پاۆلودارلىق ازاماتقا 192-باپ, 3-ءبولىم, 3-تارماق «قاراقشىلىق, ياعني شابۋىل جاسالعان ادامنىڭ ءومىرى مەن دەنساۋلىعىنا قاۋىپتى زورلىق-زومبىلىقپەن نەمەسە وسىنداي زورلىق-زومبىلىقتى تىكەلەي قولدانۋ قاۋپىمەن ۇشتاسقان بوتەن م ۇلىكتى ۇرلاۋ ماقساتىنداعى شابۋىل» بويىنشا ايىپ تاعىلعان.
«پوليتسيا كىشى سەرجانتى اتاعىمەن ايىپتالۋشى پاۆلودار ستانتسياسىنداعى جەلىلىك پوليتسيا ءبولىمىنىڭ جۇرگىزۋشىسى بولىپ جۇمىس ىستەدى. «ماكاروۆ» ماركالى تابەلدىك تاپانشامەن قارۋلانعان ول قىزمەتتىك اۆتوكولىكتە ءتورت قاراقشىلىق شابۋىل جاسادى», دەپ حابارلادى سۋديا ايگۇل احمەتوۆا.
سۋديانىڭ ايتۋىنشا, پوليتسەي بارلىق قىلمىستى جۇمىس ۋاقىتىندا جاساعان. كۇن سايىن قىزمەتكە كىرىسىپ, قولىنا 16 جاۋىنگەرلىك پاتروندارى بار تاپانشا الىپ, بوس ۋاقىتىندا ازاماتتىق كيىمگە اۋىسىپ, توناۋمەن اينالىسقان.
شابۋىلدىڭ العاشقى نىسانى «قازپوشتا» اق فيليالى بولدى. كاسسيردى تاپانشامەن قورقىتىپ, ۇرلاعان 21 مىڭ تەڭگەنى بۋكمەكەرلىك كەڭسەدەگى ستاۆكالارعا تىگىپ ۇتىلعان. ەر ادام قۇمار ويىنعا تاۋەلدى بولعانى انىقتالدى. ناۋرىز ايىندا ول تاعى ءۇش مەكەمەنى توناعان. قىزمەتكەر دابىل تۇيمەسىن باسىپ ۇلگەرگەن ميكروقارجى ۇيىمىنا ءساتسىز شابۋىلدان كەيىن قارۋلانعان پوليتسەي پاۆلودار قالاسىنىڭ ماڭىنداعى دۇكەندەردىڭ بىرىنە كىرىپ, اقشا تالاپ ەتكەن. سول كۇنى ەر ادام وبلىس ورتالىعىنداعى تاعى ءبىر دۇكەننىڭ ساتۋشىسىنا شابۋىل جاساپ, 120 مىڭ تەڭگەلىك كاسسانى يەمدەنگەن.
«سوتتالۋشىنىڭ كىناسى جابىرلەنۋشىلەردىڭ, كۋاگەرلەردىڭ مويىنداۋىمەن, زاتتاي ايعاقتارمەن دالەلدەندى. سوت پاۆلودار قالاسىنىڭ تۇرعىنىن اتالعان قىلمىستارعا كىنالى دەپ تانىدى. وعان ورتاشا قاۋىپسىزدىك قاج مەكەمەسىندە 10 جىل باس بوستاندىعىنان ايىرۋ جازاسى تاعايىندالدى. سونداي-اق ول «پوليتسيانىڭ كىشى سەرجانتى» اتاعىنان ايىرىلدى», دەدى سۋديا احمەتوۆا.
سوتتالۋشىنىڭ ءوزى سوتتا كۋالىك بەرۋدەن باس تارتتى, ول ءوز كىناسىن ءىشىنارا مويىنداپ, ۇكىمدى جەڭىلدەتۋدى سۇرادى.
