتە 66 فيناليست جانە 21 جەڭىمپاز انىقتالدى.
«مىڭ بالا» وليمپياداسى وسىمەن ەكىنشى جىل وتكىزىلىپ وتىر. وسى ۋاقىت ىشىندە جوباعا 450 مىڭنان اسا اۋىل وقۋشىسى قاتىسىپ ۇلگەردى. وليمپيادانىڭ ناتيجەسى بويىنشا 2 مىڭ وقۋشى جەڭىمپاز اتانىپ, رەسپۋبليكالىق فيزيكا-ماتەماتيكا مەكتەبى, ء«بىلىم-يننوۆاتسيا» ليتسەيلەرى, «دارىن» مامانداندىرىلعان مەكتەپتەرى سياقتى ەلىمىزدىڭ جەتەكشى مەكتەپتەرىندە وقۋعا, سونداي-اق ەلباسى اكادەمياسىنىڭ Birge oqý ونلاين مەكتەبىندە پاندىك دايىندىقتان وتۋگە مۇمكىندىك الدى.
ەكىنشى اقشالاي سەرتيفيكاتتى سولتۇستىك قازاقستان وبلىسى اققايىڭ اۋدانىنىڭ №1 سميرنوۆ ورتا مەكتەبى الدى. «ەلباسى مەدالى» جوباسىن ىسكە اسىرۋ شەڭبەرىندە نەعۇرلىم بەلسەندى اۋىل مەكتەپتەرىنە تالداۋ جۇرگىزىلىپ, ولاردىڭ ىشىندە №1 سميرنوۆ ورتا مەكتەبىندە ەلباسى مەدالىنىڭ ەڭ كوپ يەگەرلەرى انىقتالدى. اتالعان مەكتەپتىڭ 12 وقۋشىسى باعدارلامانى 7 باعىت بويىنشا اياقتاپ, قولا مەدالعا يە بولدى.
سولتۇستىك قازاقستان وبلىسى بويىنشا بارلىعى 292 قاتىسۋشى قولا مەدال جەڭىپ الدى. قازىرگى ۋاقىتتا ءوڭىر بويىنشا «ەلباسى مەدالى» جوباسىنىڭ باعدارلاماسىنا 404 جاس قاتىستى.
جالپى, ەكى جىل ىشىندە بۇكىل ەل بويىنشا 20 مىڭنان اسا قاتىسۋشىنى قامتىعان «ەلباسى مەدالى» جوباسى 7 باعىتتى نەگىزگە الادى: سپورت, تالانتتار مەن داعدىلار, كىتاپ وقۋ, ۇلتتىق مۇرا, ۆولونتەرلىك, ەكسپەديتسيالار مەن جورىقتار, ەڭبەك تاجىريبەسى. بيىل ەلباسى مەدالىنىڭ 605 يەگەرى گرانتتار الىپ, ەلىمىزدىڭ جەتەكشى جوعارى وقۋ ورىندارىنا ءتۇستى. ولاردىڭ 30%-دان استامى – اۋىل مەكتەپتەرىنىڭ تۇلەگى.
