«14 قىركۇيەكتە اقش-تىڭ توتەنشە جانە وكىلەتتى ەلشىسى دجون مارك پوممەرشايم مىرزا سىرتقى ىستەر مينيسترلىگىنە شاقىرىلدى. اقش ەلشىسى دجو بايدەن مىرزانىڭ پەنسيلۆانيا شتاتىنداعى ءورت ءسوندىرۋ بەكەتىنە بارعان كەزدەگى مالىمدەمەلەرىنە بايلانىستى نارازىلىق نوتاسىن الدى. ەسكەرتپە مۇنداي مالىمدەمەلەر دوستىق قارىم-قاتىناس پەن سەرىكتەستىك رۋحىنا سايكەس كەلمەيتىنىن كورسەتەدى», دەپ حابارلايدى ۆەدومستۆونىڭ ءباسپاسوز قىزمەتى.
سونىمەن قاتار سىرتقى ىستەر مينيسترلىگى تاجىكستان اقش-پەن ءوزارا قولداۋ مەن قۇرمەت رۋحىندا ءتيىمدى قارىم-قاتىناستى دامىتۋعا مۇددەلى ەكەنىن ءبىلدىردى.
ايتا كەتەيىك, 11 قىركۇيەكتە دجو بايدەن پەنسيلۆانياداعى ءورت ءسوندىرۋ بەكەتىنە باردى. ءىس-شارا بارىسىندا ول ەگەر اقش ءوزىنىڭ جاقتاستارىن تاجىكستاننان شىعارۋعا شەشىم قابىلداسا, اۋعانستانداعىداي ۇشاقتىڭ شاسسيىنە جابىسىپ, ەلدەن كەتپەك بولاتىنداردىڭ كورىنىسى قايتالانۋى مۇمكىن ەكەنىن ايتتى.
«مۇنى باسقاشا قالاي جاساۋعا بولاتىنىن ءتۇسىندىرۋ قيىن. مىسالى, ەگەر تاجىكستاندا بولساق, س-130 ۇشاعىن شىعارىپ, بىزبە بىرگە بولعىسى كەلەتىندەرگە مۇمكىندىك بەرەتىنىمىزدى ايتساق, شاسسيگە جابىساتىندار دا بولار ەدى», دەدى دجو بايدەن.
