بۇگىن اياقتالاتىن ەكى كۇندىك فورۋم ونلاين فورماتتا ۇيىمداستىرىلعان. ءىس-شارانىڭ سالتاناتتى اشىلۋىنا پرەمەر-ءمينيستردىڭ ورىنباسارى رومان سكليار قاتىسىپ, مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى. قۇتتىقتاۋ حاتتا ايتىلعانداي, فورۋم مەملەكەت پەن بيزنەستىڭ تاجىريبە الماسار الاڭىنا, وتاندىق ماشينا جاساۋ سالاسىنداعى وزەكتى ماسەلەلەرى شەشىلەتىن ورتاعا اينالعان.
«پاندەمياعا قاراماستان, وتاندىق ماشينا جاساۋشىلار – ەكونوميكالىق كورسەتكىشتەر بويىنشا كوشباسشىلار قاتارىندا. سالا كورسەتكىشى 24 پايىزعا ارتتى. بۇل – وڭدەۋشى ونەركاسىپ سەكتورىنىڭ دامۋىنا قوسىلعان ەلەۋلى ۇلەس. يندۋستريالاندىرۋدىڭ العاشقى ون جىلىندا وڭدەۋ ونەركاسىبىنىڭ ەكونوميكانىڭ دامۋىنا قوسقان اسەرى تاۋ-كەن ءوندىرۋ سالاسىنىڭ ۇلەسىنەن اسىپ ءتۇستى. قازاقستاندىق ماشينا جاساۋشىلار قويىلعان مىندەتتەردى لايىقتى ورىنداۋدا. شىعارىلاتىن بۇيىمدار نومەنكلاتۋراسىن كەڭەيتىپ, جاڭا تەحنولوگيالىق ازىرلەمەلەردى ەنگىزۋدە. جالپى, ەلدەگى ەكونوميكالىق وزگەرىستەر كوشباسشىلارىنىڭ قاتارىندا كەلەدى», دەلىنگەن پرەزيدەنتتىڭ قۇتتىقتاۋ حاتىندا.
قاسىم-جومارت توقاەۆ مەملەكەتتىڭ ماشينا جاساۋ سالاسىنىڭ سۇرانىسقا يە جوبالارىن ءاردايىم قولداپ كەلە جاتقانىن, الداعى ۋاقىتتا دا قولداي بەرەتىندىگىن ايتتى.
«جولداۋدا مەن 2025 جىلعا قاراي وڭدەۋ ونەركاسىبىنىڭ ەكسپورتىن 24 ملرد دوللارعا دەيىن جانە ەڭبەك ونىمدىلىگىن 30 پايىزعا ۇلعايتۋ مىندەتىن قويدىم. بۇل ءۇشىن مەملەكەت «ونەركاسىپتىك ساياسات تۋرالى» زاڭ قابىلداپ, وتاندىق ونەركاسىپتىك كاسىپورىنداردى بارىنشا قولجەتىمدى شيكىزاتپەن قامتاماسىز ەتۋ تەتىگىن بەكىتەدى. وتاندىق اگروونەركاسىپتىك جانە ونەركاسىپتىك ساياسات ۇشتاستىرىلادى. قازاقستاننىڭ ماشينا جاساۋ سالاسى ەكونوميكالىق ءوسىمنىڭ, جۇمىسپەن قامتۋ مەن ەكسپورتتىڭ قوزعاۋشى كۇشىنە اينالاتىنىنا سەنىمدىمىن», دەلىنگەن قۇتتىقتاۋ حاتتا.
