بەيسەنبى كۇنى سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايدى.
زاڭ جوباسى ءبىزدىڭ ەلىمىزدە مۇگەدەك ادامداردىڭ قۇقىقتارىن قورعاۋدى قامتاماسىز ەتۋ جانە ءومىر ءسۇرۋ ساپاسىن جاقسارتۋ, مەملەكەتتىك الەۋمەتتىك جاردەماقىلاردىڭ مولشەرىن ارتتىرۋ, زەينەتاقىمەن قامسىزداندىرۋ, حالىقتى جۇمىسپەن قامتۋ, الەۋمەتتىك ساقتاندىرۋ ماسەلەلەرىن جەتىلدىرۋ ماقساتىندا ازىرلەندى.
وسىلايشا, زاڭ جوباسىندا ءبىرىنشى توپتاعى مۇگەدەكتەرگە كۇتىم جاسايتىن ادامدارعا ەڭ تومەنگى كۇنكورىس دەڭگەيىنىڭ 1,40 مولشەرىندە جاردەماقى ەنگىزۋ كوزدەلەدى, سونداي-اق ەرەكشە قاجەتتىلىكتەرى بار بالالاردىڭ بارلىق توپتارى ءۇشىن جاردەماقى مولشەرىن ۇلعايتۋ جوسپارلانۋدا.
زاڭ جوباسىندا جۇمىسسىزداردى ەڭبەك بيرجاسىندا تىركەۋ, جۇمىسسىز مارتەبەسىن الۋ جانە ءتيىستى جاردەماقى الۋ راسىمدەرىن جەڭىلدەتەتىن نورمالار جازىلعان.
بيۋرو وتىرىسى بارىسىندا پالاتا وتىرىسىنىڭ كۇن تارتىبىنە سەنات دەپۋتاتى سەرىكباي ترۇموۆتىڭ انت بەرۋى جانە ونىڭ سەناتتىڭ تۇراقتى كوميتەتىنىڭ قۇرامىنا سايلانۋى تۋرالى ماسەلەنى ەنگىزۋ ۇسىنىلدى.
بۇدان باسقا, ماجىلىستەن بۇرىن كەلىپ تۇسكەن «كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنتسياعا قورشاعان ورتاعا ترانسشەكارالىق كونتەكستە اسەر ەتۋدى باعالاۋ جونىندەگى حاتتامانى راتيفيكاتسيالاۋ تۋرالى» زاڭ جوباسى بيۋرو وتىرىسىندا سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ جونىندەگى كوميتەتىنە بەرىلدى.
