قازاقستان • 26 قىركۇيەك، 2021

تۇركيادا دۇنيەجۇزى قازاقتارىنىڭ كىشى قۇرىلتايى ءوتتى

60 رەت كورسەتىلدى

قازاقستان تاۋەلسىزدىگىنىڭ 30 جىلدىعى اياسىندا ىستانبۇلدا «جاھاندانۋ وركەنيەتىندەگى قازاق الەمى» اتتى كىشى قۇرىلتايى ءوتتى، دەپ حابارلايدى Egemen.kz دۇنيەجۇزى قازاقتارىنىڭ قاۋىمداستىعىنا سىلتەمە جاساپ.

القالى ءماجىلىس باستالماس بۇرىن جەرگىلىكتى بيلىك وكىلدەرى، كىشى قۇرىلتاي دەلەگاتتارى مەن قالا تۇرعىندارى تۇرىك پەن قازاققا ورتاق تۇلعا مۇستافا وزتۇرىك اتىنداعى ساياباقتىڭ اشىلۋ سالتاناتىنا قاتىستى.

ساياباق قازاقستاننىڭ تۇركياداعى ەلشىلىگى مەن ىستانبۇلداعى باس كونسۋلدىعىنىڭ باستاماسىمەن اشىلىپ وتىر. اشىلۋ سالتاناتىندا ىستانبۇل قالاسىنىڭ 800 مىڭ حالقى بار باعجىلار اۋدانىنىڭ اكىمى لوكمان چاعىرىجى، قازاقستان رەسپۋبليكاسىنىڭ ىستانبۇلداعى باس كونسۋلى ءالىم بايەل، دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ ءسوز سويلەپ، داڭقتى سپورتشىنىڭ ەسكەرتكىشى ورناتىلعان ساياباقتىڭ الا لەنتاسىن كەستى.

ءىس-شاراعا م. وزتۇرىكتىڭ قارىنداسى پەريحان مەن گەرمانيادا تۇراتىن قىزى نەسليحان دا قاتىستى. كىشى قۇرىلتاي جۇمىسىنا تۇركيا جانە ەۋروپاداعى قازاق دياسپوراسىنىڭ وكىلدەرى قاتىستى.

قۇرىلتاي بارىسىندا قازاقستان تاۋەلسىزدىگىنىڭ 30 جىلدىعىنا وراي قانداستاردىڭ ۇندەۋى قابىلدانىپ، بىرقاتار قاتىسۋشىلار دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى ز. تۇرىسبەكوۆتىڭ بۇيرىعىمەن «كىشى قۇرىلتاي» توسبەلگىسىمەن ماراپاتتالدى.

قۇرىلتاي اياسىندا دياسپورانىڭ جاستارى ءۇشىن قازاقستاندىق جوعارعى وقۋ ورىندارىنىڭ ء«بىلىم كورمەسى» ۇيىمداستىرىلدى. وندا ءال-فارابي اتىنداعى قازاق ۇلتتىق ۋنيۆەرسيتەتى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى، حالىقارالىق تاراز يننوۆاتسيالىق-گۋمانيتارلىق ۋنيۆەرسيتەتى وكىلدەرى اتالعان وقۋ ورىندارى جونىندە اقپاراتتىق تانىستىرىلىمدار جاساپ، سىرتتاعى جاستاردى ارنايى بولىنەتىن كۆوتا شەڭبەرىندە وقۋعا شاقىردى.

باعجىلار اۋداندىق مادەنيەت ورتالىعىندا قالا تۇرعىندارى مەن قانداستاردىڭ نازارىنا قازاقستان تاۋەلسىزدىگىنىڭ 30 جىلدىعىنا ارنالعان «التىن تامىرلى اتاجۇرت» كورمەسى ۇسىنىلدى. ارتىنشا وسى جەردە تاتتىمبەت اتىنداعى اكادەميالىق قازاق حالىق اسپاپتار وركەسترىنىڭ گالا-كونتسەرتى ءوتتى.

شارانىڭ سوڭىندا ز. تۇرىسبەكوۆ قوناقتارعا قازاقتىڭ شاپانىن جاپسا، ءا. بايەل تاۋەلسىزدىكتىڭ 30 جىلدىعىنا ارناپ باسىلعان كۇمىس ەستەلىك مونەتالاردى سىيعا تارتتى.

ايتا كەتسەك، كەلەسى جىلى نۇر-سۇلتان قالاسىندا دۇنيەجۇزى قازاقتارىنىڭ ۇلى قۇرىلتايىن وتكىزۋ جوسپارلانۋدا.

سوڭعى جاڭالىقتار

6 ءوڭىر «جاسىل» ايماقتا تۇر

كوروناۆيرۋس • بۇگىن، 09:20

ۇقساس جاڭالىقتار