ءىس-شاراعا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى, پارلامەنت ءماجىلىسىنىڭ دەپۋتاتى لاززات رامازانوۆا, اقپارات جانە قوعامدىق دامۋ ءمينيسترى ايدا بالاەۆا, وبلىستاردىڭ, نۇر-سۇلتان, الماتى جانە شىمكەنت قالالارىنىڭ اكىمدەرى قاتىستى.
مەملەكەتتىك حاتشى قىرىمبەك كوشەرباەۆ سالتاناتتى ءراسىمدى اشىپ, پرەزيدەنت قاسىم-جومارت توقاەۆتىڭ قۇتتىقتاۋىن وقىپ بەردى. وندا بايقاۋدىڭ وسكەلەڭ ۇرپاقتى تاربيەلەۋدەگى جانە وتباسىلىق قۇندىلىقتاردى نىعايتۋداعى ماڭىزدى ءرولى ايتىلعان.
«مەن قازاقستانداعى ءار شاڭىراق بەرىك بولىپ, ءاربىر اۋلەت باقىتتى عۇمىر كەشكەنىن قالايمىن. سول ءۇشىن وتباسى ساياساتىنا باسا ءمان بەرەمىن. ۇرپاقتىڭ بويىنداعى ادامگەرشىلىك پەن ادالدىق, ەڭبەكقورلىق پەن مەيىرىمدىلىك, ۇلتجاندىلىق پەن وتانشىلدىق سياقتى اسىل قاسيەتتەردىڭ ءبارى, ەڭ الدىمەن, وتباسىندا قالىپتاسادى. قازاق – قاشاندا اتا-انانى سىيلاعان, ۇلكەنگە قۇرمەت, كىشىگە ىزەت كورسەتە بىلگەن جۇرت. قازىرگى جاھاندانۋ زامانىندا رۋحاني قۇندىلىقتاردى حالقىمىزدىڭ ءومىر سالتىنا اينالدىرۋ – اسا ماڭىزدى مىندەت. جىل سايىن «وتباسى كۇنىنە» وراي وتكىزىلەتىن ۇلتتىق كونكۋرس بۇعان زور ۇلەس قوسۋدا. ونىڭ, اسىرەسە, جاستار ءۇشىن بەرەر تاعىلىمى مەن ءتالىم-تاربيەسى زور», دەلىنگەن مەملەكەت باسشىسىنىڭ قۇتتىقتاۋىندا.
بيىل اتالعان كونكۋرستى وتكىزۋدىڭ جاڭا تاسىلدەرى ەنگىزىلگەنىن ايتا كەتكەن ءجون. سوعان سايكەس ەندى جىل سايىن رەسپۋبليكا بويىنشا 17 ۇزدىك وتباسى انىقتالادى. وسى جىلى وڭىرلىك كونكۋرستىق كوميسسيالارعا بارلىعى 2 768 ءوتىنىم ءتۇستى. جاڭا ەرەجەلەرگە سايكەس وتىنىمدەر تەك وتباسىلاردان عانا ەمەس, زاڭدى تۇلعالاردان دا قابىلداندى.
ءىس-شارا سوڭىندا مەملەكەت باسشىسىنىڭ اتىنان لاۋرەات وتباسىلارعا ەستەلىك سىيلىقتار تابىستالدى.
ءوز كەزەگىندە جەڭىمپاز وتباسىلاردىڭ مۇشەلەرى اسەرىمەن ءبولىسىپ, وسىنداي قولداۋ كورسەتىلىپ جاتقانىنا ريزاشىلىعىن ءبىلدىردى. الدىمەن ءسوز العان اقمولا وبلىسىنداعى كوپبالالى وتباسىنىڭ وتاعاسى, قانداس اعايىن قۇرمەت نۇرسۇلتان ەلباسى نۇرسۇلتان نازارباەۆ پەن پرەزيدەنت قاسىم-جومارت توقاەۆقا قانداستاردى قولداعانى جانە پەداگوگتەردىڭ مارتەبەسىن كوتەرگەنى ءۇشىن العىس ايتتى.
