«بارشاڭىزدى قازاق راديوسىنىڭ عاسىرلىق مەرەيتويىمەن قۇتتىقتايمىن! بۇل – بۇكىل ەلىمىزگە ورتاق قۋانىش.
قازاق راديوسىنىڭ جىلناماسى – حالقىمىزدىڭ ءجۇز جىلدا ءجۇرىپ وتكەن جولىنىڭ ايناسى. راديو العاش قۇرىلعان كۇننەن باستاپ ەل مۇددەسىنە قىزمەت ەتىپ كەلەدى. قازىر دە تاۋەلسىزدىكتىڭ قادىر-قاسيەتى مەن ۇلتتىق قۇندىلىقتاردى جاستاردىڭ ساناسىنا سىڭىرۋگە سۇبەلى ۇلەس قوسۋدا.
بىرنەشە بۋىن ۇرپاق ءۇشىن راديو اقپاراتتىڭ عانا ەمەس, رۋحانياتتىڭ دا قاينار كوزى بولدى. حالقىمىزدىڭ ءبىرتۋار پەرزەنتتەرىنىڭ داۋىسى مەن ءان-كۇيلەرى قارا شاڭىراقتىڭ قازىنالى قورىندا ساقتاۋلى تۇر. بۇل – ءبىزدىڭ باعا جەتپەس اسىل مۇرامىز.
تاۋەلسىزدىگىمىزدىڭ 30 جىلدىعىنا تۇسپا-تۇس كەلگەن بۇگىنگى مەرەيتويدىڭ ورنى بولەك. بيىلدان باستاپ 1 قازان «راديو كۇنى» بولىپ بەكىتىلدى. مۇنىڭ ءوزى بۇل سالانىڭ اقپارات ايدىنىنداعى ءرولى ەرەكشە ەكەنىن اڭعارتادى.
قازاق راديوسى كەلەشەكتە دە ماعىنالى ءارى مازمۇندى حابارلارىمەن ۇلتتىڭ جادىن جاڭعىرتىپ, مەملەكەتتىگىمىزدى نىعايتۋعا اتسالىسا بەرەدى دەپ سەنەمىن!
بارشاڭىزعا زور دەنساۋلىق, باق-بەرەكە, شىعارماشىلىق شابىت تىلەيمىن!», دەپ جازىلعان قۇتتىقتاۋدا.
