وبلىس پروكۋراتۋراسىمەن جەدەل-ىزدەستىرۋ ءىس-شارالارى تاعايىندالدى, ولاردىڭ ناتيجەلەرى بويىنشا «قالالىق اقپاراتتىق كىتاپحانا جۇيەسى» كمم ديرەكتورى مەن ونىڭ ورىنباسارىنىڭ بيۋدجەت قاراجاتىن جىمقىرۋ فاكتىلەرى راستالدى.
قىلمىستىق ىسكە مەكەمەنىڭ ونداعان قىزمەتكەرلەرى مەن مەكەمە باسشىلارىنىڭ تۋىستارى تارتىلدى. جالاقى جانە باسقا دا تولەمدەر باسشىلىق پەن باسقا دا قىزمەتكەرلەردىڭ بانكتىك شوتتارىنا جالعان وتىنىشتەر نەگىزىندە اۋدارۋ جولىمەن ۇرلانعان.
سوتقا دەيىنگى تەرگەپ-تەكسەرۋ جۇرگىزۋ ءۇشىن تەكسەرۋ ماتەريالدارى مەن جينالعان دالەلدەمەلەر سىبايلاس جەمقورلىققا قارسى ءىس-قيمىل دەپارتامەنتىنە جولداندى. ەكى اي ىشىندە قىلمىستىق ءىستى تەرگەۋ اياقتالىپ, ايىپتاۋ اكتىسىمەن سوتقا جىبەرىلدى.
كوكشەتاۋ قالالىق سوتىنىڭ 2021 جىلعى 16 شىلدەدەگى ۇكىمىمەن مەكەمە ديرەكتورى مەن ونىڭ ورىنباسارى جالپى سوماسى 3,8 ميلليون تەڭگەگە ايىپپۇل تاعايىنداۋمەن سوتتالدى. اتالعان ادامدار ءومىر بويى مەملەكەتتىك قىزمەتتە جانە ۇيىمداردا لاۋازىمداردى اتقارۋ قۇقىعىنان ايىرىلدى. سوت ۇكىمى 2021 جىلعى 3 تامىزدا زاڭدى كۇشىنە ەندى.