سولتۇستىك قازاقستان وبلىسىنان لاۋرەات بولعان كرەيدۋن وتباسى – بەس بالانى اسىراپ الىپ, تاربيەلەپ وتىرعان ۇيلەسىمدى جانە تاتۋ وتباسىنىڭ ۇلگىسى. ماراپاتتاۋ كەزىندە يننا كرەيدۋن وتباسىمەن بىرگە باسقا دا وتانداستارىمىز سياقتى قازاقستانداعى اۋىلداردىڭ وركەندەۋى مەن دامۋى ءۇشىن بارلىق كۇش-جىگەرىن سالاتىنىن اتاپ ءوتتى.
الماتى قالاسىنىڭ دارىگەرلەر اۋلەتىنىڭ وكىلى, «استانا ەكولايف» ەكۇ مەديتسينالىق ورتالىعىنىڭ باس ديرەكتورى الماگۇل احمەتوۆا مەملەكەت باسشىسىنىڭ باستاماسىمەن جۇزەگە اسىرىلىپ جاتقان «اڭساعان ءسابي» باعدارلاماسىنىڭ جانە بالاسىز وتباسىلاردى مەملەكەتتىك قولداۋ شارالارىنىڭ وزەكتىلىگىن العا تارتتى.
ال تۇركىستان وبلىسىنان لاۋرەات بولعان جامالوۆتار وتباسى وڭىردە اۋىل شارۋاشىلىعىن بەلسەندى دامىتىپ جاتىر ەكەن. بيىل ەرلى-زايىپتىلاردىڭ شاڭىراق كوتەرگەنىنە 30 جىل تولىپتى. وتاعاسى اسىلبەك تۇرسىنباي ۇلى ء«بىزدىڭ وتباسىمىز – ەل تاۋەلسىزدىگىنىڭ قۇرداسى!», دەيدى.
بۇعان قوسا وتباسى كۇنى قارساڭىندا ەلوردادا ايدوس نۇرباەۆ پەن اراي ساپارعاليقىزى نەكە كۋالىگىن الدى. ايدوس – جەكە كاسىپكەر, اراي – جەتەكشى ينجەنەر-جوبالاۋشى. «بۇل بايقاۋ – ءبىز ءۇشىن جاقسى بەلگى! كوپشىلىك ۇلگى الىپ, بوي تۇزەگىسى كەلەتىن ونەگەلى وتباسىلاردىڭ ورتاسىنان تابىلعانىمىزعا قۋانىشتىمىز!», دەپ جاس جۇبايلار اعىنان جارىلدى.
ۇلتتىق كونكۋرستىڭ 2016 جىلعى جەڭىمپازى اقتوبە وبلىسىنان نۇسقاباەۆتار وتباسىنىڭ وكىلى قايرات نۇسقاباەۆ بۇل بايقاۋ وتباسى مۇشەلەرىنە ۇلكەن جاۋاپكەرشىلىك جۇكتەگەنىن ايتتى. ول «وسى جوعارى مارتەبەنى ابىرويمەن ساقتاۋ – ءبىزدىڭ پارىزىمىز», دەي كەلە جەڭىمپاز وتباسىلار مەن جاس جۇبايلارعا باقىت پەن اماندىق تىلەدى.
ەل پرەزيدەنتى اتىنان لاۋرەات وتباسىلارعا ەستەلىك سىيلىقتاردى وڭىرلەردىڭ اكىمدەرى تابىس ەتتى.
«مەرەيلى وتباسى» ۇلتتىق بايقاۋى ەلباسىنىڭ باستاماسىمەن 2013 جىلدان بەرى وتكىزىلىپ كەلەدى. بايقاۋدىڭ ماقساتى – وتباسى ينستيتۋتىن, وتباسىلىق قۇندىلىقتاردى نىعايتۋ, بالا تاربيەسىندەگى اتا-انالاردىڭ جاۋاپكەرشىلىگىن ارتتىرۋ, ۇلگىلى قازاقستاندىق وتباسىن ناسيحاتتاۋ.
