جاڭا ەسكەرتكىش قولادان جاسالعان, ونىڭ بيىكتىگى تۇعىرىمەن بىرگە 7,5 مەتر. ءمۇسىننىڭ اۆتورى – بەيبىت مۇستافين.
ەسكەرتكىشتىڭ ورناتىلۋىنا ورتالىق قازاقستان اكادەمياسىنىڭ رەكتورى باقتىباي ءجۇنىسوۆ باستاماشى بولدى.
قاراعاندى وبلىسىنىڭ اكىمى جەڭىس قاسىمبەك ەسكەرتكىشتىڭ اشىلۋىندا قارقابات انا – حالىق بىرلىگىن, ءپاتريوتيزمدى جانە پاراساتتىلىقتى بىلدىرەتىن نىشاندارىنىڭ ءبىرى ەكەنىن اتاپ ءوتتى.
«قارقابات انا بارلىق انالاردىڭ ۇلى اناسى دەپ ەسەپتەلەدى. ول قازاق دالاسىنداعى انالاردىڭ بارلىق جاقسى قاسيەتتەرىن, بۇكىل حالىقتىڭ اناسىن بەينەلەيدى. قارقابات انانىڭ دانالىعى, ءومىر جولى مەن بەينەسى وسكەلەڭ ۇرپاق ءۇشىن ۇلگى بولادى دەپ سەنەمىز», دەدى جەڭىس قاسىمبەك اشىلۋ سالتاناتىندا.
اڭىزعا سۇيەنسەك, قارقابات انانىڭ كەنجە ۇلى بولاتقوجا قاراكەسەك دەپ اتالىپ كەتكەن.
«قازاق حالقىنىڭ تاريحىندا ءىز قالدىرعان ۇلداردىڭ ( ۇلى قازىبەك بيدەن باستاپ باتىر-عارىشكەر توقتار اۋباكىروۆكە دەيىن) اناسىنىڭ ەسىمى ەشقاشان ۇمىتىلمايدى. بۇل ەسكەرتكىش بولاشاق ۇرپاقتى تاربيەلەۋ ءۇشىن قاجەت», دەدى قر جازۋشىلار وداعىنىڭ توراعاسى ۇلىقبەك ەسداۋلەت.
