نۇر-سۇلتان قالاسى پوليتسيا دەپارتامەنتىنىڭ ءباسپاسوز قىزمەتى تاراتقان مالىمەت بويىنشا 8 فاكتىنىڭ ءبارى «قۇقىقتىق ءتارتىپ» جەدەل الدىن الۋ ءىس-شاراسى اياسىندا بەلگىلى بولعان.
«جەدەل الدىن الۋ ءىس-شاراسى كەزىندە زاڭسىز اينالىمنان 8 قارۋ-جاراق الىندى. ءبىر ويىق جانە 7 تەگىس ۇڭعىلى قارۋ تاركىلەندى. مىسالى, 25 تامىزدا 26 جاستاعى تۇرعىننان تاپانشا تاركىلەندى. تەكسەرۋ ناتيجەلەرى ونىڭ وق اتۋعا جارامدى قىسقا ۇڭعىلى اتىس قارۋىن زاڭسىز ساقتاپ كەلگەنىن انىقتادى. قارۋ 5,6 مم كاليبرلى «رەۆولۆەر» تۇرىندە ۇيدە جاسالعان. اتالعان فاكتى بويىنشا قىلمىستىق ءىس قوزعالىپ, ۇستالعان ازامات ۋاقىتشا ۇستاۋ يزولياتورىنا قامالدى», دەپ جازىلعان دەپارتامەنتتىڭ دەرەگىندە.
سونداي-اق, رەيدتىك ءىس-شارا كەزىندە ەلوردالىق پوليتسيا قىزمەتكەرلەرى جول قوزعالىسى ەرەجەلەرىن ورەسكەل بۇزۋ فاكتىلەرىن انىقتاپ, جولىن كەسكەن.
ء«ىس-شارا كەزىندە كوپ پاتەرلى جانە جەكە تۇرعىن ۇيلەردىڭ اۋلالارىندا قۇقىقتىق ءتارتىپتى قامتاماسىز ەتۋگە ەرەكشە نازار اۋداردى. جاڭا تىركەلگەن جانە بۇرىن جاسالعان قىلمىستاردىڭ ءىزى اشىلدى», دەپ جازادى نۇر-سۇلتان قالاسى پوليتسيا دەپارتامەنتىنىڭ ءباسپاسوز قىزمەتى.
