ۇكىمەت • 23 قىركۇيەك، 2021

بۇل – «ءتىلسىز جاۋ» تاعى باس كوتەرەتىن كەز

27 رەت كورسەتىلدى

پرەزيدەنت جانىنداعى ورتالىق كوممۋنيكاتسيالار قىزمەتىندە «ەلىمىزدەگى ءورت قاۋىپسىزدىگى. قازىرگى احۋال» تاقىرىبىندا ءباسپاسوز ءماسليحاتى ءوتتى.

جيىنعا قاتىسقان توتەنشە جاع­داي­لار مينيسترلىگى ورتكە قارسى قىزمەت كوميتەتى باسقارماسىنىڭ باس­تىعى ەرلان تورەگەلديەۆ قۇتقارۋ بولىم­شەلەرى كۇن سايىن ورتا ەسەپپەن ءارتۇرلى سيپاتتاعى تج جويۋعا 100-150 رەت شىعاتىنىن اتاپ ءوتتى. 

«بيىل 8 ايدا 7 مىڭنان استام ءورت بولدى. ءورت كەزىندە 1 مىڭنان استام ادام قۇتقارىلدى. 217 ادام جاراقات الىپ، 251 ادام قايتىس بولدى.  جالپى، ءورت سانىنىڭ 7،8%-عا ازايعانى  بايقالادى: تۇرعىن ءۇي سەكتورىندا 12،6% (2020 – 5 000، 2021 – 4 371)، باقىلاناتىن وبەكتىلەردە 1،5%-عا  (2020 – 639، 2021 – 629) ازايعان.

سونىمەن قاتار ورمان ءورتى 11،9%-عا وسكەنىن (2020 – 621، 2021 – 695) جانە دالا ءورتىنىڭ 19،3%-عا ازايعانىن (2020 – 119، 2021 – 96) ايتىپ وتكەن ءجون. زاڭناماعا سايكەس ورمان قورىن قورعاۋ ەكولوگيا مينيسترلىگىنىڭ ورمان شارۋاشىلىعى كوميتەتىنە جۇكتەلگەن، ال دالا – جەرگىلىكتى اتقارۋشى ورگان­داردىڭ جاۋاپكەرشىلىك ايماعى»، دەدى ۆەدومستۆو وكىلى.

تابيعي ورتتەردىڭ تۋىنداۋ قاۋىپ-قاتەرىن بولدىرماۋ جانە ازايتۋ ماقساتىندا ورتالىق جانە جەرگىلىكتى اتقارۋشى ورگاندار الدىن الۋدىڭ كەشەندى شارالارىن جۇرگىزەدى.

«تجم قىزمەتكەرلەرى الدىن الۋ جۇمىستارىن جۇرگىزۋدە. بۇل – ءورت قاۋپى جوعارى كەزەڭگە دايىندىقتى تەكسەرۋ. وتكەن كەزەڭدە 14 مىڭعا جۋىق بىرلەسكەن رەيد جۇرگىزىلدى. رۇقسات ەتىلمەگەن ورتەۋ، اۋىل شارۋاشىلىعى ال­قاپتارىندا قۇرعاق ءشوپتىڭ باقى­لاۋسىز جانۋى، ورىلعان ءشوپتى جاعۋ جانە باسقا دا ءورت قاۋىپسىزدىگى ەرە­جەلەرىن بۇزعانى ءۇشىن 3 125 ادام اكىمشىلىك جاۋاپكەرشىلىككە تارتىلدى. پروفيلاكتيكالىق جۇمىس ءورت قاۋىپتى كەزەڭ اياقتالعانعا دەيىن جالعاساتىن بولادى»، دەدى تجم ورتكە قارسى قىزمەت كوميتەتىنىڭ وكىلى تىلەۋبەردى ماديەۆ.

ءورت قاۋىپسىزدىگى سالاسىنداعى الدىن الۋ بويىنشا جۇرگىزىلىپ جاتقان جۇمىستارعا قاراماستان، ەلدە شارۋا­شىلىق جۇرگىزۋ وبەكتىلەرىندە ءىرى جانە كۇردەلى ءورت بولىپ تۇرادى. بيىل 9 قىركۇيەكتە الماتى وبلىسىنىڭ ەسىك قالاسىنداعى «تۇرار» بازارىنىڭ اۋماعىندا 512 شارشى مەتر اۋماقتا ساۋداعا بەيىمدەلگەن كونتەينەرلەر جانعان. زارداپ شەككەن جانە قايتىس بولعان ادامدار جوق. كەلتىرىلگەن زالال انىقتالۋدا. ءورتتىڭ الدىن الۋ سەبەبى – كونتەينەر ىشىندەگى ەلەكتر سىمدارىنىڭ قىسقا تۇيىقتالۋى.

جالپى، ورتتەردىڭ نەگىزگى ۇلەسى تۇرعىن ءۇي سەكتورىنا تيەسىلى، بۇل 58%-دى قۇرايدى، سونداي-اق كولىكتەگى ءورت ۇلەسى – 18%.

كۇزدىڭ سۋىق كۇندەرىنىڭ باستالۋىنا بايلانىستى تجم تۇرعىندارعا پەش جابدىقتارىن جىلىتۋ ماۋسىمىنا دايىنداۋعا جانە ءورت قاۋىپسىزدىگى تالاپتارىن ساقتاۋعا شاقىرادى.

جىلىتۋ پەشتەرى مەن جۇيەلەرىنىڭ ءتۇتىن مۇرجالارى جانە باسقا ەلەمەنت­تەرى تىكەلەي جىلىتۋ ماۋسىمى باستالار الدىندا، سونداي-اق جىلىتۋ ماۋسىمى كەزىندە ءۇش ايدا ءبىر رەت جىلىتۋ پەشتەرى ءۇشىن، ەكى ايدا ءبىر رەت ۇزدىكسىز جۇمىس ىستەيتىن پەشتەر مەن وشاقتار ءۇشىن كۇيەدەن تازارتىلۋعا ءتيىس.

وت جاعىلعان پەشتەردى قاراۋسىز قالدىرۋعا، سونداي-اق ولاردى قاداعا­لاۋدى بالالارعا تاپسىرۋعا، جاعۋ ءۇشىن دايىندالعان وتىندى، باسقا دا جانعىش زاتتار مەن ماتەريالداردى جاعۋ الدىندا پاراققا ورنالاستىرۋعا، قاتتى وتىنمەن جاناتىن پەشتەردى جاعۋ ءۇشىن تەز تۇتاناتىن جانە جانعىش سۇيىقتىقتاردى قولدانۋعا، جەلدەتۋ جانە گاز كانالدارىن مۇرجالار رەتىندە پايدالانۋعا تىيىم سالىنادى.

سوڭعى جاڭالىقتار

ۇقساس جاڭالىقتار