«جىل وتكەن سايىن جاسوسپىرىمدەردىڭ مۇنداي زاڭسىز قىلىعى ازايىپ كەلەدى. قازىر شامامەن جىلىنا 1-2 بالانىڭ وسىنداي ورىنسىز ءازىلى مەن ويسىز ءىس-ارەكەتى انىقتالىپ جاتادى. مۇنىڭ بارلىعى ىشكى ىستەر ورگاندارى قىزمەتكەرلەرىنىڭ جەتكىنشەكتەر اراسىندا بەلسەندى جۇرگىزىپ كەلە جاتقان ءتۇسىندىرۋ جۇمىستارىنىڭ ناتيجەسى دەپ بىلەمىن», دەدى ول.
تەرروريزم اكتىسى تۋرالى كوپە-كورىنەۋ جالعان حابارلاما تاراتۋدىڭ قوعامدىق تارتىپكە تەرىس اسەر ەتەتىن قاۋىپتى قىلمىس ەكەنىن ەرەكشە اتاپ وتكەن سپيكەر بۇل زاڭسىزدىقتى كەي ادامداردىڭ ءبىر ەمەس, بىرنەشە رەت ادەيى قايتالايتىنىن دا اتاپ ءوتتى. جالعان اقپارات تاراتاتىن رەتسيديۆيستەر 2019-2020 جىلدارى قاراعاندى وبلىسىندا, 2017-2021 جىلدارى قوستاناي وڭىرىندە انىقتالعان. پوليتسيا پولكوۆنيگى: «مۇنداي قىلمىسقا باراتىنداردىڭ كوبىنىڭ دەنساۋلىعىندا پسيحيكالىق اۋىتقۋلار بولادى. سول سەبەپتى ولارعا ءتيىستى مەديتسينالىق كومەك قاجەت», دەدى.
تاعى ءبىر ايتا كەتەرلىك جايت – وسى ۋاقىتقا دەيىن تىركەلگەن بارلىق جارىلعىش زاتتار تۋرالى اقپاراتتاردىڭ بىردە-ءبىرى راستالماعان. ال بۇل دابىل بويىنشا ىسكە كىرىسكەن پوليتسيا, ۇلتتىق قاۋىپسىزدىك ورگاندارى, ورتكە قارسى قىزمەت, قۇتقارۋشىلار جانە مەديتسينالىق جەدەل جاردەم قىزمەتكەرلەرىن بوسقا اۋرەلەۋ دەگەن ءسوز. وسىنداي جالعان اقپارات بويىنشا وقيعا ورنىنا ءبىر رەت بارعاننىڭ وزىندە كۇش قۇرىلىمدارى 300 مىڭ تەڭگەگە دەيىن قاراجات جۇمسايدى ەكەن. ال جۇمىسى توقتاپ قالعان ءىرى كاسىپورىندار مەن ءوندىرىس ورىندارى ءار ساعات سايىن ميلليونداپ شىعىنعا باتادى.
ءىىم وكىلى جالعان اقپاراتتى كوبىنە ادامدار ەرىككەننەن, ءازىل رەتىندە نەمەسە ماس كۇيدە تاراتاتىنىن ايتتى. ال ءار قوڭىراۋدىڭ سەبەبى ءارتۇرلى. مىسالى, بىرەۋلەرى كەك الۋدى كوكسەسە, ەندى بىرەۋلەرى مەكەمەنىڭ جۇمىسىنا كەدەرگى كەلتىرۋدى, مەكتەپتەگى ساباقتى بولدىرماۋدى ويلايدى. قۇقىق قورعاۋ ورگاندارىنىڭ جۇمىسىن «تەكسەرمەك» بولىپ, «جارىلعىش زات قويىلدى» دەپ جالعان اقپارات تاراتقاندار دا بار.
«كامەلەتكە تولماعاندار مۇنداي قىلمىسقا نە ءۇشىن بارادى؟ ولار دوستارىنىڭ اراسىندا وزدەرىنىڭ «باتىر» ەكەنىن كورسەتكىسى كەلەدى, كەيدە ءۇي تاپسىرماسىن ورىنداماعاندىقتان, ساباققا قاتىسپاۋ ءۇشىن وسىلاي ىستەيدى. ستاتيستيكاعا سۇيەنسەك, جالعان حابارلامالار بەرگەنى ءۇشىن سوتتالعانداردىڭ 55 پايىزى قىلمىس جاساعان ساتتە ۋداي ماس بولعان. وتكەن جىلى وسىعان ۇقساس 16 فاكت تىركەلسە, بيىل 14 وقيعا انىقتالىپ وتىر», دەدى د. رازۋەۆ.
«جالعان اقپاراتتاردىڭ 85 پايىزعا جۋىعى ءموبيلدى تەلەفون ارقىلى حابارلانعان. ال ينتەرنەت ارقىلى كەلىپ تۇسكەن فاكتىلەر 8 پايىز شاماسىندا. مۇنداي قىلمىستاردى اشۋ كوپ ۋاقىتتى تالاپ ەتكەنىمەن, كىنالىلەر جازاسىز قالمايدى», دەگەن ءىىم قىزمەتكەرى قوڭىراۋ شالعان ادام داۋسىن وزگەرتسە دە, سيم-كارتاسى مەن تەلەفونىن اۋىستىرسا دا ءبارىبىر تابىلاتىنىن جەتكىزدى. ءدال وسى قىلمىستىڭ 90 پايىزدان استامى ءىزى سۋىماي, ءبىر تاۋلىك ىشىندە اشىلاتىنىن مالىمدەگەن سپيكەر جىل باستالعالى بەرى ەلىمىزدە جالعان تەرروريزمگە قاتىستى 52 قىلمىستىق ءىس تىركەلگەنىن حابارلادى. قازىرگى تاڭدا ونىڭ 28-ءى سوتقا جولدانىپ, 16 ادامعا قاتىستى ۇكىم شىعارىلعان.
ەلىمىزدە تەرروريزم اكتىسى تۋرالى جالعان حابارلاما تاراتقاندار 14,5 ملن تەڭگە كولەمىندە ايىپپۇل ارقالايدى نەمەسە بەس اي بويى تۇزەۋ جۇمىستارىنا تارتىلۋى, سونداي-اق 5 جىلعا دەيىن باس بوستاندىعىنان ايىرۋ نەمەسە شەكتەۋ جازاسى قولدانىلۋى ابدەن مۇمكىن.
«تەرروريزم اكتىسى تۋرالى جالعان حابارلاما تاراتۋ – ءازىل دە, ەرمەك تە ەمەس, ول – قىلمىس», دەگەن پولكوۆنيك ىستەرىن ىستەپ الىپ, كەيىن قانشا وكىنسە دە قاسكويدىڭ قىلمىستىق جاۋاپكەرشىلىكتەن قۇتىلا المايتىنىن ەسكەرتىپ ءوتتى.
