«نۇر وتان» پارتياسىنىڭ جەمقورلىققا قارسى جاڭا باعدارلاماسى ءۇستىمىزدەگى جىلدىڭ ءبىرىنشى جارتىسىندا ازىرلەنەدى. بۇل جونىندە كەشە پارتيا جانىنداعى جەمقورلىققا قارسى كۇرەس رەسپۋبليكالىق قوعامدىق كەڭەسىنىڭ 2013 جىلدى قورىتىندىلاعان وتىرىسىندا بەلگىلى بولدى.
«نۇر وتان» پارتياسىنىڭ جەمقورلىققا قارسى جاڭا باعدارلاماسى ءۇستىمىزدەگى جىلدىڭ ءبىرىنشى جارتىسىندا ازىرلەنەدى. بۇل جونىندە كەشە پارتيا جانىنداعى جەمقورلىققا قارسى كۇرەس رەسپۋبليكالىق قوعامدىق كەڭەسىنىڭ 2013 جىلدى قورىتىندىلاعان وتىرىسىندا بەلگىلى بولدى.
وتىرىستا الدىمەن جەمقورلىققا قارسى ۇزدىك دەپ تانىلعان پلاكاتتار جاريا ەتىلدى. بۇل تۋىندىلار قوعام اراسىندا جەمقورلىققا توزبەۋشىلىك احۋالىن قالىپتاستىرۋعا باعىتتالعان. كەشەگى وتىرىس بارىسىندا, سونىمەن قاتار, وتكەن جىلدا اتقارىلعان جۇمىستارعا قورىتىندى جاسالدى. ودان بەلگىلى بولعانداي, جەمقورلىققا قارسى حابارلامالار ورتالىعىنىڭ سەنىم تەلەفوندارىنا مىڭنان استام قوڭىراۋ تۇسكەن. جانە دە «وزىڭنەن باستا» اكتسياسى اياسىندا پارتيانىڭ 3046 مۇشەسى ءوز مۇلكى تۋرالى مالىمەتتەردى جاريا ەتىپتى. ال «جەمقورلىققا جول جوق!» ناۋقانى بارىسىندا ەلىمىزدىڭ وڭىرلەرىندە 80-نەن استام اكتسيا وتكىزىلگەنى بەلگىلى بولدى.
جالپى, 2013 جىلى «نۇر وتان» پارتياسىنىڭ قوعامدىق قابىلداۋ بولمەلەرىنە لاۋازىمدى تۇلعالاردىڭ زاڭعا قايشى ارەكەتتەرى مەن ءارتۇرلى دەڭگەيدەگى سوتتاردىڭ زاڭسىز شەشىمىنە قاتىستى ازاماتتاردان 4243 ارىز بەن ءوتىنىش كەلىپ تۇسكەنى بەلگىلى بولدى. سونىڭ جارتىسىنان استامى (67 پايىزى) قۇقىق قورعاۋ ورگاندارى مەن اكىمدىكتەر جانە پارتيا مۇشەلەرىنىڭ قىزمەتى شەڭبەرىندە قاراستىرىلىپتى. بۇل رەتتە جەمقورلىققا قارسى كۇرەس رەسپۋبليكالىق قوعامدىق كەڭەسىنىڭ مۇشەلەرى وڭىرلىك جانە اۋماقتىق كەڭەس جۇمىستارىنىڭ جۇمىسىن بەلسەندىلەندىرە ءتۇسۋ قاجەتتىگىنە ەرەكشە دەن قويدى. مىسالى, سەناتور قۋانىش ايتاحانوۆ 225 اۋماقتىق قوعامدىق كەڭەس ءبىر جىلدا 566-اق وتىرىس جانە 177 عانا جەكە قابىلداۋلار وتكىزگەندىگىن وتكىر سىنعا الدى.
پارتيانىڭ جەمقورلىققا قارسى جاڭا باعدارلاماسىن ازىرلەۋ ءۇشىن جۇمىس توبى قۇرىلادى. ونىڭ قۇرامىنا ۇكىمەتتىك ەمەس ۇيىمدار مەن مەملەكەتتىك ورگاندار وكىلدەرى, پارلامەنت دەپۋتاتتارى, ساراپشىلار, ساياساتتانۋشىلار, عالىمدار ەنەتىن بولادى. جۇمىس توبىنا ءماجىلىس دەپۋتاتى, «نۇر وتان» پارتياسى جانىنداعى قۇقىقتىق كەڭەس توراعاسى نۇرلان ءابدىروۆ جەتەكشىلىك ەتەدى. جاڭا باعدارلاماعا قاتىستى ءسوزىندە جەمقورلىققا قارسى كۇرەس رەسپۋبليكالىق قوعامدىق كەڭەسىنىڭ توراعاسى قايىربەك سۇلەيمەنوۆ بىلاي دەدى: «پارتيانىڭ جەمقورلىققا قارسى جاڭا باعدارلاماسى جەمقورلىققا قارسى ءىس-قيمىل بويىنشا جۇيەلىك ماسەلەلەردى شەشۋگە باعىتتالادى. اتالمىش قۇجات العاشقى جارتىجىلدىقتا ءازىر بولادى. جاڭا ستراتەگياعا ەكونوميكالىق ىنتىماقتاستىق جانە دامۋ ۇيىمىنىڭ جەمقورلىققا قارسى ۇسىنىستارى ەنگىزىلەدى. پرەزيدەنت جولداۋىنا سايكەس ەىدۇ – قازاقستاننىڭ الەمنىڭ دامىعان 30 ەلىنىڭ قاتارىنا ەنۋىندەگى باستى باعدار».
وتىرىسقا قاتىسۋشىلار جەمقورلىقتىڭ ەلىمىز بەدەلى مەن ينۆەستيتسيالىق احۋالعا كەرى اسەر ەتەتىنىنە ەرەكشە نازار اۋداردى. سوندىقتان دا, جەمقورلىققا قارسى ءىس-قيمىلدى ارتتىرۋ جونىندەگى حالىقارالىق ستاندارتتاردى بەلسەندى ەنگىزۋ قاجەتتىگى العا تارتىلدى. تالقىلاۋ ناتيجەسى بويىنشا ناقتى ۇسىنىستار ازىرلەندى.
اسقار تۇراپباي ۇلى,
«ەگەمەن قازاقستان».
