ەندى قازان ايىندا ء«حارري پوتتەر مەن فەنيكس القاسى» اتتى بەسىنشى كىتابى جاريالانباق. بۇل – ءحارري پوتتەر سەرياسىنداعى كولەمى ەڭ ۇلكەن ءبولىم. قازىر كوررەكتورلىق جۇمىستار جاسالىپ جاتىر. «بەسىنشى كىتاپتىڭ تۇپنۇسقاسى دا, اۋدارماسى دا 700 بەتتەن اسادى. وعان قوسا, ءماتىن كۇردەلەنىپ كەلەدى. كەيىپكەرلەر كوبەيدى, بالالار ءوستى, وقيعا شيەلەنىستى. سول سەبەپتى جۇمىس كۇردەلى ءجۇرىپ جاتىر. تيراجى 5 000 دانا», دەيدى جوبانىڭ جاۋاپتى رەداكتورى نازگۇل قوجابەك.
جالپى, ءحارري پوتتەر سەرياسىن تۇگەل اۋدارعاندار – دينارا مازەن مەن سايات مۇحامەديار. جوان روۋليڭ وسى رومان جەلىلەرى ارقىلى الەمدەگى ەڭ باي جازۋشىلاردىڭ قاتارىنا قوسىلدى. 1997 جىلدىڭ 26 ماۋسىمىندا جارىققا شىققان العاشقى ء«حارري پوتتەر مەن ءپالساپا تاس» رومانى بالالار ادەبيەتى جانرىن بۇزىپ-جارا كىرىپ, بۇكىل الەمدە زور كوممەرتسيالىق تابىسقا كەنەلدى. بۇگىنگە دەيىن جەتى سەريالى رومان 500 ميلليون دانامەن شىعىپ, 80 تىلگە اۋدارىلىپ, الەمدىك ادەبي بەستسەللەرگە اينالدى. ماسەلەن, 2007 جىلى جارىققا شىققان ءبىر عانا ء«حارري پوتتەر مەن اجال سىيى» كىتابى بىردەن 11 ميلليون دانامەن شىعارىلىپ, رەكورد ورناتقانىن دا بىلەمىز.
Warner Bros. Pictures كومپانياسىنىڭ جەتەكشىلىگىمەن روماندار سەرياسى كينوعا اينالىپ, كينەماتوگرافيا سالاسىندا دا تابىسقا جەتتى. كىتاپ كوتەرگەن ابىروي-اتاق الەمدە Harry Potter برەندىن قالىپتاستىرىپ, ول برەندتىڭ قۇنى, شامامەن 12.78 ميلليارد دوللارعا باعالانادى.
باسپا باسشىسى رايسا قادىر ءبىر سۇحباتىندا: «روماندار جەلىسىنىڭ ەڭ سوڭعىسى 2007 جىلى جارىققا شىققان. كەيدە نەلىكتەن سول تۇستا بىردەن قازاق تىلىنە اۋدارىلىپ وتىرماعان دەپ تاڭعالامىن. بىراق قازىر دە كەش ەمەس. ويتكەنى كلاسسيكانىڭ اتى قاي كەزدە دە كلاسسيكا», دەيدى. ارادا كوپ جىل وتسە دە الەمدىك بەستسەللەردىڭ قازاق تىلىندە سويلەۋى – ۇلكەن ناتيجە. قازاق وقىرمانى ءحارري پوتتەردىڭ بەسىنشى كىتابىن اسىعا كۇتەدى.
