ءوڭىر باسشىسى پرەزيدەنت تاپسىرماسىمەن ازىرلەنىپ, قولعا الىنعان «قاراپايىم زاتتار ەكونوميكاسى» باعدارلاماسى بويىنشا ءبىر مىڭداي جاڭا جۇمىس ورنىن اشۋعا مۇمكىندىك بەرگەن 185 جوبا قارجىلاندىرىلىپ, وعان 52,6 ملرد تەڭگە بولىنگەنىن ايتتى. «ال بيىل وسى باعدارلاما بويىنشا بىلتىرعا قاراعاندا قاراجات 1,6 ەسە ارتىق ءبولىندى. باعدارلامانىڭ 2022 جىلعا دەيىن سوزىلاتىنى جاڭا مۇمكىندىكتەر بەرەدى», دەدى ول. ال «بيزنەس-2025 جول كارتاسى» باعدارلاماسى بويىنشا سوڭعى ءۇش جىلدا 675 جوبا ىسكە اسىرىلعان. سونىمەن بىرگە ق.اقساقالوۆ جۋىردا مەملەكەت باسشىسى قاسىم-جومارت توقاەۆ سولتۇستىك قازاقستانعا كەلگەن ساپارىندا اشىلعان اۋىل شارۋاشىلىعى تەحنيكالارىن قۇراستىراتىن CLAAS كومپانياسى مەن «پەتروپاۆلدىڭ ەلەكتروتەحنيكالىق زاۋىتى» كاسىپورىندارى ەكسپورتقا باعىتتالعان ءونىم شىعاراتىنىن اتاپ ءوتتى. ال قاعاز شىعاراتىن ORKENDEU QAGAZ, فارماتسەۆتتىك پرەپاراتتار وندىرەتىن Sapa Pharm, اعاش جوڭقالارىنان پانەلدەر جاسايتىن «سەۆەرنىي فانەرنىي كومبينات» جشس كەلەسى كەزەكتە اشىلاتىنىن مالىمدەدى.
اۋىل شارۋاشىلىعىندا بىلتىر عانا 1 682 شارۋاعا 50 ملرد تەڭگەنىڭ كومەگى كورسەتىلگەن. الەۋمەتتىك ماڭىزدى ازىق-ت ۇلىك باعاسىن تۇراقتاندىرۋ ءۇشىن 1,1 ملرد تەڭگە بولىنگەن. مەملەكەت باسشىسىنىڭ جولداۋدا كوتەرگەن ماسەلەسىنىڭ ءبىرى – جايىلىم پروبلەماسى. ءبىزدىڭ وبلىستا دا قوسالقى شارۋاشىلىققا 678,8 مىڭ گەكتار جايىلىم جەتىسپەيدى. «وسىعان بايلانىستى ءبىز قازىردىڭ وزىندە جايىلىمدى 82,5 مىڭ گەكتارعا ۇلعايتۋدى كوزدەپ وتىرمىز. قاشىقتان جاسالعان زوندتاۋ ارقىلى تاعى 816 مىڭ گەكتار جايىلىم تابىلىپ وتىر, ونىڭ 47 مىڭ گەكتارى قازىر قايتارىلعان», دەدى ق.اقساقالوۆ.
بۇگىنگى تاڭداعى كۇيىپ تۇرعان ماسەلەنىڭ ءبىرى دەنساۋلىق ساقتاۋ سالاسى بولسا, سوڭعى ءۇش جىلدا ونى جاڭعىرتۋعا 10 ملرد تەڭگە بولىنگەن. سونىڭ ىشىندە بيىل 3 ملرد قاراستىرىلعان. قازىر وبلىستىڭ اۋرۋحانالارىندا مرت, كومپيۋتەرلىك توموگراف, تسيفرلى مامموگراف, ەكسپەرتتىك كلاستاعى ۋزي-لەر كوپتەپ الىنعان. 480 ورىندىق كوپ ءپروفيلدى اۋرۋحانانىڭ قۇرىلىسى جالعاسۋدا. الەۋمەتتىك-ەكونوميكالىق دامۋدىڭ ەكىنشى جوسپارى اياسىندا وبلىستىڭ اۋىلدىق ەلدى مەكەندەرىندە 47 مەديتسينالىق نىسان سالىنادى.
جولداۋدا پرەزيدەنت بۇقارالىق جانە بالالار سپورتىن دامىتۋ ماسەلەسىن العا قويدى. قازىر وبلىستا 2 894 سپورتتىق نىسان جۇمىس ىستەيدى. وندا 21 مىڭنان استام بالالار مەن جاسوسپىرىمدەر سپورتپەن اينالىسادى. بيىل مامىر ايىنان باستاپ 5 مىڭنان ارتىق بالا سپورتتىق سەكتسيالارعا تەگىن قاتىسا الادى.