فورۋم ۇيىمداستىرىلىپ كەلە جاتقان جىلدار ىشىندە ءوزىن يندۋسترياداعى باستى سالالىق وقيعا رەتىندە تانىتتى ءارى كووپەراتسيالىق بايلانىستاردى دامىتۋ ءۇشىن بىرەگەي پلاتفورما بولىپ سانالادى. فورۋم شەڭبەرىندە ماشينا جاساۋدى دامىتۋدىڭ 2019-2024 جىلدارعا ارنالعان جول كارتاسىن ىسكە اسىرۋ بارىسى تۋرالى پانەلدىك پىكىرتالاستار, ماشينا جاساۋ سالاسى ءۇشىن كادرلار دايارلاۋ, ماشينا جاساۋدىڭ باسىم كىشى سالالارى بويىنشا سەكتسيالىق وتىرىستار, حالىقارالىق مۇناي-گاز وپەراتورلارىمەن, قاتتى پايدالى قازبالاردى جەر قويناۋىن پايدالانۋشىلارمەن ساتىپ الۋ جانە جەرگىلىكتى قامتۋدى دامىتۋ تاقىرىبىندا دوڭگەلەك ۇستەلدەر وتكىزۋ جوسپارلانىپ وتىر.
يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قاراباەۆ ءوز سوزىندە يندۋستريالاندىرۋ باعدارلاماسىن ىسكە اسىرۋ جىلدارىندا ماشينا جاساۋ سالاسى ەڭ جوعارى, 4 ەسە ءوسىمدى كورسەتكەنىن اتاپ ءوتتى. يندۋستريالاندىرۋ كارتاسى جانە وڭىرلەردىڭ كاسىپكەرلىگىن قولداۋ كارتالارى شەڭبەرىندە 470 ملرد تەڭگەگە 150-دەن استام جوبا ىسكە قوسىلعان. 16 مىڭعا جۋىق جۇمىس ورنى قۇرىلدى. بۇگىنگى تاڭدا سالادا 3 مىڭنان استام كاسىپورىن جۇمىس ىستەيدى. ولاردا 120 مىڭعا جۋىق ادام ەڭبەك ەتەدى.
– ماشينا جاساۋ سالالارى اراسىندا ەڭ جوعارى ءوسۋ ديناميكاسىن اۆتوموبيل جاساۋ سالاسى كورسەتىپ وتىر. يندۋستريالاندىرۋ جىلدارىندا العاش رەت قازاقستاندىق اۆتوونەركاسىپتىڭ ونىمدەرى ەكسپورتتىق نارىقتارعا شىقتى. ال ەل ىشىندە ساتىلعان ءاربىر ەكىنشى جاڭا جەڭىل اۆتوكولىك – وتاندىق ءوندىرىستىڭ ءونىمى. بۇگىنگى تاڭدا قازاقستاندا كولىك قۇرالدارى مەن اۋىل شارۋاشىلىعى تەحنيكاسى ءۇشىن بەلگىلى ءبىر كومپونەنتتەر ءوندىرىسى جولعا قويىلعان, – دەدى م.قاراباەۆ.
ماشينا جاساۋ سالاسىنداعى ءوسۋ سەرپىنىن ساقتاۋ جانە پاندەمياعا بايلانىستى قالىپتاسقان تۇراقسىزدىق جاعدايىندا كاسىپورىنداردىڭ قۇزىرەتتەرىن ءوسىرۋ وڭاي ەمەس. سوعان قاراماستان, ينۆەستيتسيالاردى, كاسىپورىنداردى ىسكە قوسۋ سەرپىنىن جانە تەحنولوگيالىق جاڭارتۋدى ەسكەرە وتىرىپ, جاقىن ۋاقىتتا بەلسەندى ءوسۋ, دامۋ, يمپورتتىق ءونىمدى الماستىرۋ, سونداي-اق ەكسپورت كولەمىن ۇلعايتۋ كۇتىلۋدە. ماسەلەن, بيىل قۇنى 79,6 ملرد تەڭگە بولاتىن, 2 مىڭ جاڭا تۇراقتى جۇمىس ورنىن قۇرۋعا مۇمكىندىك بەرەتىن 14 جوبانى ىسكە قوسۋ جوسپارلانۋدا.
