«حامسا» كىتابىن وزبەك تىلىنەن قازاق تىلىنە بەلگىلى قازاق اقىنى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, «پاراسات» وردەنىمەن ماراپاتتالعان نەسىپبەك ايت ۇلى اۋدارعان. كىتاپقا ءا.ءناۋايدىڭ ء«لايلى – ءماجنۇن» جانە «ەسكەندىر قابىرعاسى» اتتى ەكى پوەماسى ەنگەن. «ناۋاي الىشەر. مۇحاكاماتۇل-لۋعاتان» كىتابىن قازاق تىلىنە شىعىستانۋشى عالىم ءتورالى قىدىر اۋدارعان. الىشەر ءناۋايدىڭ بۇل تۋىندىسى تۇركولوگيادا ەرەكشە ورىن الادى. اقىن تۇركى جانە پارسى تىلدەرىنىڭ تابيعاتىن تەرەڭ زەرتتەپ, ءوز شىعارمالارىندا ناقتى مىسالدار ارقىلى تۇركى ءتىلىنىڭ بايلىعى مەن پوەتيكالىق كۇشىن ايقىن كورسەتتى.
كىتاپقا الىشەر ءناۋايدىڭ ءازىربايجان, باشقۇرت, قازاق, قاراقالپاق, قىرىم-تاتار, قىرعىز, ساحا, تاتار, تۇرىكمەن, وزبەك جانە ۇيعىر تىلدەرىندەگى تاڭدامالى شىعارمالارى ەنگىزىلگەن. كىتاپتى وزبەك عالىمى مۇحاممەد ءالي قۇراستىرعان.
« ۇلى تۇركى اقىندارى مەن ويشىلدارى تۋرالى ءسوز قوزعاعاندا بىردەن ماحمۇد قاشقاري, ءجۇسىپ بالاساعۇن, ءال-فارابي, نيزامي, اباي بەينەلەرى پايدا بولادى. ارينە, تۇركى الەمىنىڭ كورنەكتى تۇلعالارى اراسىندا الىشەر ناۋاي قۇرمەتتى ورىن الادى, ونىڭ شىعارمالارىندا حالىق دانالىعىنا ەنىپ, قازىرگى ۇرپاققا ۇلگى بولىپ تابىلاتىن ۇلكەن مازمۇن بار», دەدى حالىقارالىق تۇركى اكادەمياسىنىڭ پرەزيدەنتى دارحان قىدىرالى قۇتتىقتاۋ سوزىندە.
قازاقستاننىڭ وزبەكستانداعى ەلشىسى دارحان ساتىبالدى مادەني-گۋمانيتارلىق ىنتىماقتاستىققا ەرەكشە كوڭىل بولىنەتىن وزبەك-قازاق دوستىق قاتىناستارىنىڭ, تاتۋ كورشىلىك پەن ستراتەگيالىق ارىپتەستىكتىڭ قازىرگى جوعارى دەڭگەيىن اتاپ ءوتتى.
«بۇگىنگى ءىس-شارا ادەبيەت پەن ونەر سالاسىنداعى باۋىرلاستىق پەن ىنتىماقتاستىقتىڭ كەزەكتى دالەلى بولىپ تابىلادى. ۇلى اقىننىڭ كەمەڭگەر تۋىندىلارى ەلدەرىمىز اراسىنداعى ادەبي بايلانىستاردىڭ التىن كوپىرىنە اينالاتىنى ءسوزسىز», دەپ اتاپ ءوتتى قازاقستاندىق ديپلومات.
ءىس-شارا اياسىندا باۋىرلاس ەلدەر اراسىنداعى ىنتىماقتاستىققا قوسقان ۇلەسى ءۇشىن تۇركى اكادەمياسىنىڭ كۇمىس مەدالىمەن «الىشەر ناۋاي. باقو گۋلي» كىتابىنىڭ اۆتورى مۇحاممەد ءالي, سونداي-اق ابايدىڭ «قارا سوزدەرىن» وزبەك تىلىنە اۋدارعان كوزوكبوي يۋلداشەۆ پەن يبودۋللا ميرزاەۆ ماراپاتتالدى.