«ورتا ءبىلىم بەرۋ جۇيەسىنىڭ وتكىر پروبلەماسى» دەپ مەملەكەت باسشىسى مەكتەپتەردە ورىنداردىڭ جەتىسپەۋشىلىگىن اتاپ ءوتىپ, مەكتەپ قۇرىلىسى بويىنشا جۇمىستى جانداندىرۋ مىندەتىن قويدى. سوڭعى 3 جىلدا وبلىستا ءبىلىم بەرۋ مەكەمەلەرىنىڭ 63%-ى جوندەلدى, 4 جاڭا مەكتەپ سالىندى. بيىل تايىنشا اۋدانىنىڭ ۆيشنەۆكا اۋىلىندا 120 ورىندىق مەكتەپتىڭ قۇرىلىسى باستالدى. تايىنشا قالاسىندا 600 ورىندىق مەكتەپ سالۋ جوسپارلانۋدا. ەكى مەكتەپ تە اپاتتى مەكتەپتەردىڭ ورنىنا سالىنادى.
كەشەندى جوسپار اياسىندا الداعى جىلدارى 15 جاڭا مەكتەپ, ونىڭ ىشىندە وبلىس ورتالىعىندا «كوپاي» شاعىن اۋدانىندا 1 200 ورىندىق مەكتەپ جانە 200 ورىندىق ينتەرناتى بار 400 ورىندىق تۇزەتۋ مەكتەبىن سالۋ جوسپارلانۋدا.
مۇعالىمدەردىڭ جالاقىسى ارتتى. بۇگىندە ول ورتا ەسەپپەن 250 مىڭ تەڭگەنى قۇرايدى, ياعني 1,5 ەسەگە ارتتى. پەداگوگ مارتەبەسىن ارتتىرۋ 2 جىل ىشىندە ءبىلىم بەرۋ سالاسىنا 700-گە جۋىق جاس مامان تارتۋعا مۇمكىندىك بەردى. كادر تاپشىلىعى 6 ەسەگە تومەندەدى. ءبىزدىڭ الدىمىزدا وبلىستى جاستار ءۇشىن تارتىمدى ەتۋ مىندەتى تۇر. بۇل ءۇشىن ۋنيۆەرسيتەتتىڭ جاڭا وقۋ-زەرتحانالىق كورپۋسىن زاماناۋي تەحنولوگيالار بويىنشا سالىپ جاتىرمىز. اريزونا ۋنيۆەرسيتەتىمەن ىنتىماقتاستىق تۋرالى مەموراندۋمعا قول قويىلدى. بەس جىلدان كەيىن ستۋدەنتتەرگە قوس ديپلوم الۋعا مۇمكىندىك تۋادى. سوڭعى جىلدارى وڭىرلىك جوعارى وقۋ ورىندارىنا گرانتتار سانى ارتتى. بيىل جەرگىلىكتى بيۋدجەت ەسەبىنەن وبلىسىمىزعا قاجەتتى ماماندىقتار بويىنشا (ۆەتەريناريا, ءبىلىم بەرۋ, جالپى مەديتسينا, اگرونوميا, مال شارۋاشىلىعى) 50 ءبىلىم گرانتى ءبولىندى. بىلىمگە قارجى قۇيۋ ءوز جەمىسىن بەرۋدە. ەگەر 2017 جىلى جوو-عا وقۋعا ءتۇسۋ 58%-دى قۇراسا, 2021 جىلى 73%-دى قۇرادى», دەدى اكىم ءبىلىم سالاسى تۋرالى ايتقان سوزىندە.
«ەڭبەك» باعدارلاماسى بويىنشا وبلىسقا 2021 جىلى الماتى, جامبىل, قىزىلوردا, ماڭعىستاۋ جانە تۇركىستان وبلىستارىنان 563 وتباسىدان تۇراتىن 2 150 ادام كوشىپ كەلگەن. بۇل جۇمىس جىل اياعىنا دەيىن جالعاسىپ, كەلۋشىلەر سانى ارتا تۇسەدى. بارلىق قونىس اۋدارۋشىلارعا كوشى-قون جانە تۇرعىن ۇيلەردى جالداۋ شىعىندارى تولىق تولەنگەن.
سونىمەن بىرگە وبلىس اكىمى پرەزيدەنت ق.توقاەۆتىڭ قازاقستاندىقتاردىڭ ءال-اۋقاتىن ارتتىرۋعا بايلانىستى جولداۋىندا ايتىپ وتكەن تاپسىرمالارىنىڭ دۇرىستىعىنا توقتالدى. «ەڭ تومەنگى جالاقىنى 2022 جىلدىڭ 1 قاڭتارىنان باستاپ 60 مىڭ تەڭگەگە جەتكىزۋ, بيزنەس سالاسى قىزمەتكەرلەرىنىڭ جالاقىسىن ءوسىرۋ بويىنشا «جۇمساق» ىنتالاندىرۋ شارالارىن قاراستىرۋ, ەڭبەكاقى قورىنىڭ جۇكتەمەسىن 34 %-دان 25%-عا ءتۇسىرۋ, بيۋدجەت سالاسى قىزمەتكەرلەرىنىڭ ەڭبەكاقىسىن 20 پايىزعا ارتتىرۋ, زەينەتاقى قورىنىڭ ءبىر بولىگىن تۇرعىن ءۇي ساتىپ الۋ ءۇشىن «وتباسى بانك» ەسەبىنە اۋدارۋ تۋرالى بەرگەن تاپسىرمالارى وتە وزەكتى ماسەلەلەر. ونىڭ ورىندالۋى قازاقستاندىقتاردىڭ ءال-قۋاتىن ارتتىرا تۇسەرى ءسوزسىز», دەدى ق.اقساقالوۆ.
سولتۇستىك قازاقستان وبلىسى
